10
1 Guijinshi jianlai ireku gounii xiujie wo, zhenzhenji yanzi pusho. Ingiese niehonnie niekielienji sidagha giekughala Hudai melie iresan kunlai jiedui hulunshigha dane.
2 Hulunshigha shidase libai giesan kunlai 1 huide ganjinraghazhi pse lianxinni zui wine giezhi ulie giene. Ingiese sidagha gieku eqighan ulie beinu?
3 Ingieliuzhe enezighan sidagha gieku niehonnie kunni zuini jila ireghane.
4 Jieniu, imanni chusun zuini widagha dane.
5 Ingiese Mexiha duyade irekude Hudade kieliezho,
"Sidagha gieku dunxi, murelai chi ese keredene
mii beyeni mure danlaghane giezhi zhunbei giewo.
6 Sideraghaku sidagha, shuiku
sidaghade chi xiqi uwo.
7 Ingiekude bi kieliewo,
'Huda, jinwun jiere mii zhiizhi huaisan mutun
bi chii isii giele irezho.'"
8 Jiere Mexiha kieliezhi "Sidagha gieku, mure, sideraghaku sidagha, shuiku sidaghani chi ese kerezho, xiqiye uwo." giezho. Enezighanshi guijin mutun ogisan wo.
9 Ingiedene kieliezho, "Uzhe, bi chii isii giele irezho." Ingiekushi hhe melieshikui widaghazhi khuinashikui chenjighane giezho.
10 Ene isi mutun Ersa Mexiha beyene 1 huide sidagha giezhi matanyi zhiguishighawo.
11 Jien buwala niudunie beidene wilie giezhi niekielienji sidagha giezhoma, eneghala zuini ibeizi widagha dane.
12 Zinie Mexiha 1 huide zui shuiku sidagha giezhi chanqi zoin khizheghazho. Ingiedene Hudai borun miende souzhi
13 hhei duitoulai hhei kon doura teitula sagheizho.
14 Hhe 1 hui sidagha giedene zhiguishisan kunlai chanqi hulunshighawo.
15 Shenlinye matande ganzhen beizhi kieliezho,
16 "Ezhan kieliezho,
Hhezighan udu daose
bi hhelare jinjiku yenjisanshi ingiezho,
Bi guijinne hhelai zhughede teizhi
sumulakudeni huaine."
17 Pse kieliezho,
"Hhelai zuini, mouxiennilai pse ulie jilane."
18 Enezighan zuini mienliese pse zuide sidagha gieku biyo uwo.
Hudai Melie Echiye
19 Ingiese gaijiula, matan Ersani chusunyi tungo giezhi fugie danzighala zui zhiguitu oronde oro shidane.
20 Hhe matande nie shini, amitu moni keighazhi sudorodu menlienzighun daoghawo. Ene sudorodu menlienzishi hhei beye wo.
21 Matande Hudai giede gonjisan nie famatu buwa wineshi
22 matai doghun lianxinni Ersai chusunghala arughazhi zhughei ganjinraghadene beyeni ganjin usughala waghase matan shixinji zhughe, khidunde xianxin giekughala Hudai melie echiye.
23 Matande dain giesan hheshi kekaotui wo. Ingiese matan chenren giezhi xiwon giesei ulie gojiolughazhi goude bareiye.
24 Matan nieniene dahoshen giezhi oreku, gounii giekui sumulaye.
25 Hhezighan ulie hhantulazhi gon olusan kunlai bu daghadene nieniedene surughazhi kieliezhi hhantulaye. Hhe udu chadashisei mejiese genjia ingiezhi gieye.
26 Matan zhendaoi mejiekui jienliesenu nanxighan zui fanjise pse shuiku sidagha uwo,
27 zinie ayizhi panjiku, pse duitoulai sideraghaku fugie khanni sagheizho.
28 Musai guijinyi fanjisan kunlai ghua, ghuran kun ganzhen beise ubali ulie xiizhi fugughanema,
29 Hudai kewonyi taizhi goyai zhiguishighasan yenjisan chusunyi yamacha ese teizhi nenjienni ogisan Shenlinni uru giesan kunlai, ta nie sumula, hhelai genjia gundude ulie fainu?
30 "Bouchoushi bi giekui wo, bi kharulune." Pse, "Ezhan bexinlane panjine." Enei kien kieliesei matan mejiene.
31 Chanqiku Hudai khade orose ayine.
32 Tai eqighandei gon zhouidene jiurezhi olon ku shouizhi rennai giesei sumula.
33 Niezheifa tai dajialai melie shizheghazhi heizho. Niezheifa qimutu kunnan shouisan kunlare lienshou gholuzho.
34 Hhezighan khasan kunlade ta ubali xiizho. Tai caichanlai kunla qianlakude ta bayasuzhi shouikushi goyade genjia gouni, chanqiku caichan bikui mejiene.
35 Ingiese ta fugie danzine bu benda. Intu zhughede fugie jianli ogine.
36 Ta Hudai isii gie baraghazhi dain giesei jienliene giese rennai gieku biyo wine.
37 Jinwun jiere, "Pse goujicha beise
irene giesan hhe irene, ulie udane.
38 Gou kunmi xianxin giekughala amiturane.
Khuina tuise bi hhende xiqi uwo." giezhi kieliezho.
39 Matanshi khuina tuidene widachen kun pusho, xianxin gieku bizhi jiuisan kun wo.