Pathien Lekhabu Inthieng Chongtung Thar 1 Thessalonika 1

THESSALONIKA

Mingei Kôma Paul Lekhamuthuon Inkhatna

Chongmaruoi

Thessalonika chu Macedonia rama Rom ramhuola khopuilien munpuitak ani. Paul'n Philippi a mâk suonûkin mahan koiindang a va minding ani, nikhomrese, Paul'n Juda niloi ngei lâia Khristien thurchi a misîrna hah thangsuona a dôn sikin Juda niloi ngeiin Judangei Sakhuo zom an jôt sikin Judangei renga Paul chunga doina aom kelena, Paul hah Thessalonika mâka Berea se rangin namnôlin aoma. Nûka Korinth a tung tena chu Paul'n a champui le a sinthopuipu Timothy misang minrietna renga Thessalonika koiindang dingmun a lei riet nôka.

Thessalonika mingei kôma Paul Lekhamuthuon Inkhatna hi ha muna khristien om ngei mohôkna rang le mindet nôkna ranga miziek ani. An taksônna chungroia le an lungkhamna thurchi sikin râisânchong a rila; anni leh munkhata aom lâia a ringnun ngei hah a minriet ngei nôka, masuole chu Khrista juong nôk rang roia koiindang sûnga chongrekelngei aoma: Khrista a juong nôk mâna lei thi sai iempungei han khrista juong tika a juong chôi rang kumtuong ringna hah an chang rang mini? ti le “Khotika mo Khrista a juong nôk rang?” ti ngei hih a thuon ani. Khrista juong nôk rang sabei balama dâireka sintho tit ranga a chongbênân Paul'n hi zora hih a mang ani.

Asûnga chongtângpuingei

Chongmaruoi 1:1

Râisânchong le minpâkna 1:2—3:13

Khristien nunchan dôn ranga mohôkna 4:1-12

Khrista juong nôk rang roia rilnangei 4:13—5:11

Azoina mohôknangei 5:12-22

Chongkhârna 5:23-28

1 Paul, Silas le Timothy ngei renga,

Pa Pathien le Pumapa Jisua Khrista ta Thessalonika koiindang sûnga mingei kôm:

Moroina le inngêina ninta nirese.+

Thessalonika mingei ringnun le taksônna

2 Kin chubaithonangeia han nin riming ralamin, nin rênga rangin Pathien kôm râisânchong kin misîr tit ngâi. 3 Pathien le Pa mitmua, taksônna sika nin sintho tie ngei, lungkhamna sika nin sinrât tie ngei, ei Pumapa Jisua Khrista nin sabeina chunga nin det ngei hah mingil loiin kin riettit sikin. 4 Kin ruolngei, Pathien nangni lungkham ngâia male ata ni rangin nangni a thang zoi ani ti kin riet. 5 Thurchi Sa hah chongbâingei vaiin hong mintung mak mea, sinthotheina leh Ratha Inthieng leh a chongtak iemna dettak leh kin hong mintung ani. Nin kôm kin om lâia kin nunchan hah nin riet; nangni nin satna rang rokin kin om ngâi ani. 6 Keini le Pumapa entonin mi nin dôna; male intak nin tuong sabak lâi khomin Ratha Inthieng renga râisânna thurchi ajuong ngâi ha nin lei modôm ani.+ 7 Masikin Macedonia le Achaia rama iempungei murdi ta rangin minenna nin hongni zoi. 8 Pumapa thurchi hah nangni renga Macedonia le Achaia rama ânthang vai niloiin, Pathien chunga nin taksônna thurchi khom muntina ânthang sa zoia; hanchu, kei nin ite kin misîr uol nâng khâi mak. 9 Ha mingei han nangni kin hongpan zorân mi nin lei modôm ngâi ngei le mirmilngei renga Pathien tieng nin hônheia, Pathien adiktak le aring sin tho rangin 10 le a Nâipasal Jisua thina renga a kaithoia, taksina juongtung rang renga mi kêlsuo ngâipu hah invân renga a juong rang nin lei ngâk tie khom an misîr ngâi.