5
Ula Jieredu Sughasan Kielien
1 Ersa olon kunlai chujieghedene ulade khirei souwo. Tujilani melie irese
2 hhelade sughazhi kielie qiiwo.
Fuqi Winetu Kun
(Luj 6:20-23)
3 "Zhughede nanxin kunlade fuqi wine,
asiman gojiashi hhelanughun wo.
4 Nango giechen kunlade fuqi wine,
hhelai sidaghazhi kieliene.
5 Goyane meilade uzhechen kunlade fuqi wine,
hhela ghazhai jienliene.
6 Gundanni giene giezhi oliesuzhi undasuchen kunlade fuqi wine,
hhelade kurughane.
7 Ubali xiichen kunlade fuqi wine,
hhelade ubali xiine.
8 Zhughe ganjintu kunlade fuqi wine,
hhela Hudai chujieghene.
9 Heqishighachen kunlade fuqi wine,
hhelai Hudai kewosi giezhi urune.
10 Gundannide oluzhi heikui shouisan kunlade fuqi wine,
asiman gojiashi hhelanughun wo."
11 "Mii yenyinghala kunla tai shizheghazhi, heizhi, shiheni doghunnighala ghudan kieliezhi tai sugiese tande fuqi wine.
12 Ta hende bayasundu, asiman jiere tande ogiku jianli fugie wo. Tanse melieshiku xienzhilaiye ingiezhi biizhi daozho."
Duyani Dansunji Gon
(Mak 9:50; Luj 14:34-35)
13 "Tashi duyai dansun wo. Dansunde widao widase matugie koudaghane? Yamade inji dadene bendase kunla taine."
14 "Tashi duyai gon wo. Ula jiere beighasan chenshini niuigha dane.
15 Kun zhulai jienjise ighaghala ulie komorone, zhula teiku teizi jiere jiene. Ingiese nie gie kunlade gieghan wo.
16 Ingiezhi ta gonne kunlai melie zhouidene kunla ta goude giesei chanlazhi asiman jieredu adadene kuaikui ogigha."
Guijinni Kieliezho
17 "Bi irese guijin, xienzhilai shuni widaghane giekui ta bu sumula. Bi guijinni widaghale ese irezho, chengun olughale irezho.
18 Bi tande shuhua kielieye, asiman zemin widatula guijin jieredu nie jienjien nie bihuada ulie widazhi man chengun olune.
19 Ingiese kienliuzhe enezighan minlin jieredu zui ganii ulie zunjizhi kunlade ulie zunjise olune giezhi sughase asiman gojiade zui gani giezhi urune. Kienliuzhe minlinyi zunjizhi kunlade sughase asiman gojiade fugieni giezhi urune.
20 Bi tande kielieye, tai gouni jinwun hanjia, Falisai kunlase ulie daose jiedui asiman gojiade oro dane."
Ho Kuruku
21 "'Kun bu ala! Kun alase panjine.' giezhi eqighanku kunlade kieliesei ta chenliezhi daozhoma,
22 bi tande kielieye, gaijiudene hokuse panjine. Gaijiune, 'Guazi' giese zui fugie fayende lai echine. 'Yanhunzi' giezhi sugiese dozoheini khande orone.
23 Ingiese chi sidagha gieku teizi jiere mure ogikude gaijiuchii chade hokusei sumula irese
24 mureni sidagha gieku teizi konde jiesenu gaijiughalane xien goudadene mure ogile ire.
25 Chi duitoughalane zhale echikude mo jiere ghujighan hheghala gouda. Pse duitou chii panjiku noyende jiuise panjiku noyen chii gunnande jiuizhi bafanzide khane.
26 Bi tande shuhua kielieye, chi 1 fen baerniliuzhe honjizhi ulie qindaghase bafanzise khizhe dane."
Piofen Gieku
27 "'Piofen bu gie.' giesan kielienyi ta chenliezhi daozhoma,
28 bi tande kielieye, biereini uzhezhi hu sumulase ijin zhughedeni piofen giewo.
29 Chii borun nudun chii zui fanjighase waidene benda. Chii beyese iyanzi widazhi beyechii man dozode orokuse gou wo!
30 Chii borun kha chii zui fanjighase chizhidene benda. Chii beyese iyanzi widazhi beyechii man dozode orokuse gou wo!"
Lihun Gieku
(Mat 19:9; Mak 10:11-12; Luj 16:18)
31 "Pse, 'Biereine ulie kerese hhende lihun qiuzi ogikuni wo.' giezhi kieliezhoma,
32 bi tande kielieye, biereini lon kijieku yenyinse chugo lihun giese biereini piofen gieghazho. Pse lihun giesan biereini agisan kunye piofen giezho."
Fayen Gieku
33 "Pse, 'Fayen giesanne bu fura. Ezhande fayen giesanne zunji.' giezhi eqighanku kunlade kieliesei ta chenliezhi daozhoma,
34 bi tande kielieye, yama fayen bu gie. Asimanyi zhiizhi fayen bu gie. Hheshi Hudai baozo wo.
35 Zeminyi zhiizhi fayen bu gie. Hheshi Ezhan kon teiku bandou wo. Yelusalenyi zhiizhi fayen bu gie. Hheshi fugie honshanni chenshi wo.
36 Qiorunne zhiizhi fayen bu gie. Chi qiorun jieredu nie ganzi usunne chighashigha dazhi kharalagha dane.
37 Tai kielien enbeneshi enbene gie, pushoshi pusho gie. Enense olon kieliese Ibilisinughun wo."
Bouchou Gieku
(Luj 6:29-30)
38 "'Nudunde nudun honji, shidunde shidun honji.' giesan kielienyi ta chenliezhi daozhoma,
39 bi tande kielieye, doghun kunlare zodui bu gie. Kunla borun khizhaichii eghise soghei khizhaneye eghigha.
40 Kunla chii zhazhi chii lizii jienni kerene giese mienzine jienniye ogi.
41 Kunla chii biizhi 1 li mo yoghase hhere hhantu 2 li mo yo.
42 Chii xiahua giezhi kerese ogi. Chase dunxi ghuise uwo giezhi bu kielie."
Duitoudene Ore
(Luj 6:27-28, 32-36)
43 "'Ta giebeidene ore, duitoune henji.' giesan kielienyi chenliezhi daozhoma,
44 bi tande kielieye, duitoudene ore, tai heisanlade oluzhi onxian gie.
45 Ingiezhi giese ta asimanni Adadene kewosi danlane. Hhe naranne doghun kun, gou kunni jiere man zhouighazho. Ghurani gou kun, gou witu kunde man bouzheghazho.
46 Ta zinie tande oresan kunlade orese tande yan jianli ogine? Lien shui shanjisan kunlaye ingiezhi giene.
47 Ta zinie gaijiudene zhaohu daise kunlase giedun gou wo? Lien niman kunlaye ingiezhi giene.
48 Ingiese asiman jieredu Adatai onqien biku mutun taye onqienshi."