4
Jia Loushila Irekui Qixin Giezho
1 Ihou kuse kunla miiku ruhherni, sheitan surughakuni daghazhi xinyanse likai giene giezhi Shenlin mindamin kieliezho.
2 Ene sughakushi ghudanchii jianise irezho. Ene izhun kunlai lianxinshi qiemughala shirasan niekielien wo.
3 Hhela bierei bu agi, oqin bu dafala giezho. Niezhan ijiekulai bu ijie giezhoma, ijiunishi Huda zhayaghasan wo. Zhendaoni xianxin giezhi minbai olusan kunla Hudade mafan kieliedene ijiekuni wo.
4 Huda zhayaghasanshi man gouni wo, Hudade mafan kieliedene jienliese ulie kerekuni nieda uwo.
5 Hudai kielienji onxian giekughala zhiguishizho.
Mexihani Gou Hoji
6 Chi ene shiqinlai gaijiulade surughase xinyanni daoli jiere, chi daghasan gou daoli jiere fugiedazhi Mexiha Ersai gou hoji gholune.
7 Duyani bixin kielien, yama ibari witu chonjisan kielienlase pii. Hudai miende zhughene donlien gie.
8 Beyedene donlien giese haochu choghon woma, Hudai miende donlien giese gofanmiende haochu olon wo. Duyade gouni ogine, houshideye gouni ogine giesan
9 ene kielienshi shuhua wo, ashighala jienliekughan wine.
10 Enende oluzhi matan khishulazhi xiacha giezho. Ingiekushi mai xiwon chanqiku Hudade wo. Hheshi soyuji kunlai jiuichen, tebieshi xianxin giesan kunlai jiuichen wo.
11 Chi enezighan shiqinlai kunlade fenfulazhi surugha.
12 Chi nasunchighanshi kunlai meilade bu uzhegha. Kielien kielieku, gieku, oreku, xinyan, ganjin fanmiende xianxin giechen kunlade yanzi uzhegha.
13 Bi iretula chi libai giekude jinwunni kunlade onshiku, jianjiku, surughakuni xiacha gie.
14 Huda chade ogisan nenjienni suibiende bu uzhe. Ene mureshi zhanlaola chii jiere khane teizhi onxian giekude Hudai kielienyi deilazhi ogisan wo.
15 Enezighan shiqinlade zhughene teizhi goughande giedene goyane hendasanyi ashighalade uzhegha.
16 Chi goyane xioxin gie, kunlade surughakuniye xioxin gie. Chi enelai izhi zhazhen giezhi giese chi, chii kielienyi chenliesan kunlai man jiuine.