3
Duya Baraku Qinkon
1 Duya barakude chijia shihou kuzhekui chi mejie.
2 Hhe shihoude kunla zi goyane guine, baerni neiine, goyane kuaizhi fugiede uzhene, suibiende sugiene, ana adane kielienyi ulie chenliene, kunlai gouni matane, xienlian witui giene,
3 zhughede orekui uwo, kunlai ulie rouliene, doghun kielienghala beimiende kieliene, goyane kunzhi ulie giene, yedou no wo, gouni giekude xiqi uwo,
4 kunlai ghudandune, ulie sumulazhi hu giene, goyane bi wo giezhi undude uzhene, hu nadukude Hudase olon orene,
5 jiomunni gieku yanzi winema, jiomunni nenlii chenren ulie giene. Chi imutu kunlase gholodo.
6 Hhelai dunda kunlai giede zhomuji oro naozi witu biereilai shunjighachen kun wine. Ene izhun biereila zuini beiliezhi yanyanji nefuxin hhelai miizho.
7 Hhela chan suruzhoma, izhi zhendaoni minbai olu dane.
8 Eqighandei Yani, Yanbighala matugiezhi Musai duiku mutun enezighan kunlaye qingiezhi zhendaoni duizho. Hhelai zhughe qida oluwo, xinyannishiye jiani wo.
9 Ingieliuzhe hhelanughun chenji dane. Hhelai benni hhe ghua kun mutun olon kunlai melie khizhene.
Qimotaide Zuihou Fenfulazho
10 Ede bi surughasan, bi gieku yanzi, mii ibeiku fanxian, xinyan, rennai gieku, oreku, khidunde beiku,
11 da bi Anqiya, Igenien, Lusidede shouisan kui, mii heisan shiqinlai chi man uzhezhi mejiewo. Mii heisan zhenzhenji fugie wo! Ingieliuzhe Ezhan mii enelase jiuizhi likai gieghawo!
12 Shijishan Mexiha Ersai sudoro xienliande udu daone giesan kunla man heikuni shouine.
13 Doghun kun, piendachen kun yebeiseye doghunshine. Hhela kunlai piendazho, kunlaye hhelai piendane.
14 Ingieliuzhe chi surusanne, xianxin giesanne goude barei. Chade surughasan kunlai chi qinchu wo,
15 pse chi gaxienzise zhiguitu jinwunni mejiene. Ene jinwun chi Mexiha Ersai xianxin giese jiuiku hhe aghelii ogine.
16 Jinwunshi man Huda kunyi zhughei gojiolughazhi gieghasan wo. Kunlade surughakude, kheilakude, geizhen gieghakude, olusanyi gieghakude zoin wine.
17 Ingiezhi giese Hudai kunni hen kun gholughazhi yanyanji gou wilie giekude zhunbei gieghane.