2
Shizijia Jiere Ghadasan Mexihai Chonjizho
1 Gaijiula, eqighandei bi tai hhende echizhi Hudai mimii chonjikude seighan kielien, aghelighala ese giezho.
2 Bi tai dunda bikude zinie Ersa Mexiha, pse hhei shizijia jiere ghadasanse chugo psedulai ulie mejiene giezhi jiejin giewo.
3 Bi tai hhendeshi zholien, ayi, hende pugharazho.
4 Bi kieliezhi chonjikude seighan, aghelitu kielienghala ese giezhi Shenlinni nenlighala zhenmin giezho.
5 Ingiese tai xianxin gieku kunni aghelide ese kouizho, Hudai nenlide kouizho.
Hudai Agheli
6 Ingiezhoma, xinyan jiere qiendasan kunlade bijien aghelini jianjizho. Eneshi duyai agheli pusho, duyai qienlini bareizhi widachen kunlai agheliye pusho.
7 Bijien jianjisanshi eqighandei niuighasan Hudai mimitu agheli wo. Eneshi Huda duyai zhayaghaku melie matande famai ogine giezhi jinjisan wo.
8 Ene aghelini duyani qienli bareichen kunla dunda mejiechen nieda uwo. Hhela mejiezhoshi famatu Ezhanyi shizijia jiere ulie ghadane.
9 Jinwun jiere jilasan mutun,
"Hudade oresan kunlade Huda zhunbei giesanshi
nudunghala uzhezhi ese daosan wo,
chighinghala chenliezhi ese daosan wo,
kunni zhugheye sumulazhi ese daosan wo."
10 Ingiezhoma, matande Huda Shenlinni tungo giezhi mejieghawo. Shenlin yanniliuzhe mejiene, lien Hudai chijia isiniye mejiene.
11 Kunni sudorodu ruhherse chugo kunni shiqinni kien mejiene? Niekielien wo, Hudai Ruhherse chugo Hudai shiqinni kiema mejie dane.
12 Matan jienliesanshi duya jieredu ruhher pusho, Hudase iresan ruhher wo, ingiese Huda matande ogisan nenjienlai matan mejiene.
13 Bijienye enelai jianjikude kunni agheli sughasan kielienghala ese giezho, Shenlin sughasanghala giezho. Ruhhertu shiqinlai ruhhertu kielienghala mejieghane.
14 Hudai Ruhher uwotu kunla Hudai ruhher ogisanlai jienlie dane. Hhela enei ben wo giezho, ye dunjire dane. Ene shiqinlai zinie ruhherghala uzhe khizhene.
15 Ruhhertu kunla yan shiqinniliuzhe uzhe khizhenema, kiema hhelai uzhezhi khizhe dane.
16 "Kien Ezhanyi zhughei mejiene?
Kien hhende surughane?"
Mai kieliese matande Mexihani zhughe wine.