21
Baolo Yelusalende Echizho
1 Bijien hhelase likai giedene chon souzhi zhijie Geshide kuruwo. Khuichudu Lojide kurudene hhense Padalade echiwo.
2 Hhende nie Feiniji echiku chonyi penjidene chon jiere khirei yozhi qiiwo.
3 Ingie Saipulusiyi chanla soghei miende jiedene Xiliya fanxiande yozhi Tuilode kuruwo. Chon hhende ho xiine giezho.
4 Bijien hhende ezighan tujilai ereizhi oludene doludu souwo. Hhela Shenlinyi kouizhi Baolode Yelusalende bu khirei giezhi kieliewo.
5 Doludu daodene bijien yozhi qiiwo. Hhela bierei, kesilarene man bijienyi khughozhi chenshi ghadane ireghawo. Bijien haibienzide xiutulie onxian giedene
6 nieniedene feixin kieliewo. Bijien chon jiere khireise hhela gieladene khareiwo.
7 Bijien izhi chon souzhi Tuilose Dolimaide kuruwo. Hhendedu gaijiulade kielien asazhi hhelare niudu souwo.
8 Khuichudu bijien hhense likai gie Kaisaliyade iredene gouxioxi chonjisan Feilii giede oro hhere hhantu souwo. Hheshi dolon kun dundadu nie wo.
9 Hhende uye dafalasan jieran oqin wine. Hhelade Hudai kielien kielieku nenli wine.
10 Bijien hhende ezighancha souse Yudayase nie xienzhi bouzhewo. Niereini Yajiabu giene.
11 Bijienyi enende iredene Baoloi pixiei bareizhi goya kha, konne banladene kieliewo, "Shenlin ingiezhi kieliezho, 'Yutai kunla Yelusalende ene pixieni ezhanyi ingiezhi banladene niman kunlade jiuizhi ogine.'"
12 Bijien ene kielienyi chenliedene hhe oronyi kunlare Baoloi Yelusalende bu khirei giezhi hende danlazho.
13 Ingie Baolo kieliewo, "Ta yale ingiezhi wilazhi mii zhughei ghalughane? Bi Ezhan Ersade oluzhi kunla mii banlazhi pse Yelusalende fugughaliuzhe bi zhunbei gie goudazho."
14 Bijien Baoloi kieliezhi dao dase yama ese giedene zinie "Ezhanyi isi mutun gholu gie." giezhi kieliewo.
15 Giedudu daodene bijien zhunbei gie Yelusalende khireiwo.
16 Kaisaliyani giedun tujilaye bijienre hhantu echiwo. Hhela bijienyi uduruzhi Nasun giesan nie Saipulusi kunyi giede echiwo. Hhe tuji danlazhi oloncha olune.
Baolo Yagebui Uzhele Echizho
17 Yelusalende kuruse gaijiula bijienyi bayasuzhi jienliewo.
18 Khuichudu Baolo bijienre hhantu Yagebui uzhele echiwo. Zhanlaolaye man hhende wine.
19 Baolo hhelade kielien asadene Huda hhei niman kunlai dunda gieghasan wilielai nienieji kieliezhi ogiwo.
20 Hhela chenliedene Hudai kuaizhi Baolode kieliewo, "Gaijiu, chi mejiene. Ezhanyi xianxin giesan Yutai kun hao jiwon wine. Hhela Musani guijinde chighara no wo.
21 Hhela chenliese chi sughazhi niman kunlai dundadedu soyuji Yutai kunlai Musai guijinni bu zunjizhi ga kewosilade hetoune bu giegha giezho. Pse hhelai xigonni bu dagha giezho.
22 Ede matugiene? Kunla chi enende iresei mejiene.
23 Chi zhao bijienyi kielien mutun giele echi. Bijienyi enende jieran kunla kielien yenji jiezho.
24 Chi hhelare hhantu echizhi waghaku xigonghala hhantu wagha. Hhelai qiorun duliku baerni chi ogi. Ingiese hhela chenliesanshi zhenni pusho bikui, pse chi Musai guijinni zunjisei dajiala mejiene.
25 Bijien Ezhanni xianxin giesan niman kunlade nigiedade teisan, chusun, lei alasan, lon kijieku enelase gholodo giezhi jiejin giedene xin huaiwo."
26 Ingiese Baolo hhe jieran kunyi uduruzhi khuichudu waghaku xigonghala hhelare hhantu waghawo. Ingie mechide orodene hhela waghazhi baluku udui, pse jien kun Hudade mure ogiku uduni tunzhi giewo.
Baoloi Mechide Bareizho
27 Hhe doludu barane giekude Yaxiyase iresan Yutai kunla Baolo mechide bikui chanladene olon kunlai man shanjizhi Baoloi barei agiwo.
28 Ingie waradazhi kieliewo, "Isilie kunla, bijiende ishula! Ene kun gochude toreizhi jien kunlade mai kun, guijin, mechii fandui giezhi sughazho. Hhe da niman kunlai uduruzhi mechide oro ene zhiguitu oronyi zannanshighawo."
29 Hhela ingiezhi kieliekushi Ifuso kun, TelofeimoBaologhala chenshide bisei chanlasenu Baolo hhei mechide uduru orowo giezho.
30 Nie chenshi man londazhi bexinla holu ire, Baoloi barei agidene mechise lai khireighawo. Ingie mechini wijienyi deigo kha jiewo.
31 Kunla zhen Baoloi alane giekude buduilani qienfuzhande Yelusalen nie chenshi man londawo giezhi huibao giewo.
32 Ingie qienfuzhan deigo budui, giedun baifuzhanlai uduru holuzhi hhelai hhende bouwo. Hhela qienfuzhan, buduilai chanladene Baoloi eghiku beiwo.
33 Ingie qienfuzhan melie echi Baoloi barei agidene fenfulazhi ghua qieshenghala sozila giezho. Ingiedene, "Hheshi kien wine, yan shiqin giezho?" giezhi asazho.
34 Niezhan kunla ingiezhi onghonone, niezhan kunla qingiezhi onghonone. Ingiezhi noise qienfuzhan yan shiqin bikui mejie da, Baoloi laidene buduila sousan loude echi giezhi fenfulawo.
35 Louqi konde irese olon kunla hende jigheidazhi eghine giese buduila zinie Baoloi qienlie daowo.
36 Kunla khuina daghazhi, "Hhei ala!" giezhi waradazho.
Baolo Goyane Huiizho
37 Baoloi buduila sousan lou sudoro lai orone giekude Baolo qienfuzhande asawo, "Bi chade nie aman kielien kieliese olunulie?" Hhe kieliewo, "Chi Xila kielien kielie mejienu?
38 Chishi hhe oloncha daolon giedene 4000 shashoui uduruzhi hontande echisan hhe Aiji kun pushoba?"
39 Baolo kieliewo, "Bishi Yutai kun wo. Jilijiani nie minshentu chenshi Dashuni hukouni bareizho. Bi chii xiahua gieye, mii bexinlade nie kielien kieliegha."
40 Qienfuzhan tunyi oluse Baolo louqi jiere beidene bexinlade nie kha zhadeighase shenqi widawo. Ingiese BaoloXibolai kielienghala kieliewo.