Fiisi Pool kaɓɗoh ɓi Efes
Rangsohaani
Pool ɓaahee ŋ Israayel ci, ŋ cuuɓiŋ Benyaamin. A nikee Farisen. Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci. Waaye wa raakka mbeh, a cohha na Yeesu, a kossa po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Wa Pool koc kaɗ Efes wa nikee ŋ reehɗohaaniŋ ɓaaɓiŋ ɗe yakki kanakɗoh, wa nikee kaɗ rohƴiɗ. Dokkissaŋ ɗe nga, wa nikee ŋ ɓaaɓaŋ ɗe yakka kaahayɗoh, a tumeen nga ini uup kiis kanak. Wa a wiirkee ŋ ɓaaɓeem, a lahha ŋ sero Efes, a raakee coh na yakak caŋ Janguucaŋ Efes. Wa degga ɓi kiis, a kaɗta Rom findi ambuuɗi joy atte'u. Wa miniɗ nik ne ŋ jamanoonaam weɗ a fiisoh kaɓɗohii wuu kosiɗ ciŋ Efes, wa a naandsuku in neɓiɗ kerah ŋ ini kaɗ ŋ Janguucaŋ kur kaŋ ɓa. Wa namiɗ min nik ne kaɓɗohi a fiis ɓi Kolos na Filemoon, a woosoh ca ŋ jamanooneem.
Pool fiis kaɓɗohi ne a ñaah ɓi Efes, a jangiɗ ɓa ŋ ini kaɗ ŋ kosi ɓa kos.
Fiisi Pool kaɓɗoh ɓi Efes kaɗtiɗoh an :
- Pool kañɗiɗ ɓi Efes 1:1-2
- Pool corkiɗiɗ Kooh ŋ muci a tufkiɗ bala Adina fersan 1:3-14
- Pool kiimɗiɗ ɓi Efes Kooh 1:15-19
- Yaki Kiristaani yak 1:20-23
- Baahohi 2:1-10
- Nik yino 2:11-22
- Pangkiŋ Pool : Teeɓoh ini Kooh ɗasɗe, te wi hotuk kotii 3:1-13
- Kiim Kooh ne ɓi Efes inah baahiɗ waaɗohi nik ŋ Kiristaani 3:14-21
- Kosiɗ ci mand na cir ciŋ faani te Kiristaani a yi hafi 4:1-16
- Jangɗoh wuu kipes ki asi 4:17–5:20
- Jangɗoh wuu kipes kiŋ kahan 5:21–6:9
- Ganaay ci Kooh eɗ kosiɗ ci 6:10-20
- Askohi 6:21-24
1
Kañɗohi
1 Mi yii kañiɗ ɗu, ɗu ɓi ɓo'-Kooh ci nik [ŋ Efes]. Mi yi Pool, ApootariŋKiristaani Yeesu ŋ ini Kooh waaɗ, mi yii fiis ɗu, ɗu ɓi hool wuu Kooh te ɗu carra oolku ŋ niki ɗu nik ŋ Yeesu Kiristaa.
2 Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !
Barke mitiɗ ŋ Kiristaani
3 Eey Kooh,
yi nik Koohiŋ Heɗ ɓoo Yeesu Kiristaa,
a nammba nik Baabiŋ ɗe,
a yakɗaah ;
ŋ niki ɓoo nik ŋ Kiristaani,
a barke'ɗiɗ ɓoo ŋ Fuuɗsi Hoolohngaani,
barke nu nik ŋ ɗafki.
4 Ŋ Kiristaani, Kooh taniɗ ɓoo
bala Adina camban,
ne ɓoo hool wuu ce
te ɓoo raakuu sikka ŋ fikiice.
Ŋ waaɗohiŋ ɗe,
5 a ambeen ne
a hey ɓoo tume kuɓuuciŋ ɗe
taamboh ŋ Yeesu Kiristaa.
Ineem weɗ a waaɗ ŋ baah kiŋ ɗe,
6 ne ɓoo ƴeek
yaki baahohi a baahoh ɓoo yak,
wi a on ɓoo
ŋ niki ɓoo nik ŋ Kiristaani,
yi a waaɗ.
7 Ŋ aami a aam ñif miŋ ɗe,
a pulɗohiɗ ɓoo ŋ baahaaɗi,
ɓoo ɗaasuuɗ bakaaɗ ci.
Weɗ yakkiŋ baahohiŋ Kooh,
8 a eɗta ɓoo nga laayiɗ,
wa hunnda
na liiɓohaaɗ moɗiɗ nu nik
na kiñaañ nu nik.
9 A inhiɗiɗ ɓoo
ini ɗasɗukiɗiŋ ini a waaɗee tum.
A tufkiɗeen
ŋ baah kiŋ ɗe ne,
a heya tume taamboh ŋ Kiristaani.
10 Ineem,
a hey wa tume ŋ jamanoonaŋ wa,
weɗ ne a ambsoh
in ci nik ŋ Eel ci na kehƴi jen,
a deg Kiristaani ŋ hafiŋ ca.
11 Ɓaatta nga,
ŋ niki ɓoo nik nga ɗe,
ɓoo rahsiɗ ɓakiŋ ɓoo ŋ gapohi,
laam,
Kooh taniɗ ɓoo maañ,
wa nikee ini a tufkiɗee tum
sagu ne a waaɗee wa waaɗ.
Te in nu Kooh tufuk tum ɗah,
a tuma findi a waaɗoha.
12 Ɓoo ƴeekaat yaki a yak,
ɓoo,
ɓi koc ooluk Kiristaani.
13 Ɗu,
wa ɗu kerah woo kiŋ keeh ki,
Yegɗohiŋ Muciŋ ɗu,
ɗu nameen ɗe kos,
te ŋ niki ɗu nik nga ɗe,
Kooh eɗiɗ ɗu
Fuuɗsi Hoolohngaani gapohse
ne a nik ñaasi teeɓoh ne
ɗu wuu ce.
14 Fuuɗsi Hoolohngaani
a yi firnde
ne in ci Kooh gap cuuɓiŋ ɗe,
ɓoo hey ca rahse.
Ɓoo hey ca rahse
mbeha ɓoo pulɗassan ŋ miskiɗ.
Kon, ɓoo ƴeekaat yaki a yak.
Pool kiimɗiɗ ɓi Efes Kooh
15 Ineem weɗ tah po, wa ŋ kerah poyi kosi ɗu kos Yeesu Heɗi na waaɗi ɗu waaɗ ɓo'-Kooh ci jen,
16 ŋ gen corkiɗ Kooh ŋ ini kaɗ nga ɗu. Ŋ ɓaahndohee ɗu ŋ kiim ci mi na kiimee ɗe.
17 Ini mi na kiimɗee ɗu, weɗ ne Koohiŋ Heɗ ɓoo Yeesu Kiristaa, Baabi raak kiyak ki, on ɗu Fuuɗsi Hoolohngaani yi onan ɗu liiɓohaaɗ moɗiɗ te a teeɓ ɗu ya ɓa Kooh po ɗu inah ɗe keeh-keeh.
18 A ñiinɗaat has ciŋ ɗu na keeñ ciŋ ɗu, ne ɗu inah yaakaari a on ɗu wa a ɓeeɗuk ɗu, ɗu nam inah findi gapohiŋ ɗe yakoh ŋ ɓo'-Kooh ci
19 na findi hatiliŋ ɗe yakoh ŋ ɗooƴ ɓa, maanaam ŋ ɗooƴ ɓoo ɓi kos. Weɗ hatili yakohngaani
20 Kooh hultiɗoh Kiristaani, weɗ hatili a nam ɗe ɓoofɗoh ŋ yaah ñaahmiŋ ɗe, ŋ ɗafka.
21 Kiristaani ɓoofɗuuɗ ŋ ɗafuk ki'adug nu nik, ŋ ɗafuk kikilifa nu nik, ŋ min-min nu nik, ŋ hatil nu nik na in nu raak tiik ɗah, ngaŋ adinaanii dong haa, waaye na adinaani na haye.
22 Kooh on Kiristaani ne a adgoh in ci jen, a degga ɗe ŋ ɗafuk in ci jen, a onnda Janguuni ɗe, ne a nik hafiŋ Janguuni.
23 Janguuni weɗ faaniŋ Kiristaani ; ŋ ɗooƴ Janguuni, a yii nga keeh-keeh, te a yi mitiɗ in ci jen.