2
Jiuiku Nenjienni Meilade Bu Uzhe
1 Ingiese matan chenliesan daolini ijinyo genjia goude jilakuni wo. Pse daolise wirulane.
2 Qienxienlai tungo giezhi kieliesan kielien xiogo wine. Jien zui fanjizhi ese shunjisanlai man gundande faiwo.
3 Ingiese matan imekie fugie jiuikui yamacha ulie teise matugie faikuse andane? Ene jiuikushi Ezhan xien qinsi kieliesan wo, khuinashi Ezhanse chenliesan kunla matande zhenmin giewo.
4 Hudaye ghudureqi, fugie shiqin, yanyanji nenlitu shiqinghala, pse duranghalane kunlade ghughazhi ogisan Shenlinni nenjienghala hhantu ganzhen beiwo.
Mai Jiuichen Ersa Kun Gholuwo
5 Matan ede kieliesan jianlaiku duyani Huda qienxienlade jiuizhi ese gonjighazhoma,
6 jinwun jieredu nie oronde ganzhen beizhi kieliezho.
"Kunshi yan wo, chi dou hhende zhughe chilane?
Kunshi yan wo, chi dou hhei zhaogu giene?
7 Chi hhei zhanshi jiere qienxienlase boghonidaghawo.
Hhende fama, zhiguitu maghalai zhoghawo.
8 Soyujilai hhei kon doura shunjighawo."
Hhende soyujilai shunjighawo giese hhei uye shunjikui nieda uwoma, ede soyujila hhei shunjisei matan dou chanla dazho.
9 Matan chanlasanshi qienxienlase zhanshi jiere boghonidasan Ersa wo. Hhe fuguku kui shouidene fama, zhiguitu maghalai zhowo. Hudai nenjienghala jien kunlade oluzhi fuguzhi daozho.
10 Soyujilashi Hudade oluzhi, Hudai tungo giezhi bisan wo. Hhe olon kesilane famade udurukude shouku giekughala hhelai jiuiku touzi Ersai hulunshighase heshi wo.
11 Kunlai zhiguishighasan Ersa, pse hhezighan zhiguishisan kunla man nie Adase irezho. Ingiese hhe hhelai gaijiu giezhi uruse shizhekui uwo.
12 Hhe kieliezho,
"Bi gaijiuladene chii nierei chonjine.
Bi hhantulasan kunlai dunda chii doulane."
13 Pse kieliezho,
"Bi hhei kouine."
Pse kieliezho,
"Uzhe, bi, pse Huda made ogisan kesilare enende wine."
14 Ingiese kesilade beye biku mutun hhe goyaneye kunni beye gholuzhi fugukui tungo giedene fugukuni qienlii bareisan Ibilisii widaghawo,
15 pse hhezighan fugukuse ayizhi ibeizi hoji danlasan kunlai andaghawo.
16 Hhe shuhua qienxienlade banman ese giedene Iburaheimuni houdeilade banman giewo.
17 Ingiese hhe gofanmiende gaijiularene xianlitui gholuse indanji wo. Ingiekushi Hudai melie ubali xiichen, shixinji giechen zui fugie buwa gholudene kunlai zuini shuine giezho.
18 Hhei shouku giekughala shiizhi daozho. Ingiese hhe hhezighan shiisan kunlade banman gie shidane.