9
U gerungwa Chube ole kledu gbaba nga dba ai giti unsuialin tangle, agwa nga ulia ma no gerungwa
Chube ole kle nga ngaña giti
1 Chube geru gbu egdage ngeru kwian ole, geru e kwian ta gbu chke ama agedale giti ulita Chube gwa giti u gerungwa Chube olege nga dba ai giti.
2-4 Bda kwara ulla jo dodaba gerungwa Chube ole, u ege gwa nga kledu dodaba bitabokege tangle, nga bitaitege kodi ugakage jogengwa gwagudegudage, nga e tra no no ka gbere Nga Santo. Ne ngwadi ngnagu oro dodaba jichra gbangwa kledu, kaire glidrega dodaba pan gbangwa Chube gwa giti kledu gbaba ne ngwadi, kaire ne ngwadi oro dodaba lle ñachke no kada incienso gugangwa Chube gwa giti kledu gbaba. Nga no e nate ñometra no ura kledu itabanga, ñometra itabanga e nate nga bitabokege tangle kledu, nga e nga no no Chubenu ka gbere Nga Santísimo. Ne ngwadi glidrega dodaba lle ogangwa kledu gbaba, glidrega e jegwale oro kledu gbaba ulita. Glidrega e skieru lle kledu ogaba, lle e kwian ta gbagda tachke Chube agedu ama alin giti, lle ulita ogaba lle ogangwage ai kare: Lle gdaite oro dodaba limeta kare kledu, lle e toli lle kada maná kledu ogaba sidri e bligda, Chube bligda e ketu che enusulian oña israelita ulitage unsuialin tangle. Kaire glita chagegda che enusulian Aarónnu kledu ogaba, glita e numachiu unsuialin tangle. Kaire Chube Moisés gbu chada dege kwian alin kechuga giti kwian toidale mine Chube gwa giti, kechuga gbaboke e kledu ogaba kaire glidrega e skieru.
5 Glidrega lle ogangwa e kagda gití oro dodaba lle boanga Chube alin nga ngaña giti kare gdaboke kledu gbaba. Lle oña e jigda gwagda ten giti moge ongoru ongoru glidrega lle ogangwa chegu jiga gwaru. Lle boanga Chube alin oña e giti suge kwiange Chube kle eni kwian ole. Glidrega dodaba lle ogangwa, lle e kagda gití bda guleda bea jo gbaba, ene kwian ulita me chegu jiske Chube gwage. Boidu ene ulita unsuialin, geru tanre kle tragale agwa nege cha me chegekalin gerule lle ulita kledu gbaba u ege alin giti allabi, kaire cha gerudale kwian gerunga Chube ole daba alin u ege giti.
6 Lle ulita kledu gbaba ene u gerungwa Chube olege gire kwian ulita gerunga Chube ole daba alin kledu joge diali chui gbaite kaire kairege nga bitaitege tangle kada Nga Santo lle ulita boi Chube alin geru kle gbaba kare.
7 Agwa nga bitabokege tangle kada Nga Santísimo kwian gdaitre alin gerunga Chube ole daba alin ma kweri na ulitage ama alin ñadu joge nga ege. Ama kledu joge nga ege chura kaire kairege bitaitre alin allabi, ama joge chiga nga ege ama bda bea dbadale ule, bda bea ama gbadale glidrega lle ogangwa kagda gití mau alin agali ama agedu me no giti kaire kwian na ulita alin kwian agedu me no giti, kwian agedu gweale me no, amage me sugedu ama kle age me no, e giti ulita kwian gerunga Chube ole bda bea gbu glidrega lle ogangwa kagda gití kwian alin.
8 U gerungwa Chube ole kledu nga dba ai giti gire, e suiage tangle kwian agedale ulita Chube geru gbu kare ngeru. Nga ege kwian ngwale me ñadu joge Nga Santísimoge gerule Chube ole mo giti agali ama agedu me no giti. E giti Chube Oña kle che ta gbe ulia e suiale kwian ngwale me ñadu joge gerule agali Chube ole mau giti.
9 Sugedale chege Jesucristo bebi chke gire kwian gerunga Chube ole daba alin lle ketu Chubege daba alin kare bda guda Chube gwa giti kwian agedu me no giti geru gbaba ngeru gerule kare, e ulita ama agedu e no agwa me ñadu kwian chudaboi chage trate Chube takalin kare, kwian diali chegu agenga me no ama chegu jiske Chube gwa giti.
10 Che mo ta gbadale tañachuge e giti geru kledu gbaba ngeru ni kle gerule kwian ta giti, agwa kle gerule bligda giti kwian ñage bligda mine gute mine me gute, kaire kle gerule lle gweale jadale giti kaire kle gerule kwian mo gbadale trate mo giti tangle mo glige alin allabi giti. Kwian e kledu age ene sugetidale alin Chube bebi geru jagere Jesucristo giti gbe gire, e ulita tadu gerukalin kwian chui ege kledu age Jesucristo be age giti ulita.
11 Agwa Jesucristo chku nga dba ai giti age no kwian alin kwian chudaboi, ama mo ketu gwaleda kwian agedu me no giti kwian jwangda siere ji chugege age me no gdale, gire nege Jesucristo kle chege kweri no gerunga Chube ole kwian alin nga ngaña giti. Ama kle nga no no Chubenuge nga ngaña giti gerule Chube ole kwian alin, nga e nga ngaña giti Chubenu, kwian me u dodadu gerungwa Chube ole nga ngaña giti u jo dodaba nga dba ai giti kare, Chube agali nu nga e dodaba no nga ngaña giti.
12 Jesucristo joni nga no no Chube kle ngwadige nga ngaña giti gire, Jesucristo me jo bda chivo bea ni chbi soli bea dbe ketadale Chubege kwian age me no giti kwian israelita gerunga Chube ole daba alin kledu age kare. Agwa Jesucristo kledu nga dba ai giti gire ama agali mo ketu gwaleda kwian ulita age me no giti bitaitre alin, ene ama bea giti kwian tien gitiru ji chugege age me no gdale chui diali dale alin, ene Jesucristo giti kwian ñage chege no trate me jiske Chube gwa giti diali chui tangle.
13 Geru kledu gbaba ngeru geru e kwian kledu age ulita geru kledu gbaba kare, kwian israelita gerunga Chube ole daba alin ama ulita chbi ñenua soli guda kaire chivo guda bigire ama bda bea e litu ole jogda solige jo drennga kwian ulita bai agedu me no geru e dollale giti. Kaire ama chbi chebia soli guda chbi soli jaba gugu, ama chbi kugeba tanlla litu ole, gire ama jo chbi soli kugeba tanlla e drennga kwian me kle age geru kle gbaba kare giti. Chbi soli tanlla giti kaire bda bea giti kwian agenga me no kledu chege trate kwian na gwa giti geru kle gbaba kare. Kwian tañachugu kwian chegu trate Chube gwage bda bea giti kaire chbi kugeba tanlla giti, ene kwian ñadu joge u gerungwa Chube olege gerule no Chube giti.
14 Agwa ulia bda bea kledu kwian gbe trate sugetidale alin e suiale, gire ene ulia che mo ta gbadale suge Jesucristo jokeda giti e ma no bda beage, Jesucristo giti che ta chege trate no ulita Chube gwa giti diali chui tangle. Jesucristo noare trate ni ama agedu me no sidri, Chube Oña Jesucristo kira gbu mo kete gwaleda boi daga ngwale Chube gwa giti kwian ulita alin salengwli unsuialin tangle kwian gerunga Chube ole daba alin bda gweale no no trate guda Chube gwa giti daba na kle age me no giti kare. Jesucristo jokeda che agedu me no giti, che ama gerua gai ulia gire Jesucristo che ta lite no trate che ta chege trate Chube gwa giti che me age me no che agedu ngeru kare. Ene che ñage lle no boi Chube alin toi diali Chube takalin kare, Chube ulia no trate ama ulia Chube gwade kiraske.
15 Geru ngeru kledu gbaba egdage kwian ole geru e giti kwian chegu jiske diali Chube gwa giti ama agedu me no giti, ama me ñadu tien gitiru diali dale alin ji chugege age me no gdale bda guleda giti ama alin. Agwa Jesucristo mo ketu gwaleda kwian jwanle siere ji chugege age me no gdale gire Jesucristo jokeda giti Chube geru jagere ma kweri kiraske gbu egdage kwian ole. Gire ene kwian bai Chube nu kwian ta gbaba Jesucristo gai ulia, kwian ene tien gitiru ji chugege age me no gdale kaire kwian e be toi no chui tangle diali dale Chube ole, Chube be age no no ama alin Chube nu geruba kare kwian ole.
16-17 Cha gerule ulia ba ole, uñale bage che kwian israelita suiale kwian bebi jogekeda gire kwian diali kle chada jige degaba ama llea ulita giti lle e amanu girabatakle ama bitalla ole chada kle degaba kare ama be jogekeda chuiage. Kwian e kle chege toi gwade gire ama bitalla me ñage chege lle kwian enu ole, agwa kwian e jogekeda chkedale uñale nate kwian e jogebakeda gire chada degababi e gbaba egdage chege ñanaske kiraske ama bitalla alin, lle ulita kwian jogebakedanu girabatakle kwian e bitalla ole chada kle degaba kare. E kare ene Jesucristo jokeda giti geru jagere Chube gbu egdage kwian ole chegu kiraske Jesucristo giti. Ulia Jesucristo jokeda gire ene che ama gerua ganga tien gitiru ji chugege age me no gdale kaire che be toi diali Chube ole chui tangle diali.
18 Agwa Chube gerua jo gbaba ngerutabi che enusulian oña israelita ulita alin unsuialin tangle gire kwian bda gwadaleda ene bda e bea giti kwian chege trate Chube gwa giti sugetidale alin geru kledu gbaba gerule kare.
19 Unsuialin tangle Moisés Chube gerua gbu chke uñale ulita kwian ulitage kwian toidale mine Chube gwa giti Chube takalin kare. Bigire Moisés gli kadakle hisoponanga tkunga gdaite, ama bda oveja boli dába dabere gau lugu glinanga e gwagdage. Gire ama chbi soli bea gau jogda solige, ama chi ngalán tku be eske gire ama glinanga dodaba bda oveja boli ole ama chugu chiga be eske gire ama be dreunnga kwian ulita giti kaire ama be dreunnga chada Chubenu Moisés nu degaba giti.
20 Gire Moisés gerudu ene kwian ole: “Sugedale ba ulitage be ai giti Chube geru gbu egdage che ole geru e chegu kiraske, che geru e gbadale gdadi.”
21 Moisés gerudu ene kwian ole gire Moisés kaire agwe bda bea dreunnga u gerungwa Chube ole giti ulita kaire lle ulita kledu u ege gbaba no Chube alin, lle e ulita giti Moisés be dreunnga ene lle ulita chege no trate Chube gwa giti.
22 Chube Moisés ta gbu unsuialin tangle geru dege kare geru e kledu gbaba gerule ene: Kwian gerunga Chube ole daba alin bda gwaleda gire bda bea e giti kwian e ñage lle tanre gbe trate Chube gwa giti, lle bedre alin giti be me joge dreanlenga dale lle gbagda trate Chube gwa giti. Bda gweale jogedaleda gire Chube gwage bda e beadi ene Chube be kwian agedu me no talla mlienga, Chube mi tañachuge dare kwian agedu me no giti. Geru ngeru kledu gbaba giti sugedale chege lle gweale bea alin allabi giti kwian ñage chege no trate me jiske Chube gwage.
23 Unsuialin tangle u gerungwa Chube olege lle ulita kle gwa u ege ama giti ulita Moisés bda bea dreunnga, ene bda bea giti ama lle e ulita gbu trate Chube gwa giti sugetidale alin. Agwa lle ma no trate ma kiraske bdage jogedaleda gire ene kwian agenga me no ñage chege no trate Chube gwa giti diali dale alin kaire kwian ñage joge toi Chube ole nga ngaña giti.
24 Malen Jesucristo mo ketu gwaleda kwian agedu me no giti, ulia Jesucristo ma no trate ma kiraske lle na ulitage, Jesucristo joni nga ngaña giti agali Chube gwa giti chege gerunga Chube ole kwian alin. Ulia Jesucristo me jo gerule Chube ole u gerungwa Chube olege nga dba ai giti dodaba kwian kiralla giti kwian gerunga Chube ole daba alin na ulita agedu kare. Agwa Jesucristo agali joni nga ngaña giti Chube kle ngwadi, nege ama kle diali nga ngaña giti gerule Chube ole kwian ulita ama gerua ganga ulia ka chudaboanga gerule kwian alin Chube ole.
25 Nga dba ai giti kwian israelita gerunga Chube ole daba alin ma kweri na ulitage ama jo u gerungwa Chube olege gerule Chube ole gire ama jo tangle ñometra ura itabangage gwa Nga Santísimoge chura kaire kairege bitaitre alin bda bea dbe jogda solige kaite Chube gwa giti. Kwian gerunga Chube ole daba alin e me jo ama bea agali dbe agwa ama diali bda bea kaitu Chube gwa giti mau giti kaire kwian na giti chura ngle tanrege. Agwa Jesucristo agedu bitaitre alin allabi, me chegu age dare kwian gerunga Chube ole daba alin na ulita agedu kare chura kaire kairege. Jesucristo me agedale dare, ama mo ketu gwaleda bitaitre alin allabi, e chege no diali dale alin kwian ulita alin.
26 Jesucristo jogedaleda bitangle bda kare kwian alin, ene ama kaire ñadu jogeda gwangea nga dodabage gwaiguda ulita bitangle kwian alin. Agwa Jesucristo jogeda giti me salengwli bda jo gwabada kare. Kwian gerunga Chube ole bda bea ketu Chubege kwian alin me mo bea ketu. Agwa Jesucristo agali mo ketu gwaleda kwian agenga me no ulita giti bitaitre alin, e ma trate bda beage. Jesucristo jokeda giti kwian ñage tien gitiru ji chugege age me no gdale diali dale alin.
27 Cha gerule ba ole, ulia kwian ulita jogekeda bitaitre alinbi bigire chui be chke Chube gerule ama giti ama jiske o ama me jiske Chube gwa giti.
28 Ai kare Jesucristo jo boabanga daga ngwale ama mo ketu gwaleda bitaitre alin kwian ulita jwannga siere ji chugege age me no gdale. Gire bdagli Jesucristo be chieni, chui ege ama mi jogekeda nakwaite kwian agedu me no giti agwa ama be chieni age no no kwian ulita alin bai nu ama gerua gaba ulia kle ama manade ngwange. Jesucristo be kwian e ulita dbe ule nga ngaña giti toi ama ole ule Chube kle ngwadi diali chui tangle.