22
Ghurunde Xinlaku
(Luj 14:15-24)
1 Ersa hhelade pse bilazhi kieliewo,
2 "Asiman gojia hoxian nie honshan kewondene bierei agizhi xi beilasei xianli.
3 Hhe hojilane peizhi xinlasan kunlai ghurunde ire giezhi urughale echiwoma, hhela ulie irene.
4 Honshan psedu hojilai peizhi kieliewo, 'Ta xinlasan kunlade kielie. Bi ijin xini beila goudaghawo. Fughe, taghun tughuchalai zharuzhi man zhunbei giewo. Ta ghurunde irendu.'
5 Hhezighan kunla ese gonjidene yolawo. Nieni ghazha jierene echiwo, nieni meimei giele echiwo.
6 Pseshikula honshanyi hojilai bareidene shizheghazhi alawo.
7 Honshan hokudene buduilai peizhi hhezighan alasan kunlai aladene hhelai chenshini tulie widaghawo.
8 Ingie hojiladene kieliewo. 'Ghurunni zhunbei giezhi goudaghazhoma, xinlasan kunla pei dane.
9 Ta dalu kouzide echisenu chanlasan kunlai man ghurunde xinlazhi ire.'
10 Hhezighan hojilani dalu jiere echidene gou kun, doghun kunni ese gonjidene man uruzhi ire ghurunde zhochen duruwo.
11 Honshan orozhedene shire jieredu zhochenlai nie uzhese ghurunde musiku jien uye musisan nie kunni chanla,
12 hhende 'zhanlien, chi enende irese yangiezhi ghurunde musiku jien ese musizho?' giese hhe kunde yama shenqi uwo.
13 Ingie honshan ushilachen kunlade kieliewo, 'Kha konyini banladene ghadanedu kharanide benda, hhende shidunne zhouzhi wila gie.'
14 Urusan kun olon wo, sunghusan kun choghon wo."
Shui Jiuiku
(Mak 12:13-17; Luj 20:20-26)
15 Falisai kunla echidene shanlian giezhi Ersai kieliense matugie maobin ereizhi heine giezho.
16 Hhela tujilane, Hherodepai kunni peizhi Ersai hhende echighase kieliewo, "Loushi, chi shuhua kieliekui bijien mejiene. Chi yan kunyiliuzhe niekielien uzhezhi kunni mienzii ulie uzhene. Hudai daolini shixinde sughazho.
17 Chii isi matugiezho? Bijiende nie kielie, matan Kaisa honshande shui jiuise oluzhou ese oluzho?"
18 Ersa hhelai doghunni uzhe khizhedene kieliewo, "Jiazhon giesan kunla, ta mii shiizhi yangiene?
19 Shui jiuiku baerni made nie uzhegha." Hhela nie mienguni agizhese
20 Ersa kieliewo, "Ene qiorun, haoshi kiennughun wo?"
21 Hhela kieliewo, "Kaisanughun wo." Ersa kieliewo, "Qinse Kaisanughunshi Kaisade ogi, Hudanughunshi Hudade ogi."
22 Hhela chenliedene ghanirazhi Ersase likai gie yolawo.
Aminne Oluku
(Mak 12:18-27; Luj 20:27-40)
23 Fuho gieku shiqin uwo giesan Sadugai kunla yen hhe udude Ersai shida ire asawo,
24 "Loushi, Musa guijin jiere kieliezho, nie kunde kewosi wi fuguse jiuni gaine biereii zhoui gaidene houdei liuikuni wo giezho.
25 Bijienyi enende gaijiu dololie wo. Laodani bierei agidene kewosi wi fuguse jiuni zhouiwo.
26 Laoer, laosan, dololie man ingiezho.
27 Zuihoude biereiye fuguwo.
28 Ingiese fuho giekude hheshi dololie dundadu kienyi bierei wo? Hhela man hhei agiwo."
29 Ersa hhelade kieliewo, "Tanughun codazho. Ta jinwunni mejie dazho, Hudai nenliniye mejie dazho.
30 Kun aminne olukude ulie agine, ulie dafalane, asiman jieredu qienxien niekielien wo.
31-32 Fugusan kun aminne olukui kieliese 'bishi Iburaheimuni Huda wo, Isagheini Huda wo, Yagebuni Huda wo' giezhi Huda tande kieliesei ta onshizhi ese daowu? Hudashi fugusan kunyi Huda pusho, amitu kunyi Huda wo."
33 Olon kunla ene kielienyi chenliedene hhe sughasande hende ghanirazho.
Zui Fugie Minlin
(Mak 12:28-34; Luj 10:25-28)
34 Falisai kunla Ersa Sadugai kunlai kielie beighasei mejiedene hhantulazho.
35 Hhelai dundadu nie jinwun loushi Ersai shiizhi asawo,
36 "Loushi, minlin dunda alinie zui fugie wo?"
37 Ersa hhende kieliewo, "Chi qienbuji zhughe, qienbuji jinshen, qienbuji sumulakughalane ezhan Hudadene ore.
38 Eneshi zui fugie, ji 1 gie minlin wo.
39 Ji 2 gie hheghala niekielien wo. 'Goyadene mutun giebeidene ore.'
40 Ene ghua minlinshi soyuji guijinshu, xienzhishuni jichu wo."
Mexihashi Dawudeni Houdei Wo
(Mak 12:35-37; Luj 20:41-44)
41 Falisai kunla hhantulakude Ersa hhelade asazho,
42 "Mexihani kieliese ta matugie sumulazho? Hheshi kienyi houdei wo?" Hhela kieliewo, "Dawudeni houdei wo."
43 Ersa kieliewo, "Qingiese Dawude Shenlinni tungo giezhi matugie Mexihani Ezhan giezhi uruzho? Dawude kieliezho,
44 'Ezhan mii Ezhande kieliewo,
"Bi duitoulaichii kon dourachii teitula chi mii borun miende sou."'
45 Qingiese Dawude Mexihai Ezhan giezhi uruse Mexiha matugie Dawudeni houdei wo?"
46 Kiemada hhende yama huida gie dawo. Hhe uduse khuinashi kiemada hhende yama asa dazho.