3
Ersa Musase Hen Wo
1 Ingiese Huda hhantu urusan zhiguitu gaijiula, matan xianxin giesan Huda peisan, zui fugie buwa Ersani goude sumula.
2 Hhe hhei peisan Hudade gieku Musa mechide shixinji giekughala niekielien wo.
3 Gie giesan kunde giese kuaikui olon mutun Ersade Musase kuaikui olon wo.
4 Gielade man giesan kun winema, soyujilai zhayaghasanshi Huda wo.
5 Musa Hudai gieni soyuji kunlade hoji danladene shixinde giezhi jianlai kielieku shiqinde ganzhen beizhoma,
6 Mexiha Hudai giede kewon danlazhi shixinde giezho. Matan danzine fugiedaghazhi panjisanne goude bareise matanshi mechi wo.
Hudai Bexinla Hhamuraku
7 Ingiese Shenlin kieliezho,
"Enedu ta Hudai shenqini sonosuse
8 hhe xienzide bexinla hontande Hudai shiizhi
Zodui gieku mutun
zhughene bu khiduzhegha.
9 Tai xienrenla bi 40 nien giesei uzhewoma,
yen hhende mii shiizhi kaoyen giewo.
10 Ingiese bi hhe idai kunlade hokuzhi kieliewo,
'Hhelai zhugheni chan miizhi
mii moni tani dane.'
11 Bi hokudene
hhela mii hhamurakude ibeizi oro dane
giezhi fayen giewo."
12 Gaijiula, ta xioxin gie, pse tai dunda niezhan kunla doghun zhugheghala xianxin ulie giedene chanqiku Hudase likai giene.
13 Shijienni enedu giezhi urukude niudunie nieniene surughazhi kielie, pse tai dunda niezhan kunlai zui miidene zhugheini khiduzheghane.
14 Matan dei qiikude xianxin giesanne zuihou kutula izhi xiacha giese Mexihare hhantu nexian jienliene.
15 Jinwun jiere kieliezho,
"Enedu ta Hudai shenqii sonosuse
hhela zodui gieku mutun zhughene bu khiduzhegha."
16 Hudai shenqii sonosudene hhere zodui giesanshi kien wo? MusaAijise uduruzhi khizhesan soyuji kunla pushonu?
17 Huda 40 niende kiende hokuzho? Hhezighan zui fanjidene fugusan beyeni hontande feiliesan kunlade pushonu?
18 Mii hhamurakude oro dane giezhi Huda kiende fayen giewo? Hhezighan ese shunjisan kunlade pushonu?
19 Matan uzhese hhela hhamurakude oro dakushi xianxin ese giezho.