Pula
Teerndi kanakɗohiini ŋ Tawreet
Rangsohaani
Teerndi na woyse "Pula", wa na naandsuke pulaŋ Israayel Misra. Wa teerndi kanakɗoh ngaŋ teereeci yatuus ciŋ TawreetiŋMusaa, te teereeciŋ Tawreeti, ceɗ teereeci koc ŋ Fiis ci Hooliɗ ci.
Teerndii teeku "Pula", wa na woye ŋ cambiŋ cuuɓiŋ Israayel.
Ŋ teerndiŋ "Camba", ɓoo hotiɗ ne ɓooɓi rimkoh ŋ Ibrahiima kaɗeeɗa po findi ɓa nikoh cuuɓ ŋ Misra, cuuɓeem ɓeɗ Israayel ci.
Ŋ cambohaaniŋ "Pula", ɓi Misra tumeen cuuɓiŋ Israayel ñaam. Teerndiŋ Pula na naandsuke findi Kooh mucɗoh ɓa ŋ ɓi Misra, na findi a ɓendoh ɓa ŋ kehƴa hulanga po Kanaan, wi Kooh gapee Ibrahiima.
A oniɗ ɓa kañam pesoha ŋ kehƴa hulanga, a tufkiɗta ambtiɗoh na ɓa. A eɗta ɓa ɓi nakoh, a jangiɗta ɓa findi Ɗiipi-na-Cohohse joy haɓɗohu na findi ɓa seeƴkohan.
Teerndiŋ Pula kaɗtiɗoh an :
- Findi kipes kiŋ Israayel miskoh ŋ Misra 1
- Kooh kooɗkiɗiɗ Musaa ne a adgoh 2–4
Israayel ci mucɗuuɗ 5:1–15:21
- Ɓaaɓa ŋ kehƴa hulanga ŋ ɓaatɗohiŋ Kooh 15:22–18:27
- Ambtiɗoh ŋ harmban Kooh na Israayel ci 19–24
- Jangɗoh ci kaɗ ŋ findi Ɗiipi-na-Cohohse joy haɓɗohu 25–31
- Israayel bakaaɗiɗ bakaaɗ yakak ŋ fiki Kooh 32–34
- Haɓɗaŋ Ɗiipi-na-Cohohse 35–39
- Nikiŋ Kooh ŋ ɗooƴ Ɗiipi-na-Cohohse 40
1
Israayel ci tumuuɗ ñaam ŋ Misra
1-4 Cii ceɗ tiik ciŋ kuɓuuciŋ Israayel yi na woyse Yaŋhooɓa, ɓi hay na ɗe Misra : Ruben, Simeyong, Lewi na Yudaa ; Issaakar, Sabuloon na Benyaamin ; Daan na Naftaali, Gaad na Aser ; yaa nu nga ɗah, na ɓi kahan ce.
5 Raak Yuusufa kuɓkiŋ Yaŋhooɓa yinoori nikee ŋ Misra. Ɓi kahan Yaŋhooɓa jen nikee ndaŋkiyaah-yasna-kanak (70).
6 Ŋ mirndaani Yuusufa kaannda, a yi na taambɗoh ciŋ ɗe na ɓooɓa ɓaahee na ɗe jamano jen.
7 Waaye Israayel ca nikka ɓasil, ɓa rimaatɗoheeɗa, ɓa ɓaatkeeɗa, po ɓa riiffa kur ka.
8 Wa kaɗeeɗa po buur wiiriis adgohha kur ka, raak ɗe inheeɗi in ŋ Yuusufa.
9 A woosa ɓooɓaŋ ɗe ne : « Markaat Israayel ci, ɓeɗ uup ɓoo laay, ɓa uupiɗta ɓoo hatil.
10 Hiñoh raak ɗah, ɓa miniɗ hun na ɓi sang ɓoo, ɓa ruuk ɓoo te ɓa pul kur ki, kon ɓoo tumohaat na liiɓoha po ɓa ɓaatkuu. »
11 Weɗi ɓi Misra degoh Israayel ca panguk miskiɗ, ɓa kooɗta ɓi ɓo' ne ɓa tumɗukohee Israayel ca ŋ pangkeem ngaŋ uup doole. Ɓa pangkeeɗa, po ɓa taɓahha Pitom na Ramses, ca nikka kur-taah ɗaakkoha pesoha ŋ tiikiŋ Firawnaana, buuraŋ Misra.
12 Waaye findi ɓa uup ɓa tumɗukoh panguk miskiɗ ɗah, Israayel ca na uupohe ɓaatkoh ɗaa, ɓi Misra neƴƴohha ɓa keeh-keeh.
13 Ŋ ineem, ɓa uupeeɗa ɓa nga uup ñaamɗukoh.
14 Ɓa yahha kipes kiŋ ɓa na panguk miskiɗ, ɓa haɓɗiɗukoheeɗa ɓa muul na ɗok, ɓa guurɗukoheeɗa ɓa, ɓa añaandkoheeɗa ɓa na panguk nu nik ne wa miskiɗ ɗah.
15 Wa raakeen dooñoh kanak ngaŋ ɓaŋ Heber ca, yinoora teeksee Sifara ya tas teekuusa Puwa.
16 Buura nakka ɓa ne : « Ɗu tufkohee ɓitiɓ ciŋ Heber ci ne ɓa ɓaslee kotii ɗah, markaat baahiɗ, kuɓki nik ƴaar ɗah, apaat ɗe, a nik ɓitiɓ ɗah, faɗaat ɗe a pes. »
17 Waaye dooñoh ca nupeen Kooh, weɗ tah ɓa haɓiɗɗi ineem, ɓa faɗta kuɓuuca ƴaar ca, ɓa apɗi ɓa.
18 Weɗi buura ɓeeɗkoh ɓa, woosa ɓa ne : « Wa ye tah ɗu tummba inii, ɗu faɗee kuɓuuci ƴaar ci ɓa pese ? »
19 Ɓa loffa ɗe ne : « Ɓitiɓ ciŋ Heber ci ɓa mandɗi na ɓiŋ Misra, ɓa ndeng ndeng. Bala dooñohi na ree ɗah, raakee ɓa raakiɗ kuɓu po ƴutiɗ. »
20 Kooh baahohha dooñoh ca, ŋ ineem Israayel ca uupeeɗa nga ɓaatuk, po ɓa nikka laayoh na laayoh.
21 Kooh tummba dooñoh ca ɓasil, ɓa raakka ɓi kuɓu ŋ kerhiɗi ɓa kerhiɗ ɗe.
22 Firawnaana nakka ɓooɓaŋ ɗe jen ne : « Israayel ci raak kuɓu a nik ƴaar ɗah, njafaat ɗe ŋ kaliŋ Niil ; a nik ɓitiɓ ɗah, faɗaat ɗe a pes. »