Kalata ya citatu ya
Yohane
Busansulishi
Kalata yacitatu ya Yohane ya lalembwa ne mutumwa Yohane mucaka ca (90 A.D.) Yohane nkalisansululeti ewalalemba kalata iyi sobwe, nomba walikuwa eti ni mutangunishi wa mubungano 3 Yohane 1:1 Walensa cimo cimo mukalata yacibili ya 2 Yohane 1:1 Cilabonekengeti Yohane ewalalemba Mulumbe Waina wa Yohane ne makalata onse atatu. 1 Yohane, 2 Yohane, ne 3 Yohane mpwalikuba ku Efenso.
Mitwi ya makani
Yohane lasansululunga kalata iyi 3 Yohane 1:1
Yohane layuminishinga Gayo ne kumwambileti atambulenga bensu bamakwetu mulushomo 3 Yohane 1:2-8
Cakukonkapo lambanga sha batuloba babili, Diyotelefe ne Demetiliyo 3 Yohane 1:9-12
Lapwililishinga kalata 3 Yohane 1:13-14
1
1 Ame mutangunishi ndamulembelenga muname Gayo ngondasunishisha.
2 Wasunika, ndasengenga kwambeti bintu byonse bikwendele cena, kayi ne kwambeti ubenga ne buyumi mbuli ncondicinshi kwambeti uli cena mu mushimu.
3 Pakwinga ndalasangalala kwine pacindi bashoma banetu mpobalesa akungambila mbuli ncowashoma pakukonkela cakubinga.
4 Paliya cintu nacimbi cikute kunkondwelesha capita makani akunyumfwa kwambeti bana bame balekalanga mu cakubinga.
Gayo lalumbaishiwanga
5 Owasunika, washomeka pa mulimo ngokute kwinshila bashoma banobe kayi ne bensu.
6 Bashoma aba balambila mubungano wakuno mbuli ncowalabanyamfwa mu lusuno. Neco ulenshinga cena kubanyamfwa munshila yeshikukondwelesha Lesa kwambeti bapitilishe pa bulwendo bwabo.
7 Pakwinga balatatika bulwendo bwabo pacebo ca Klistu ne kukana kutambula lunyamfo kufuma ku bantu bakunsa.
8 Neco afwe bashoma twelela kubanyamfwa bantu aba kwambeti tusebensele pamo mu mulimo wa kukambauka cancinencine.
Diyotilefe kayi ne Demitiliyo
9 Ndalalembamo maswi ang'ana mukalata yalatumwa ku mubungano, nsombi Diyotilefe uyo lalipanga butangunishi nkalayandanga kunyumfwila.
10 Neco na nkese, ndakayubululunga byonse mbyalenshinga. Lepishinga lina lyakame kayi ne kumbepeshela. Kayi ntebyo ibyo byonka, nsombi nkalayandanga kayi ne kutambula bashoma kayi lakanishinga abo balayandanga kubatambula nekubatandanya mumubungano.
11 Wasunika, kotakonkanga byaipa nsombi byaina. Pakwinga uliyense shikwinsa byaina ni wa Lesa, uliyense lenshinga byaipa nkalabona Lesa.
12 Uliyense lapanga bukamboni bwaina pali Demetiliyo, pakwinga cancinenccine cilapanga bukamboni bwaina pali endiye. Kayi ne bukamboni bwetu, pakwinga ucinshi kwambeti tulambanga cancinencine.
Maswi akupwililisha
13 Nkute bingi byakukwambila, nsombi nkansuni kubilemba mu kalata sobwe,
14 Ndayeyenga kwisa kwambeti tukabandike nkatuli twalangana.
15 Lumuno lube ne njobe, banobe balikuno balakupanga mutende. Ubape mitende banetu bali uko bonse, umo ne umo.