Libuku lya
Kuyubulula
Busansulushi
Libuku lya Kuyubulula elibuku lyakupwililisha mu Cipangano ca Linolino. Lyalapwishiwa kulembwa mu caka ca makumi asanu ne ana ne byaka bisanu panyuma pakusemwa kwa Yesu (A D 95) Ne Yohane Mutumwa Kuy 1:1 kayi eumo umo walalemba Mulumbe Waina wa Yohane ne makalata atatu a 1 Yohane, 2 Yohane ne 3 Yohane.Yohane walikuba weshibikweti “Ngwalikuyandishisha Yesu” Yoh 13:23 Walalemba libuku ili pacindi ncalikuba pa nsumbu ya Patmo nkwalikuba wasungilwa cebo ca kukambauka Mulumbe Waina ulambanga sha Yesu Klistu. Kuy 1:9.
Cintu cinene ncalalemba mulibuku lya Kuyubulula ni cakubayuminisha balabelengenga kwambeti bapitilishe kushoma muli Yesu Klistu, ne kubapa kupembelela pakwinga kubwela kwa Yesu kuli pepi 1:3, 22:7 Walalembela baklistu bonse, kayi ne ku mibungano isanu ne ibili yabashoma njalashumbula maina mu cimpansha ca 2-3. Yohane lakwambanga kulemba kwakendi mwine kuba maswi abushinshimi Kuy 1:3 kayi lasebenseshenga mikoshano ingi ne bimbonimboni mbyalabona. Libuku ili lyakoshanako kumbasu nashimbi sha mu Cipangano ca Kaindi, makamaka Sekaliya 6:1-8. Tolompita shisanu ne shibili, ne Indilo shisanu ne shibili shakoshana ne malwashi Lesa ngwalabasubula nawo Bainjipito, Kul 7-9 Kuyubulula kulambangaponga sha mapwililisho a cindi nceti akese Yesu kwisakukoma, ne kwisa kumanta bonse bashoma mulyendiye kwambeti bakekale nendi kwamuyayaya, Kamulekani libuku ili limucenjeshe nekumupa kupembelela kwa kwambeti Yesu lesanga linolino.
Mitwi yamakani
Yohane latatikinga kulyamba mwine kwambeti niyani, kayi ne mwalatambwila cimboni mboni cabushinshimi 1:1-20
Lapanga mulumbe kufuma kuli Yesu ulenga ku Mibungano isanu ne ibili 1:1 mpaka 3:22
Kayi lambanga sha indilo bisanu ne bibili, ne Tolompita asanu ne abili 8:6 mpaka 11:19
Panyuma palibi, Yohane lambanga sha nkondo ya Mwana mutuloba kulwana ne cishinshimwe ca mitwi isanu ne ibili 12:1 mpaka 14:20
Kayi lalembenga sha Indilo shisanu ne shibili shabukalu bwa Lesa 15:1 mpaka 16:18
Cakonkapo Yohane lambanga sha Lesa mweshakabakomene balwani bakendi Kwilu 17:1 mpaka 20:15
Cakupwililisha lambanga sha Kwilu kwalinolino ne cishi capanshi ca linolino ico cilakesanga kumapwililisho 22:21
1
1 Mu libuku ili muli bintu Lesa mbyalayubulwila Yesu Klistu kwambeti ambile basebenshi bakendi, bintu byela kwinshika ca lino lino. Neco Klistu walatuma mungelo wakendi kuya kwambila Yohane musebenshi wakendi.
2 Yohane walamba byonse mbyalabona bilambanga sha mulumbe wa Lesa ne cancinencine ncalayubulwila Yesu Klistu.
3 Ukute colwe muntu labelengenga maswi abushinshimi ali mu libuku ili, kayi bakute colwe bantu balakutikinga maswi ne kwasunga. Cindi ca kwambeti bintu bitatike kwinshika cilipepi.
Milumbe ku mibungano isanu ne ibili
4 Njame Yohane, ndalembelenga mibungano isanu ne ibili ili mu cimpansha ca Asiya. Luse ne lumuno kufuma kuli Lesa uyo walikubapo, ulipo kayi uyo lesanga, bibe ne njamwe. Luse ne lumuno kufuma kumishimu isanu ne ibili ili ku Cipuna ca Bwami bwa Lesa bibe ne njamwe.
5 Kayi luse ne lumuno kufuma kuli Yesu Klistu, kamboni washomeka bibe ne njamwe. Yesu emutanshi kupunduka kubafu walakoma lufu, endiye lendeleshenga bami ba pacishi capanshi. Walatusuna netulubula ku bwipishi ne milopa yakendi.
6 Nendi latubiki kuba bami ne beshimilumbo beshikusebensela Lesa, Baishi. Yesu Klistu apewe bulemu ne ngofu lelo ne masuba onse, Ameni!
7 Kamubonani, lesanga mumakumbi, uliyense nakamubone, ne bonse balamuyasa.Bantu bonse pacishi capanshi nibakamulile.Neco kacikabani motepelomo.
Kamubonani, Yesu lesanga pamo ne makumbi. Bantu bonse nibakamubone, naboyo balikumuyasa nibakamubone. Bantu bamishobo yonse pacishi capanshi nibakalile cebo ca endiye. Ee, ici nicikenshike! Ameni.
8 Mwami Lesa wa ngofu shonse, uyo walikubako, ulipo kayi uyo lakesanga. Lambangeti, “Ame njame citatiko kayi njame mapwililisho.”
Yohane labononga Klistu mu cimbonimboni
9 Njame Yohane washoma munenu, tulapengenga cebo ca Yesu Mwami wetu, uyo latupanga ngofu sha kupita mu mapensho. Ndalabikwa pa nsumbu ya Patimo cebo ca kukambauka mulumbe wa Lesa, ne cancinencine ico ncalayubulula Yesu.
10 Pa busuba bwa Mwami, Mushimu Uswepa walamfukata, kayi ndalanyumfwa maswi akompolola kunyuma kwakame, alikunyumfwiketi kulila kwa tolompita.
11 Kambeti, “Kolemba mulibuku bintu mbyolabononga, kayi watume ku mibungano isanu ne ibili ku Efenso ku Simuna ku Pegamo ku Tiyatila ku Salidisi ku Filadelufiya ne ku Lawodikeya.”
12 Mpondalacebuketi mbone walikwamba ne njame, ndalabona pakubika malampi asanu ne abili a golide.
13 Pakati pa byakubikapo malampi asa, palikuba naumbi walikuboneketi Mwana Muntu, walikuba wafwala mwinjila utali washika ku myendo kayi walikuba walikobeka cikwisa ca golide pa cali.
14 Mishishi ya kumutwi wakendi yalikuba tuu eti buluba, nambi eti mapepe ankobokobo, menso akendi alikuboneketi makalangasha a mulilo.
15 Myendo yakendi yalikubeketi cela cilafukutwanga pa muba, kayi maswi akendi alikunyumfwiketi kuwota kwa menshi angi.
16 Mucikasa cakendi cakululyo, walikuba wekata nyenyenshi shisanu ne shibili. Kayi mu mulomo wakendi, mwalafuma cibeshi calumata konse konse. Pa cinso cakendi palikubangileti lisuba lyanga pelu pa mutwi.
17 Mpondalamulangishisha, ndalawa panshi kumwendo yakendi eti muntu lafu. Neye walabika cikasa cakendi pali njame ne kwambeti, “Kotatina! ame njame citatiko ne mapwililisho.
18 Ndemuyumi! Ndalikuba wafwa, nomba lino kamubonani ndemuyumi kucindi camuyayaya, kayi nkute ngofu pa lufu ne pabantu bona mucishi cabafu.
19 Kolemba bintu mbyolabono, bilenshikinga pa cino cindi kayi ne byeti bikenshike kuntangu.
20 Lino ndapandululunga bintu mbyowabulanga kwinshiba cena, nyenyenshi shisanu ne shibili nshewalabona ku cikasa cakame ca ku lulyo, kayi ne pakubika malampi pasanu ne pabili a golide. Nyenyenshi shisanu ne shibili ni batangunishi ba mibungano isanu ne ibili, kayi pakubika malampi pasanu ne pabili a golide ni mibungano isanu ne ibili.”
Maswi ku mubungano wa ku Efenso