8
Jisua ei Ochai Inlaltak
1 Ei misîr lâia abipuitak chu mahi ani, Ochai Inlaltak invâna Rêng Inchungtak rêngsukmun changtienga hong insung ei dôn ani.
2 Miriem kutsin niloi, Pumapa sin puon-in tatak Mun Inthieng taka Ochai Inlaltak angin sin a tho ani.
3 Ochai Inlaltak ngei murdi'n neinunpêk le sa inbôlna Pathien kôma pêk rangin phun an nia, Masikin ei Ochai Inlaltak khom hin imini chu pêk rang a dôn ngêt rang anâng ani.
4 Ama hah pilchunga om senla chu, ama chu ochai reng ni tet no nih, Juda Balama neinunpêk anâng ngei pêk ngâi ochaingei an om sikin.
5 Ochaingei sintho ngâi hah chu invâna neinunngei rimil le rilîm tatak vaike ani. Moses'n Chonginkhitna Puon-in a sin rang lâia phuozekin Pathien'n a kôm, “Ni sin rang tie chu muola a rimil min mua no om ngei angtakin sin rangin mindon roh,” tia a ril anghan.
6 Aniatachu, atûn chu, anni ngei nêka ânchung uol ochai sin hah Jisua pêkin a om zoi, Pathien le a mingei kâra chonginkhit a minsûk hah asa uola, ma chonginkhâm hah neinun asa uol ngeia minding ani sikin.
7 Chonginkhitna masa hah dikloina om no senla chu, a inik changna hah hong om rang nâng no nih.
8 Aniatachu Pathien'n a mingei dikloina a man lâihan a tia,
“Nikhuo ngei ahongtung rang ani zoi,
Israel mingei le Juda mingei chonginkhitna athar ki sin pe ngei rang nikhuo ngei hah, Pumapa'n a ti.
9 An richibulngei Egypt renga hong tuong ngei ranga
an kuta ku sûr nia Chonginkhit ki sin anghan chu ni khâi no nih.
Anni ngei leh Chonginkhit ki sina han taksôn omin om mak ngeia,
masikin anni ngei hah lunghâng tho ngei khâi mu-ung ani.
10 Atûn, nikhuo hong tung rang ngeia Israel mingei leh chonginkhit ki sin rang chu
mahih ani, Pumapa'n a tia:
An mulungsûnga ka balam ngei dar ka ta
male an mulungrîl ngeia miziek sâng ki tih.
Keima an Pathien nîng ka ta,
male anni ngei hah ki mingei nîng an tih.
11 Tutên, ‘Pumapa hah riet roh,’ tiin an miriem champui mini aninônchu
an ramsûng miriem champui minîn
an minchu ngei nâng khâi noni ngei.
Achîntak renga alientak tena min riet let rang anni zoi sikin.
12 An sietnangei ngâidam ka ta,
an minchâina ngei riettit khâi no ning.”
13 Chonginkhit thar a ti sikin, Pathien'n amotona ha chu a muruon a sin zoi; male neinuntin amuruo hong changa mangsaloi ngei chu inmang lai atih zoi.