17
Zui Roulieku Xianxin Giekuni Surughazho
(Mat 18:6-7, 21-22; Mak 9:42)
1 Ersa tujiladene kieliewo, "Zui fanjiku shiqin chan winema, kunlai zui fanjighasan hhe kunde gou widawo!
2 Enezighan ga kun dundadu niei zui fanjighase ghuzhundeni qiemanshai banladene haide boughase da gou wo.
3 Ta xioxin giendu, gaijiutai chii hokughase kheila. Hhe geizhen giese roulie.
4 Nie kun niudude doleifa zui fanjidene doleifa khareizhi 'Bi ese oluzho.' giezhi kieliese roulie."
5 Shitula Ezhande kieliewo, "Bijiende xianxin giekui olodogha."
6 Ezhan kieliewo, "Tande caizi fure chigei xianxin gieku bise ta ene sunshu mutunde chi genzilada khizhe haide echi osi gieseye kielienyichii chenliene."
7 "Tai dunda kienyi hoji ghazha qighalazhi irenu, ghoni adulazhi irese 'Chi ghujighan soudene ijie.' giezhi kielienu?
8 Kenjin ulie kieliene. Khareidene 'Chi made budan giezhi mii ushilazhi ijieghadene chi ochizhi ijie.' giezhi kieliene.
9 Hoji ezhan kieliesan mutun giese ezhan mafan giezho giezhi kielienu? Ulie kieliene.
10 Taye niekielien wo. Ta ezhan kieliesan mutun giezhi baraghadene ingiezhi kieliene, 'Bijienshi yama gie daku hoji wo. Eneshi bijien indan giekuni wo.'"
Hharan Pifugientuni Goudaghazho
11 ErsaYelusalende echikude Samaliya, Jialilini dundadu oronde echizho.
12 Nie aghinde orone giese hharan pifugientu gholode ire beidene
13 fugiede waradazho, "Ezhan Ersa bijiende ubali nie xii!"
14 Ersa chanladene kieliewo, "Ta buwalade goya beyene uzheghale echi." Hhela echikude ijin goudawo.
15 Hhelai dundase nie kun goyane goudasanyi mejiedene kharei ire Hudai fugiede kuaizho.
16 Ersai kon konde xiutulie papaladene mafan kieliewo. Eneshi Samaliya kun wo.
17 Ersa kieliewo, "Ta goudasanshi hharolie wola? Da yesun kun khala wo?
18 Ene niman kunse chugo pse nieda Hudai kuaile ese irewu?"
19 Ingie hhe kunde kieliewo, "Chi bosizhedene echi. Chii xianxin gieku chii jiuiwo."
Hudani Gojia Ireku
(Mat 24:23-28, 37-41)
20 Niudude Falisai kunla Ersade asazho, "Hudai gojia yan shihoude irene?" Ersa kieliewo, "Hudai gojia irese chanlakui pusho.
21 Kunla uzhe, Hudai gojia enende wo, hhende wo giezhi ulie kieliene. Hudai gojia tani dunda wo."
22 Pse tujiladene kieliewo, "Ta Kunnikewonni niudui uzhene gieku shihou kuzhenema, uzhe dane.
23 Kunla 'Uzhe, kunnikewon enende wo.' 'Uzhe, hhende wo.' giezhi kieliese ta bu echi. Hhelai bu dagha.
24 Shanjien asiman enemiense khizhezhi hhemiende zhouiku mutun Kunnikewonni ududeye ingiene.
25 Kunnikewon irese ijinyo xien shouku giezhi ene idai kunla hhei fandui giene."
26 "Nuhhani xienzide matugiezhoshi Kunnikewonyi xienzideye qingiene.
27 Hhe shihoudedu kunla ijiezho, ochizho, bierei agizho, dafalazhi izhi Nuhha chon sudoro oroku hhe udude hunshui iredene man yenji alawo."
28 "Kunnikewonni udu Luteii hhe shihoudedu niekielien wo. Hhe kunla ijiezho, ochizho, agizho, huizho, ghazha tareizho, gie giezho.
29 LuteiSodomase yolaku hhe niudude khan funi asiman jierese bouredene man sidera widawo."
30 "Kunnikewon xienjiku ududeye ingiene.
31 Hhe udude gie jieredu kunla giederase dunxilai agile bu bouzhe. Ghazha jieredulaye giedene khareizhi bu echi.
32 Ta Luteii bierei matui gholusanni nie sumula.
33 Kien aminne baohu giene giese aminne widaghane. Aminne widaghase jiuine.
34 Bi tande kielieye, hhe nie xii ghuala nie chon jiere kijiese niei uduru echine, niei jiene.
35 Ghua bierei qieman sidase niei uduru echine, niei jiene."
37 Hhela asawo, "Ezhan, imutu shiqin khala fashen giene?"
Ersa hhelade kieliewo, "Fugusan dunxi khalashi inye khala wo."