3
Kha Ghosan Kunni Goudaghazho
(Mat 12:9-14; Luj 6:6-11)
1 Ersa pse huitande orowo. Hhende nie khani ghosan kun wine.
2 Kunla Ersa hhamuraku udude goudaghase zhane giezhi xianxide uzhezho.
3 Ersa khani ghosan kunde kieliezho, "Bosizhedene dunda bei."
4 Ersa kunlade kieliezho, "Hhamuraku udude gouni giese gou onu, huaini giese gou wo? Aminni jiuinu, heine? Alinie oluzho?" Hhela yama shenqi ese khizhewo.
5 Ersa hokuzhi zhouwine kunlai uzhezho. Hhelai zhughe khidunshi nango giezhi hhe kunde, "Khane khizhegha." giezhi kieliese hhe khane khizheghase khani goudawo.
6 Falisai kunla khizhi echidene deigo Hherodepai kunlare shanlian giezhi Ersai matui widaghane giezho.
Olon Kun Ersai Daghazho
7-8 Ersa tujilarene likai gie haibienzide echise tebieji olon kunla hhei daghazho. Olon kunla hhe giesan shiqinni sonosudene Jialili, Yudaya, Yelusalen, Itumai, Yedanheni dunmien, Tuilo, Xidun zhouwini oronse man hhei shida irezho.
9 Kun olonshi jigheidane. Ersa tujiladene chon nie zhunbei gie giezhi kieliewo.
10 Ingiekushi Ersa olon kunyi goudaghawo. Gientula man jigheidazhi hhei maqine giezho.
11 Zannan ruhherla hhei chanlase chishi Hudai Kewon wo giezhi niefanie papaladene waradazhi kieliene.
12 Ingiese Ersa hhelade hheshi kien bikui bu kielie giezhi hende minlin xiaizho.
Ersa 12 Gie Shitu Sunghuzho
(Mat 10:1-4; Luj 6:12-16)
13 Ersa ulade khirei, goya zhughe jieredu kunlane uruse hhela hhei shida irewo.
14 Hhe 12 gie kun sunghudene shitu danlaghawo. Hhelai goyarene chan hhantu beighazhi peidene jiomun chonjighazhi
15 sheitan touku qienli ogine giezho.
16 Hhe sunghusan 12 gie kunshi ErsaBeduru giezhi niere ogisan Ximun wo,
17 Xibitaini kewon Yagebu, Yagebuni jiuni Yaheiya wo. Ene ghualade ErsaBanniqi giezhi niere ogiwo. Isishi xinbinni olien tungulieku niekielien wo.
18 Pse Andelie, Feili, Badolomai, Matai, Doma, Yalefeini kewon Yagebu, Datai, Rexinpaini Ximun,
19 pse Ersai ghudandusan Jialie kun Yuda wo.
Kunla Ersai Biexibu Giezho
(Mat 12:22-32; Luj 11:14-23; 12:10)
20 Ersa nie giedoura orowo. Kunla olon hhantulazho. Hhelade ijieku gunfuye uwo.
21 Ersai gieini kunla Ersa fenjiulizho giezhi kieliesei sonosudene khizhesenu hhei laizhi echine giezho.
22 Yelusalense bouzhesan jinwun hanjiala kieliezho, "Hhei jiere Biexibu wine. Hhe sheitanni touzii kouizhi sheitan touzho."
23 Ersa hhelai uruzhi ire bilazhi kieliewo, "Ibilisi matugie Ibilisini toune?
24 Nie gojia goyalane eghinduse hhe gojia bei dane.
25 Nie giede goyalane eghinduse hhe gie bei dane.
26 Ibilisi goyalane eghinduse hhela bei dazhi widane.
27 Kun liliantu kunyi giede orozhi dunxilai qianlane giese xien liliantu kunyi ulie banlase qianla dane.
28 Bi tande shuhua kielieye, kunla fanjisan soyuji zui, hu kieliesanlai man roulienema,
29 Shenlinni hu kieliese chanqi ulie rouliene. Zui chanqi wine."
30 Ene kielienyi kieliekushi hhela, "Hhei jiere zannan ruhher wine." giezhi kieliezho.
Ersani Ana Gaijiulani
(Mat 12:46-50; Luj 8:19-21)
31 Hhe shihoude Ersai anani, gaijiulani iredene ghadane beizhi kunlai Ersai urughale echiwo.
32 Olon kunla Ersai izhonde souzho. Ingie Ersade kieliewo, "Uzhe, anachii, gaijiulachii, eghechijiulachii ghadane chii ereizho."
33 Ersa hhelade kieliewo, "Kienshi mii ana wo? Kienshi mii gaijiula wo?"
34 Zhouwidene sousan kunlai uzhezhi kieliewo, "Uzhe, mii ana, mii gaijiula wo!
35 Hudai isii zunjizhi giesan kunlashi mii gaijiu, eghechijiu, ana wo."