5
Ghoni Ghughan Shuni Keighazho
1 Bi chanlase baozo sousei borun khade horosan shu wine. Ghadane, sudoroji uru huaizhi dolon fenqioghala fenjizho.
2 Bi pse chanlase nie lilian fugietu qienxien fugiede waradazhi kieliezho, "Kien fenqioni keighazhi shuni keighakui pei shidane?"
3 Asiman jiere, zemin jiere, zemin doura hhe shuni keighazhi onshichen uwo.
4 Peizhi keighazhi onshichen wise bi hende wilazho.
5 Zhanlao dundase niekozi made kieliezho, "Bu wila! Uzhe, Yuda paini shizi, jiushi Dawudeni houdei ijin injiwo. Hhe shuni keighazhi dolon fenqioni keigha shidane!"
6 Bi pse chanlase baozo, jieran amitu ojien, zhanlao dunda nie ghoni ghughan beizho. Alazhi daosei xianli. Hhende dolon gocha, dolon nudun wine, eneshi duyai gochude peizhi echighasan Hudai dolon ruhher wo.
7 Ene ghoni ghughan yo dao baozo sousei borun khase shuni agiwo.
8 Shuni agise jieran amitu ojien, 24 gie zhanlao ghoni ghughanyi melie papalawo. Manla qin, xian durusan antanni luzii bareizho. Ene xianshi shentulai onxian wo.
9 Hhela shini donghala doulazho,
"Chi shuni agizhi pei shidane.
Dolon fenqioni keighazhi pei shidane.
Chii alazhi daozho,
goya chusunghalane Hudade oluzhi
go pai, go kielien, go minzu, go gojialase kunlai agizho.
10 Hhelai mai Hudade oluzhi buwatu gojia gholughawo,
Zemin jiere qienli bareine."
11 Bi chanlazhi sonosuse baozo, amitu ojien, zhanlaolai zhouwide olon qienxienlai shenqi wine, hhela olonde shuzi uwo.
12 Qienxienla fugie shenqighala kieliezho,
"Alazhi daosan ghoni ghughan
nenli, bayan, agheli, lilian,
zhigui, kuaiku, doulakui peizhi jienlie shidane."
13 Bi sonosuse asiman jiere, zemin jiere, zemin doura, hainughun, asiman zemin dunda yanyanji zhayaghasanla man kieliezho,
"Doulaku, zhigui, fama, qienlini
man baozo sousanji ghoni ghughande
chanqi izhi ogi!"
14 Jieran amitu ojien amine giezho. Zhanlaolaye papaladene beiizho.