7
Baislayeli bali 144,000
1 Mpobyalapwa ibi ndalabona bangelo bana kabali bemana mu mbasu shina sha cishi ca panshi, kabakanisha lukupwe mu mbasu shina eti kalutonda pa cishi, nambi pa lwenje nambi pa citondo cili conse.
2 Kayi ndalabona naumbi mungelo wali kufumina kucwe kakute cidindo ca Lesa muyumi. Walompolola ku bangelo bana basa, Lesa mbwalapa ngofu sha kononga cishi ne lwenje.
3 Mungeloyo walambeti, “Kamutononga cishi, nambi lwenje nambi bitondo, nanshi tudinde cishibisho pankumo pa basebenshi ba Lesa wetu.”
4 Neco ndalambilweti cibelengelo ca bantu baladindwa cishibisho ca Lesa pankumo, bali bina mwanda umo ne makumi ana nebina bina (144,000). Aba balafumunga mu mikowa likumi ne ibili ya ba Islayeli.
5 Bina likumi ne bibili (12,000) Mu mukowa wa Yuda,
bina likumi ne bibili mu mukowa wa Lubeni,
6 bina likumi ne bibili mu mukowa wa Gadi.
Bina likumi ne bibili mu mukowa wa Aseli,
bina likumi ne bibili mu mukowa wa Nafitali,
bina likumi ne bibili mu mukowa wa Manase.
7 Bina likumi ne bibili mu mukowa wa Shimoni,
bina likumi ne bibili mu mukowa wa Levi,
bina likumi ne bibili mu mukowa wa Isakala.
8 Bina likumi ne bibili mu mukowa wa Sebuloni, bina likumi ne bibili mu mukowa wa Yosefe, kayi
ne bina likumi ne bibili mu mukowa wa Benjameni.
Likoto linene litabelengeke
9 Mpobyalapwa ibi ndalabona likoto linene, muntu ndyela kubula kukonsha kulibelenga! Lilafumunga mu bantu ba nkanda shapusana, ne mishobo ne bishi kayi ne milaka, kabali bemana ncili pantangu pa cipuna ca Bwami ne pantangu pa Mwana Mbelele. Kabali bafwala minjila ituba kayi kabali bekata misampi ya tukunka mumakasa.
10 Balompololeti, “Lupulusho lulafumunga kuli Lesa wetu, wekala pa cipuna ca Bwami kayi ne ku Mwana Mbelele!”
11 Bangelo bonse balemana ncili, kushinguluka Cipuna ca Bwami pamo ne bamakulene ne bya buyumi bina. Balasuntama ne kukotamika binso byabo pantangu pa Cipuna ca Bwami ne kukambila Lesa kabambeti,
12 “Ameni! Kushikaishiwa, ne bulemeneno ne mano ne kulumbaisha ne kulemekesha ne bwendeleshi kayi ne ngofu bibe kuli Lesa wetu kwa muyayaya! Ameni!”
13 Umo pa bamakulene basa walanjipusheti, “Inga bantu bafwala minjila ituba aba nibani, kayi balafumunga kupeyo?”
14 Ndalamukumbuleti, “Nkambo njamwe mucinshi cena.”
Neye walambeti, “Aba ebantu balapiti mu makatasho atambiki. Ebalacapa ne kuswepesha minjila yabo mu milopa ya Mwana Mbelele.”
15 Encebemanina ku Cipuna ca Bwami bwa Lesa
ne kumusebensela munshi ne mashiku mu Ng'anda yakendi.
Wekala pa cipuna ca Bwami
nakekale nabo ne kubacinjilisha.
16 Nteti bakanyumfwepo nsala nambi nyotwa,
nambi kupya ne lubela lwakulungula lwa lisuba.
17 Pakwinga Mwana Mbelele
uli pakati kati pacipuna ca Bwami
nakabe mwembeshi wabo.
Nakabatangunine ku nsansa netulonga twa menshi eshikupa buyumi.
Lesa nakabapukute misonshi yonse pamenso pabo.