10
Naamooni yasna-kaahayɗoh : njeeleer ca
1 Wa Firawna sang faɗ Israayel ca, Nikiɗi woosa Musaa ne : « Kaɗa ŋ Firawna, ñam ndengiɗ keeñiŋ ɗe na ciŋ dag ciŋ ɗe ne ŋ teeɓoh keemaan ciŋ ngo ŋ fikiiɓa,
2 ne fu min naandsuk kuɓuuciŋ ɗa, na set ciŋ ɗa findi ŋ njembtoh ɓi Misra na keemaan ci ŋ tum nga jen. Ne ɗu inah ne ñam Nikiɗi. »
3 Musaa na Aaruna kaɗta ŋ Firawna, ɓa woosa ɗe ne : « Inii weɗ Nikiɗi Koohiŋ Heber ci woo : “ Fu na hee hey sange ruhsiɗ haf fu ŋ fikiice po kiɗa ? Faɗa ɓooɓiŋ ɗe ɓa min ɗe kaɗ ñaamka.
4 Fu sang ɗah, marka, kim a hey ruhsiɗe njeeleer ŋ kur kiŋ ɗa.
5 Ca hey riife kur ki po ca muur merhey mi jameet, ca ñam in ci toɓiŋ atoh ciŋ galacaac ci faɗ, ca heyɗi faɗe ali in ŋ kidig ciŋ bilaf fi.
6 Ca hey riife ŋ kahan ciŋ ɓooɓiŋ ɗa jen, na ciŋ dag ciŋ ɗa na wiŋ ɗa. Waa hee nike naamooni hotohuuɗi ŋ Misra, ŋ caac caŋ ɗa poyi. ” » Musaa eɗta ɗe finho, a cootta.
7 Dag caŋ Firawna woosa ɗe ne : « Ƴaarii na hee ɓoo hey kafnde po kiɗa ? Faɗa ƴaaɓii ɓa coot, ɓa kaɗ ñaamka Nikiɗi Koohiŋ ɓa. Hanaa fu inahɗi ne Misra yahrukohiɗ ? »
8 Musaa na Aaruna haytohuusa ŋ Firawna, a woosa ɓa ne : « Ɗu miniɗ kaɗ ñaamka Nikiɗi, Koohiŋ ɗu, waaye a ɓinde na hee kaɗe ? »
9 Musaa loffa ɗe ne : « Ɓoo jen, komaaki na yakak, ƴaar na ɓitiɓ, cafaƴ na fiir, na ɗoopaat ciŋ ɓoo, mbaal ci, pe' ci na inoh ci, laam, ɓoo na hee haɓɗe feet yakiɗ wuu Nikiɗi. »
10 A njembitta ɓa an : « Nikiɗi nikaat na ɗu ! Nik rek ne ñam faɗan ɗu ɗu coot na ɓooɓiŋ ɗu ɗah ! Wa leeriɗ ne ɗu na waake ro'.
11 Muk ! Ɗu ɓi ƴaar ci dong, kaɗaat ɗu ñaamka Nikiɗi, ineem weɗ ɗu kiim. » Weɗi ɓa aañoh ɓa ŋ ɗiskaŋ Firawna.
12 Nikiɗi woosa Musaa ne : « Raɗsa yaahiŋ ɗa ŋ Misra, njeeleer ci hay, ca ñam paangfi jen, in ci toɓiŋ atoh ciŋ galacaac ci faɗ jen. »
13 Musaa raɗissa ndooɗaŋ ɗe ŋ Misra, Nikiɗi puuɗissa ŋ pulohaaɗ-noh. Mbaɗi wa hooɓukka puuɗis, wa neehha puuɗis. Wa Kooh wiis, puuɗsa hayya na njeeleer ca.
14 Ca yipukka ŋ kur kaŋ Misra jen, ca yonnga ŋ ɗisik nu nik, njeeleer hend ɗaa laay hotohuuɗi ŋ Misra te ca moosanɗi hotissu nga.
15 Ca ulla merhey ma po wa minisɗi hotu, ca ñammba rim caŋ kidig ca na in ca nikee ŋ yohon ca jen, ca toɓaŋ galacaaca faɗe, ali in hiliir taseeɗi ŋ kidig ca na in ca nikee ŋ yohon ca ŋ kur kaŋ Misra jen.
16 Weɗi Firawna aroh ɓeeɗuk Musaa na Aaruna, a woosa ɓa ne : « Ŋ bakaaɗiɗ ŋ Nikiɗi Koohiŋ ɗu, ŋ bakaaɗta nga ɗu,
17 waaye wa topan waasii. Mi yii kiim ɗu, ɗaasaat to te ɗu kiim Nikiɗi Koohiŋ ɗu, a saɓsoh ho na naamooni na ape wii. »
18 Musaa kurkohha ɗiskaŋ Firawna, a kiimmba Nikiɗi,
19 Nikiɗi puuɗissa puuɗis raakiɗ hatil ŋ muyohaaɗ-noh, wa cootiɗta njeeleer ca jen, ŋ ɓakaŋ cookma na woyse Cookmaŋ-Hapeel-ca, ali njeeleer eleerkisɗi ŋ kur kaŋ Misra jen.
20 Waaye Nikiɗi ndengiɗta keeñiŋ Firawna po a faɗɗi Israayel ca ne ɓa coot.
Naamooni yasna-nikiisɗoh : ñuusa
21 Wa a sang ɓa faɗ, Nikiɗi woosa Musaa ne : « Raɗsa yaahiŋ ɗa ŋ eel ci, kur ki ñuus, ñuusi ɓooɓi saaɓɗan saaɓiɗ. »
22 Musaa raɗissa yaahiŋ ɗe ŋ eel ci, ñuus tuɗ ruhussa ŋ Misra jen ina ree neeh kaahay.
23 Ŋ neeh ca kaahay caam, ali ɓo' mineeɗi hot morom ce te ali ɓo' nga ɓi Misra mineeɗi kuruk ŋ ɗiska a nik. Waaye ɗiska Israayel ca genee nikee ñiiniɗ.
24 Firawna ɓeeɗukka Musaa. A woosa ɗe ne : « Kaɗaat, ɗu ñaamka Nikiɗi, ɓayndohaat ɓooɓiŋ ɗu jen. E ɗoopaat ciŋ ɗu, inoh, mbaal na pe', ca ɗi joy tas ndii. »
25 Musaa woosa ɗe ne : « E fu sah na hee ɓoo tahe raak ɗoopaat ci ɓoo na hee seeƴkohe wuu Nikiɗi, Koohiŋ ɓoo, na ci ɓoo hoomɗiɗan ɗe.
26 Ɓoo hey ɓayndohe ɗoopaat ciŋ ɓoo jen, ali yino tasanɗi nga. Ceɗ ɓoo na hee nihsohe ci ɓoo seeƴkohan wuu Nikiɗi. Te ɓoo inahɗi paaɗ ci ɓoo joy kooɗ feeh ɓoo reeɗi ɗah. »
27 Nikiɗi ndengiɗta keeñiŋ Firawna, yeem waaɗɗi faɗ Israayel ca ne ɓa coot.
28 Firawna woosa Musaa ne : « Pula ndii, te wortuka hotis pukiŋ ngo ; mbehi fu hotissan pukiŋ ngo, fu hey kaane. »
29 Musaa woosa ɗe ne : « Ee, a fu woo wa ; ŋ hotissanɗi pukiŋ ɗa. »