6
Harmban kuɓu na ɓi rim ɗe
1 Ɗu ɓi komaakci, kerhiɗaat yaay ciŋ ɗu na baab ciŋ ɗu findi Heɗi waaɗoha, ineem weɗ waas.
2 Fiis ci woo ne : « Eɗa yaay ɗu na baab ɗu cir. » - weɗ nakohi koc wi hun na gapoh -
3 an : « Wa hey baahe nga ɗa te fu raak kipes hutiɗ ŋ kehƴi. »
4 Ɗu ɓi baab ci, kinaat ayrukiɗ kuɓuuciŋ ɗu, koɗaat ɓa, ɗu deg ɓa ŋ waas te ɗu deng ɓa findi Heɗi waaɗoha.
Harmban ñaam na heɗ ce
5 Ɗu ɓi ñaam ci, kerhiɗaat heɗ ciŋ ɗu ŋ adinaanii, wa hun na neƴƴoh na eɗ cir, tumaata na keeñ hooliɗ po haa ɗu na pangkiɗe Kiristaani ;
6 wa kinaat nik ŋ has ciŋ ɓa dong, po haa ɗu na waake ini neɓ ɓa, te ɓa ɓo' dong, waaye wa nikaat findi ñaam ciŋ Kiristaani, ɓi na tume ini Kooh waaɗ na keeñ ciŋ ɓa.
7 Pangkiɗaat ɓa na keeñ soosiɗ, findi ɓoyi na pangkiɗe Heɗi waaye findi ɓoyi na pangkiɗe ɓo' haa.
8 Inhaat ne yaa nu nga ɗu ɗah, a nik ñaam wala a nikɗi ñaam, in baahiɗ nu a tum ɗah, Heɗi hey ɗe wa dokne.
9 Ɗu ɓi heɗ ñaam ci, tumohaat ɗaa na ñaam ciŋ ɗu ; faɗaat ɓa gapuk tum miskiɗ, te ɗu inah ne e ɗu ɓaah Heɗ yino, a yi ŋ Eel ci te a na talsoheeɗi ɓo'.
Ganaay ci Kooh eɗoh
10 Ini tas weɗ ne, raakaat hatil ŋ Heɗi, ŋ hatiliŋ ɗe laayohngaani.
11 Ɓayaat ganaay ci Kooh eɗoh jen, ne ɗu min yurhiɗkoh tumohaaɗ ciŋ Seytaani.
12 Laam ɓoo hiñohɗi na heɗ faan na ñif, waaye ɓoo na hiñohe na heɗ hatil ci nik ŋ ɗafki, ci raak kikilifa na min-min na doole ŋ adinaani ñuusiɗii, ɓoo na hiñohe na feruuɗ ci baahaaɗiici minɗi hotu jen.
13 Ineem weɗ tah, ɓayaat ganaay ci Kooh eɗoh jen ; ŋ ineem, mbeh baahaaɗi hay ɗah, ɗu min hiñoh baahaaɗiineem te ɗu tum ini ɗu joy tum jen po ƴut ɗah, ɗu ris tufkiɗ jing.
14 Kon, tufkaat jing ; tokohaat kinoh ciŋ ɗu keeh ki, kiyurah nik kulɓa niiɗoha fisaaciŋ ɗu.
15 Ñafaɗ ciŋ ɗu nikaat sawar kaɗ yegɗoha Yegɗohiŋ Muci na onohe jam.
16 Ŋ in ceem jen, ɓaataat kos nga, wa nik ɗipkoha ɓis, ne ɗu min ƴim ɓis ci kaɓɗuuɗ ci Seytaani na weesee ɗu jen.
17 Teyaat kongi, weɗ muci, ɗu nam ɓay ndangiŋ Fuuɗsi Hoolohngaani, wi nik woo kiŋ Kooh.
18 Ŋ in ceem jen, genaat kiim Kooh, kiimaat ɗe ne a ɓaatɗoh ɗu. Ŋ in nu wa min nik ɗah, kiimaat Kooh, taamboh ŋ Fuuɗsi Hoolohngaani te ɗu neehuu ; ŋoɗaat nga, ɗu kiimɗee ɓo'-Kooh ci jen.
19 Namaat to kiimiɗ Kooh, ne ŋ rangis nguɓ, ŋ woyee na ɓooɓi ɗah, ŋ rahas woo ci ŋ etoh inhiɗohaa ɓa Yegɗohiŋ Muci, wi nik kumpa nga ɓa, te ŋ neƴƴohuu nga.
20 Yegɗohiŋ Muci weem, weɗ tah ho nikiɗ Heɗi ndii ŋ kasooni. Kiimɗaat to Kooh ne ŋ woo na ooluk findi ŋ joy woyoh.
Askohi
21 Tisikos, ɓaah ɓoo yi ŋ keeñkoh, a cariɗ oolku ŋ pangkiŋ Heɗi, a hey ɗu woye jen ne ɗu nam inah ini ŋ nikoh.
22 Ŋ woosiɗ ɗe nga ɗu ne a woo ɗu ini ɓoo nikoh te a soosiɗ keeñ ciŋ ɗu.
23 Kooh Baabi na Yeesu Kiristaa Heɗi onaat ɓaah ciŋ ɓoo kosiɗ ci jam na waaɗoh na kos !
24 Ɓi waaɗ Heɗ ɓoo Yeesu Kiristaa waaɗi na reeheeɗi, ɓa baahohsaat jen !