17
Fugie Biozi Yewoghala
1 Dolon ighai bareisan dolon qienxien dundadu niekozi made kieliezho, "Chi ire, olon usu jiere sousan fugie biozini faikui bi chade uzheghaye.
2 Zemin jieredu honshanla hhere kijiezhi daozho, zemin jiere sousan kunla biozini lon kijieku jiuni ochizhi sudozho."
3 Shenlin mii zhughei gojiolughazhi qienxien mii uduruzhi hontande echise nie bierei dahunse yewo jiere unusei bi chanlawo. Hhe yewode dolon qiorun, hharan gocha wo, hunshendeni Hudai sugieku niere wine.
4 Hhe bierei zishei, dahunseni jien musizhi antan, boushi, zhenzhughala dabalazho. Khadene antanni beizi bareizho. Beizide hanzhan gieghaku, lon kijieku zannannii zhonlo durughazho.
5 Manlou jiereni fugie Babilun wo, zeminni biozila, yanyanji hanzhan gieghakulani Ana wo giezhi mimitu niere huaizho.
6 Bi pse chanlase hhe bierei shentulani chusun, Ersade oluzhi ganzhen beisan kunlai chusunyi ochi sudozho.
Bi hhei chanlase hende ghanirazho.
7 Qienxien made kieliezho, "Chi yale ghanirazho? Bi ene biereini, pse hhei achisan dolon qiorun hharan gochatu yewoni mimii chade kielieye.
8 Chi chanlasan yewo eqighandei wine, ede uwo, jianlai jizi witu nokiense khizhezhi widakude echine. Jien zemin jiere sousanla, jiushi niereini duyai zhayaghasanse aminni jilasan benzi jiere ese jilasanla hhe eqighandei wine, ede uwo, jianlai ireku yewoni chanlase ghanirane.
9 Enende aghelitu zhughe kerene. Hhe dolon qiorunshi bierei sousan dolon ula wo, dolon honshan wo.
10 Tawulie ijin furawo, niekozi da wine, da nie dou ese irezhoma, irese goujicha beine.
11 Eqighandei biku, ede uwoku yewoshi ji 8 gie honshan wo, yeshi dololie mutun nie wo, widakude echine.
12 Chi chanlasan hharan gochashi hharan honshan wo. Hhela dou gojiani sou dazhoma, niecha jiere yewore hhantu honshan danlaku qienli bareine.
13 Hhela nie zhugheghala goya nenli, qienline yewode ogizho.
14 Hhela ghoni ghughanre eghindune. Ghoni ghughan hhelase injikushi ghoni ghughanshi ezhan dundadu Ezhan wo, honshan dundadu Honshan wo. Hhezighan urusan, sunghusan, shixinji giesan kunlaye ghoni ghughanre hhantu injine."
15 Qienxien pse made kieliezho, "Chi chanlasan biozi sousan usushi olon minzu, bexin, gojia, kielien wo.
16 Chi chanlasan hharan gocha, yewo hhe biozini henjine. Hhei yanyanjilai qianlazhi hulan muchughun gholughadene mighaini ijiezhi khanghala sidera widaghane.
17 Ingiekushi Huda hhelai zhughede goyane isii gieghakui teizho. Hhela nie zhugheghala goya gojialane yewode ogizhi Hudai kielien man gholuku shihou kune.
18 Chi chanlasan biereishi zemin jieredu honshanlani gonjisan fugie chenshi wo."