Xibolai Kunlade Huaisan Xin
1
Huda Kewonne Tungo Giezhi Kieliewo
1 Gushihoude Huda xienzhilai tungo giezhi mai xienrenlade haojihui, olon banfaghala kieliewo.
2 Duya baraku ene xienzide kewonne tungo giezhi matande kieliewo. Huda hhei soyujilai jienliechen kun danlaghawo. Da hhei tungo giezhi alanni zhayaghawo.
3 Hheshi Hudai famatui faighachen gon wo. Hudai xinbinni onqiende daibio giezho. Nenlitu kielienghalane yanyanjilai gonjizho. Mai zuini ganjinraghadene undu, fugietu Hudai borun miende souzho.
4 Hhe jienliesan niere qienxienlani nierese fama wo. Ingiezhi qienxienlase undudawo.
Hudai Kewon Qienxienlase Hen Wo
5 Huda alinie qienxiende,
"Chishi mii kewon wo.
Enedu bi chade ada danlawo."
giezhi kieliezhi daozho?
Pse,
"Bi hhende ada danlane.
Hhe made kewon danlane."
giezhi kieliezhi daozho?
6 Pse Huda fugie kewonne duyade ireghakude,
"Hudai qienxienla, man hhei beii."
giezhi kieliezho.
7 Huda qienxienlani kieliese,
"Huda qienxienlane kei gholughazho,
hojilane khan gholughazho."
giezhi kieliezhoma,
8 kewonne kieliese,
"Huda, chii baozoshi chanqi izhiku wo.
Chi gundannighala goyane gojiani gonjizho.
9 Chi gundannide xiqi wo, doghunnii henjizho.
Ingiese Huda, yeshijiu chii Huda chade bayasukui ogizhi
hhantu kunlase daoghawo."
giezho.
10 Pse kieliezho,
"Ezhan, dei qiikude chi zeminde jichu giewo.
Asimanyiye chi khaghalane giewo.
11 Zemin, asiman widanema, chi izhi wine.
Hhela man jien mutun khuichenrane.
12 Chi hhelai jien mutun horo agine.
Hhela jien mutun bienjinema,
Zinie chi niekielien wo.
Chanqi amiturane."
13 Huda alinie qienxiende,
"Bi duitoulaichii kon dourachii teitula
chi mii borun miende sou."
giezhi kieliezhi daozho?
14 Qienxienlashi man zinie ushilachen ruhher wo. Huda peidene jiuikuni jienliene giesan kunlai ushilaghachen wo.