9
1 Yeesu woyissa ɓa ne : « Ñam na woyee ɗu wa te wa keeh, ɓi ɓo' ɓii ŋ ndii, ɓa kaananɗi muk te ɓa hotɗi Nguuriŋ-Kooh hayiɗ na hatil. »
Siñaarɗiŋ ndamiŋ Yeesu ŋ ɗafuk tangoora
2 Wa degga neeh yasna-yino, Yeesu ɓayya Piyeer na Saak na Saaŋ, a kaɗta ɗaaya na ɓa ŋ ɗafuk tango njooliɗ ; ndaam a ɓoƴsukka ŋ fikiiɓa.
3 Kulɓaacaŋ ɗe melciɗeeɗa melciɗ sagu yaanow ; ali naawoh ŋ kehƴi minɗi yaanwiɗoh kulɓa ɗaa.
4 Woosuuɗ kanak teeɓukka ɓa, ɓa nikee Ilyas na Musaa, ɓa woyeeɗa na ɗe.
5 Piyeer woosa ɗe ne : « Jangɗohohi, wa baahiɗ ne ɓoo nik ndii. Ɓoo haɓɗaat ɗiip kaahay ; winoori nik wiŋ ɗa, winni nik wiŋ Musaa, wi tas nik wiŋ Ilyas. »
6 Piyeer woyiɗ ineem laam a inhisseeɗi in ci a na woye sagu tiita ɓa tiite ; a yi na taalubeeci kanak ci.
7 Eel hayya muurra ɓa, hooso kerhukka ŋ eela an : « Yii, a yi Kuɓkiŋ ngo ŋ waaɗ keeh-keeh, sikɗukaat ɗe. »
8 Jaarra taalubeeca marakka ini wil ndaam jen, ɓa hotisɗi ali ɓo' na ɓa, ɗal Yeesu kiik ce.
9 Wa ɓa ruhsee tangoora, Yeesu dennga ɓa an : « Kinaat naandsuk ali ɓo' ini ɗu hot po mbaɗna Kuɓkiŋ ɓoyi hultan. »
10 Ɓa ammba woo keem te ɓa woyeeɗa ŋ harmban ɓa an : « A waaɗ ye woo ŋ hulit ? »
11 Ɓa meekissa ɗe ne : « Wa ye tah jangɗohoh ciŋ waasiŋ Musaa woyee ne Ilyas joyiɗ hayis paaɗ ? »
12 A loffa ɓa ne : « Ɓo' miniɗ woo ne e Ilyas joy hay paaɗ ne a doknoh in ci jen po ca yurah, waaye kinaat alkoh ne, Fiis ci Hooliɗ ci namiɗ woo, ŋ ini kaɗ ŋ Kuɓkiŋ ɓoyi, ne a joyiɗ yaaɓ laayiɗ te a sangu.
13 Waaye mi na woyee ɗu ne Ilyas hayiɗ po ɓooɓi tumiɗ ɗe ini neɓ ɓa findi Fiis ci woyohee wa. »
Yeesu saɓsohiɗ kuɓka na jiinnda muumɗohe
14 Wa ɓa kaɗ po ɓa reyeeɗa ŋ taalubeeca ɓinooɓa, ɓa hotta mboolo yakak wiliɗ ɓa, jangɗohoh caŋ waasiŋ Musaa taastiɗoheeɗa na ɓa.
15 Mboolnda hotta Yeesu, ɓa feyuusa. Jaarra, ɓa yurahha nga ɗe na mbup, ɓa kañiɗta ɗe.
16 A meekissa ɓa ne : « Ɗu na taastiɗohee ye na ɓa ? »
17 Ƴaar ŋ mboolnda woosa ɗe ne : « Jangɗohohi, ŋ komee ɗa kuɓkiŋ ngo ƴaari, a jiini muumiɗ ɗe.
18 Ɗisik nu a amboh ɗe ɗah, a na folee ɗe ŋ ndaam, nguɓiŋ ɗe soñe, a ɗoɓɗohee sis ciŋ ɗe, a jaaɗ. Ŋ kiimiɗ taalubeeciŋ ɗa ne ɓa aañ jiinndi, waaye ɓa minɗaa. »
19 Yeesu woosa ɓa ne : « Ɗu ɓi ɓooɓi woti-woti e ɗu kosaaɗi ; ŋ nikan nik na ɗu, ŋ muñɗee ɗu po kiɗa ? Komaat to ɗe ndii ! »
20 Ɓa kommba ɗe ɗe.
Wa jiinnda hot Yeesu rek, a yoondiɗta kuɓka, yeem keennda, walañkeeɗa ŋ kehƴi, nguɓiŋ ɗe fuureeɗa.
21 Yeesu meekissa baabiŋ ɗe ne : « Inii rahas ɗe kiɗa ? » Yeem loffa ɗe ne : « Ina a nikoh komaaki poyi.
22 In laayiɗ, jiinndi na hiiree ɗe ngaŋ keen ŋ yongkaah mbaa ŋ masuɓ ne a boom ɗe ; kon fu min in nga ɗah, ɓoo miskaat ɗa, fu ɓaatɗoh ɓoo. »
23 Yeesu loffa ɗe ne : « Ŋ min in nga ɗah i ? Raakɗi ini minukɗi ngaŋ ɓoyi kos. »
24 Jaarra baab ɓi kuɓka woosa ŋ ɗafka ne : « Ŋ kosiɗ ! Ɓaatɗoh ho ŋ ini tas ŋ kosi ŋ kos ! »
25 Yeesu hotta ne mboolo laayiɗ wa ɗii ar nangɗukoh, a ngassa jiinnda an : « Ñam woo ne, pula ŋ kuɓkii te kinaa ɗe aasis, fu yi jiinndi na ɗikɗohe, muumɗohe ! »
26 Jiinnda pulla kuɓka, a ambsohhaa na sesoh na yoondiɗ ɗe keeh-keeh. Kuɓka mannda na ɓoyi kaan, po laayiɗ woyeeɗa ne a kaaniɗ.
27 Waaye Yeesu ammba ɗe ŋ yaah ne a kuruk ; a kurukka.
28 Wa Yeesu aas kahna, taalubeeciŋ ɗe ɗaayya na ɗe, ɓa meekissa ɗe ne : « Wa ye tah po ɓoo minɗi aañ jiinnda ? »
29 A loffa ɓa ne : « Jiini mand na yeem, a kiim Kooh dong na tahee ɗe coot. »
Yeesu woyissiɗ ŋ kakaan kiŋ ɗe
30 Wa ɓa puloh ndaam, ɓa lahha ŋ ɗooƴ Galile. Yeesu waaɗeeɗi ne wa inhu,
31 a nikee jangɗeeɗa taalubeeciŋ ɗe ne : « Kuɓkiŋ ɓoyi hey degse ŋ yaah ciŋ ɓooɓi, ɓa ap ɗe, a hulit ŋ neeha kaahayɗoh. »
32 Waaye taalubeeciŋ ɗe inheeɗi ini woo keem tokis te ɓa kaañeeɗi ɗe meekis.
Ya ɓa kilifa ?
33 Wa ɓa ree Kapernawum po ɓa nikka ŋ kahna, Yeesu meekissa taalubeeciŋ ɗe ne : « Ɗu taastiɗohee ye ŋ waas ? »
34 Ɓa ɗekka teɗ ; raak ɓa taastiɗohee ya ɓa uup nik kilifaani nga ɓa.
35 A ɓooffa, a ɓeeɗukka ndaŋkiyaah na kanak ci (12), a woosa ɓa ne : « Ɓo' nu waaɗ nik kilifa ɗah, a teyɗukaat mirndoh, te a teyɗuk nik surgaaniŋ ɓi tas jen. »
36 A ɓayya komaaki a tufkiɗta ɗe ŋ leerooɓa, a morgiɗukka ɗe, a woosa ne :
37 « Ɓo' nu teyɗuk njaanjii saguuso ɗah, a teyɗuk ko. Ɓo' nu teyɗuk ko ɗah, fu teyɗuk ko haa, fu teyɗuk Yi woos so. »
Ɓoyi sangɗi ɓoo hun na ɓoo
38 Saaŋ woosa ɗe ne : « Jangɗohohi, ɓoo hotiɗ ɓo' aañeeɗa jiiniici ŋ tiikiŋ ɗa te a ɓaahɗi nga ɓoo. Tahha po ɓoo woosa ɗe ne a kinaata tumis. »
39 Yeesu woosa ɗe ne : « Kinaat ɗe wa sangoh, laam ali ɓo' minɗi haɓiɗ in feyohiɗ ŋ tiikiŋ ngo po ƴut, jaar a woyee in moɗaaɗi nga so.
40 Ɓo' nu sangɗi ɓoo ɗah, a hun na ɓoo.
41 Ɓo' nu on ɗu pot masuɓ ne ɗu an sagu ɓaahi ɗu ɓaah ŋ Mucɗohi Gapohse ɗah, ñam na woyee ɗu wa te wa keeh, ɓoyeem ñakanɗi aafu nga.
42 Waaye yaa nu bakaaɗɗukoh yino ŋ komaakci ƴin ci kos so ɓii ɗah, ini hee ngisohe nga ɗe, weɗ ne a toku atoh ɓitiɗ ŋ mbooh, a njafu ŋ cookma.
Penduk bakaaɗ
43 Yaahiŋ ɗa waaɗ ɗa ɓek ŋ bakaaɗ ɗah, nguɗaa, fu tas yaah yino ; laam fu aas ŋ kipes ki na yaah yino, weɗ ngisoh fu kaɗ na yaah ciŋ ɗa kanak ci ŋ yongkaaha heyɗi ƴime. [
44 ]
45 Kotiŋ ɗa waaɗ ɗa ɓek ŋ bakaaɗ ɗah, nguɗaa ; laam fu aas ŋ kipes ki na kot yino, weɗ ngisoh fu njafu na kot ciŋ ɗa kanak ci ŋ yongkaaha yakka. [
46 ]
47 Te hasiŋ ɗa waaɗ ɗa ɓek ŋ bakaaɗ ɗah, luhtaa ; laam fu aas ŋ Nguuriŋ-Kooh na has yino, weɗ ngisoh fu njafu na has ciŋ ɗa kanak ci ŋ yongkaaha yakka.
48 Cangind ca na ñame faan ndaam na kaaneeɗi te yongkaaha na ƴimeeɗi.
49 Ɓo' nu nga ɗah, hey jemɗasse na yongkaah.
50 Meɗa, wa in baahiɗ, waaye meɗa kaɗ po wa jemisɗi ɗah, wa min jemɗohissu na ye ? Raakaat meɗa ŋ ɗooƴ ɗu te ɗu pesohee jam ŋ harmban ɗu. »