4
1 Ingiese Hudai hhamurakude oroku dain giesan winema, matanyi dunda niezhanla hhamurakude oro dakuse matan ayikui wo.
2 Hhelade gouxioxii chonjiku mutun matandeye chonjizhoma, hhela daolini chenliekude xianxin giekughala ese jienliezho. Ingiese chenliesan hhelade yama oronde uwo.
3 Matan xianxin giesan kun hhamurakude orozho. Huda kieliesan mutun,
"Bi hokudene
hhela mii hhamurakude ibeizi oro dane
giezhi fayen giewo."
Ingiezhoma, Hudai wilie duyai zhayaghasanse gholuzho.
4 Jinwun jieredu nie oronde ji 7 qienni ingiezhi kieliezho, "ji 7 qiende Huda soyuji wilielasene hhamurawo."
5 Pse enezighande kieliezho, "Hhela mii hhamurakude ibeizi oro dane!"
6 Hhamurakude ezighan kunla oronema, eqighandei gouxioxii chenliedene ese shunjisan kunla oro dawo.
7 Huda pse niekozi udui enedu giezhi jinjidene khuinashi Dawudei tungo giezhi ene udui kieliezho. Eneshi jiere injisan jinwun wo,
"Enedu ta Hudai shenqii sonosuse
zhughene bu khiduzhegha."
8 Yeshuya hhelade hhamurakui ogizhoshi Huda khuinashi psedu udui ulie kieliene.
9 Ingiese Hudai bexinlade da nie hhamuraku wine.
10 Huda wilielane ese giedene hhamuraku mutun Hudai hhamurakude orochen kunla wilielane ese giedene hhamurazho.
11 Ingiese matan hhe hhamurakude ijinyo xiacha giezhi orokui wo. Pse ese shunjisan hhelai yanzii daghazhi furane.
12 Hudai kielienshi amitu, zoin bitui wo, yanyanji ghua renzitu khudoghose da xidu wo. Lien kunni jinshen ruhherji mouzi gusuide orozhi ghua gholughane. Zhugheni sumulaku zhuyiniliuzhe fenji shidane.
13 Zhayaghasan yanliuzhe Hhei melie niuighakui uwo. Man Hhei melie khizhene. Matan hhende ijinyo zhan jiuine.
Zui Fugie Buwa Ersa
14 Matande asimande khisan famatu niekozi zui fugie buwa wine. Hheshi Hudai kewon Ersa wo. Ingiese matan xianxin giesanne xiacha gieye.
15 Matanyi zui fugie buwa matanyi zholienni ulie mejiekui uwo. Hhei yandeliuzhe matan mutun shiizhi daozhoma, zui ese fanjizho.
16 Ingiese matan danzine fugiedaghadene nenjientu baozo melie echiye. Hhende matande ubali xiizhi kerekude banman giene.