Pathien Lekhabu Inthieng Chongtung Thar LUKE 12

Asarotholngei renga intûngna

(Mat 10:26-27)

1 +Mipui isâng tamtak, inkhat le inkhat insirpolin Jisua an bôma. Jisua'n a ruoisingei kôma, “Pharisee asarotholngei chol renga singthei roi. 2 +Jâttin ihîpa om la phong nîng a tih, a ipa om khom la phuongsuok nîng a tih. 3 Masikin, ajînga nin ti ngei hah sûn khovâra lân phuong nîng a ta, khâltan sûnga kuor kunga nin ti ngei hah inchunga chuongin tânghâi la nîng a tih,” a tipe ngeia.

Tumo a chiruo

(Mat 10:28-31)

4 Ka malngei nangni ki ril, ei takpum that suonûka, ite mi lo thei khâiloi chu chi no roi. 5 Tumo nin chiruo nangni ril ki tih. Thi nûk khoma, dûkmuna nangni pai theina rachamnei ani sikin, Pathien chi roi, ani, nangni ki ti, Ama vai chi roi. 6 Invate rangnga poisa nikin an juor ngâi ni mak mo? Ania, Pathien'n chu inkhat te luo hah mingil ngâi mak. 7 Nin lu chunga nin samngei tena khom itelvar kêng. Masikin, chi no roi, invate tamtak nêkin nin lut uol.

Khrista phuongna le hengpaina

(Mat 10:32-33; 10:19-20)

8 “Nangni ki ril, tutu lôko rieta ni thop kai chu, Miriem Nâipasal khomin Pathien vântîrtonngei makunga thop a tih. 9 Tutu lôko rieta ni hengpai kaichu, Miriem Nâipasal khomin vântîrtonngei makunga hengpai a tih. 10 +Tutu Miriem Nâipasal rilsiet chu ngâidam nîng a ta, Ratha Inthieng rilsiet chu ngâidam nino nih.”

11 + “Hanchu, nin roi jêk rangin synagog mo, governor makunga mo, roijêkpungei makunga mo, nangni an tuong tikin, inmo ki thuon rang, imo ki ti rang, tiin nin mulung min jîng no roi. 12 Nin ti rang chu a zora tika Ratha Inthiengin nangni ril a tih.”

Amo aneipa chongmintêk

13 Mipui lâia mi inkhatin Jisua kôma, “Minchupu, Ka lâibungpa kôm, kin pa rochon mi mâk pe mi sem rangin tipe roh,” a tia. 14 Jisua'n a thuona, “Mala, nangni inik chungroi jêk rang le nin rochon sem rangin tumo roineina mi pêk?” a tia. 15 Hanchu, an rênga kôma, “Singthei roi, ôinangei murdi renga indîn thei roi, asikchu, rochon, neinangei hih miriem ringna abitak nimak, idôr khom nei resea,” a tipe ngei.

16 Male, Jisua'n hi chongmintêk hih a ril ngeia, “Mi aneipa inkhat hin a loia chimu tamtak a minvânga, 17 Inmo ko tho rang ani zoi, o, ka bu le bâl darna rang dôn khâi mu-ung hi,” tiin a mindona. 18 Hi anghin tho ki tih, ka sasier set ka ta, anêka lien uol sin ki tih, mahan ke neinun murdi dar ki tih. 19 Maleh, ka ratha kôma, “Ratha, kum tamtak rang neinun sa nu bûm zoi sikin, sâk inla nêk roh, ningbei riemin om roh tipe ki tih” a tia. 20 Ania, Pathien'n a kôma, “Amo, avien jân reng ni ringna aboi rang kêng ani zoi, hi neinun ni isuo ngei hih tuta rang tak mini?” a tipea. 21 Hanchu Jisua'n, “Pathien tieng nei loia, eini ta rang vaia rochon a bûm chu ha anga han nîng a tih” a tia.

Pathien iem roh

(Mat 6:25-34)

22 Jisua'n a ruoisingei kôma, masikin nangni ki ti, nin taksa sâk nêk rang, nin sil nin bom rang nin kâng mindoi no roi. 23 Sâk nêk rang nêkin ringna alut uol, silbom rang nêkin takpum alut uol. 24 Invatengei en ta u, chimu khom tu mak ngei, bu khom ât mak ngei, sasier khom nei mak ngei, hankhoma Pathien'n a vâia, vangei nêkin nin lut uol ok. 25 Tumo a kângdoi sika a ringna a min sôt thei uola?* 26 Ma ngeite luo nin tho thei loiin, imo neinun dang vângte nin kâng nin mindoi?

27 + Ram pârngei en ta u, sin khom tho mak ngei, puon khom không mak ngei. Ania nangni ki ril, ma dôra anei, rêng Solomon luo han hi pârte hih phâk mak. 28 Pathien kêng loisûl puon minsil, sûl aviena oma nangtûka lungthua hâl rip rang. Nangni vâng chu, nangni minsil no ni mo? Nin taksônna achîn bah na!

29 Masikin nin sâk nin nêk rang mindonin nin kângmindoi no roi. 30 Jentailngeiin ma ang roi chu an mindon ngâi. Nin Pa'n nin inâng chu a riet let. 31 Manêkin a Rêngram mindon bak ungla hanchu ha neinunngei ha chu nangni pêng a tih.

Invâna neina

(Mat 6:19-21)

32 “Chi no roi, lôm achînte ngei, nin Pa'n a Rêngram nangni pêk rang a nuom. 33 Nin neinun murdi zuor ungla, inrieng ngei pêk roi. Sumkok chettheiloia thun ungla, invâna achiem thei khâiloina ranga, inrungeiin an murûk thei khâiloina, rengên a siet thei khâiloina ranga ninta rangin rochon bûm roi. 34 No rochonngei omna kipa nu mulungrîl khom om tit a tih.

Tîrlâm intûngchiena om

35 “Nin puon insilin, nin kong khitin, nin châti mochokin, tiklâi khomin intûng chienin om roi,+ 36 tîrlâm, an pu innei ruolhoi renga juong rang lei ngâk chien anghan. A juongleh, inkhâr a tôka mo-ong kelen rangin.+ 37 Tîrlâm, an pu juonga intûng chiena om ai juong mu chu mi satvur anni. Nang ki ril, a kong khit a ta, insung a ta, ngâk a tih. 38 Jânchima mo, arkhuona mo, a juonga intûng chiena ai mu ngei chu mi satvur anni. 39 Mahih riettit roi, in pumapa'n inru hong rang riet senla chu a in minset no nih.+ 40 Masikin nangni khom intûng chienin om roi, nin tûng loi lâitakin Miriem Nâipasal juong a tih,” a tia.

Tîrlâm iem om le iemomloi

(Mat 24:45-51)

41 Peter'n, “Pumapa, hi chongmintêk hih keini rang vai mo ni ti, mi murdi rang mo?” a tia.

42 Pumapa'n a thuona, “tîrlâm iem om avâr tak, a pûn a insûng a cherêla, tîrlâm dang ngei azora kipa, an sâk a sem pe ranga uliena ai be chu tumo nini? 43 a pu a honga, ha anga lei tho tîrlâm ai mu chu mi satvur ani. 44 Adiktakin nangni ki ril, ha tîrlâm tak hah a pun neinun enkolpun sin a tih. 45 Hannisenla ha tîrlâm han a mulungin, ku pu la juong vak no nih, tiin a tîrlâmpa ngei, a tîrlâmnu ngei jêm senla, sâkin nêkin lênrûi senla, 46 Ha tîrlâm hah ân ningloi, ân tûngloi kârin, a pu juong a ta, tuk nôinek a ta†, a iemloi ngei rangtum minchang a tih. 47 Tîrlâm a pu nuomlam riet chaka intûng loia, sin nuomloi chu na takin jêmpol nîng a tih. 48 Hannirese, riet loi sika, tôkmol sâkna rak tho minchâi chu jâmin jêm nîng a tih. Tutu atam an pêk kôma atam zong an ta, atam uol an ipêk kôma chu atam uol rok an tih.

Jisua insenna abi

(Mat 10:34-36)

49 “Pilchung mei leh hâl ranga juong kini, atûn khom kâng kelen tarse ku nuom. 50 + Baptisma ka chang ranga om hih, ânzoi mâka chu ki ning ânîp bah! 51 Rammuola inngeina min lêng ranga juongin mo mi nin tûng? Inngêina min lêng ranga juong ni mu unga, insenna min lêng ranga juong kêng kini. 52 Atûn renga insûngkuo inkhata mi rangnga insen an ta, inthum ngeiin inik ngei doi an ta, inik ngeiin inthum ngei doi an tih. 53 Pa ngeiin an nâingei, nâingeiin an pangei, nungeiin an nâinupangngei, nâinupangngeiin an nungei, tarpingeiin an moingei, moingeiin an tarpingei doi an tih,” a tia.

Zora riettheina

(Mat 16:2-3)

54 Jisua'n mipui ngei kôma khom, “Nitâk tieng sûm a jînga anîn chu ruo a juong rang kêng nin tia, juong khom a juong ngâi. 55 Hanchu thînthi a hong sêma anîn chu alum rang kêng nin tia, alum khom alum ngâi. 56 Asarotholngei o! phil le invân nin ena, khuo om rang tie nin riet theia, ania, atûnlâi zora om tie ithomo nin riet thei loi?” a tia.

Indoipui leh inngêi rang

(Mat 5:25-26)

57 “Ithomo nin theiin neinun dik sin rang nin mindon loi? 58 Mîn roijêkmuna nang an kai rangin chu, ha mi lehhan roijêkmun tung mân inngêina sinpui roh, aninôn chu, roijêkpu makunga nang kai a ta, intâng ina nang khum an tih. 59 Nang ki ril, poisa apêkte luo ne pêk let mâka chu mahan om ni tih,” a tia.

+ 12:1 Mat 16:6; Mk 8:15 + 12:2 Mk 4:22; Luk 8:17 + 12:10 Mat 12:32; Mk 3:29 + 12:11 Mat 10:19,20; Mk 13:11; Luk 21:14,15 * 12:25 a minsei thei; nônchu ânsôn insâng thei. + 12:27 1 Rêng 10:4-7; 2 Rich 9:3-6 + 12:35 Mat 25:1-13 + 12:36 Mk 13:34-36 + 12:39 Mat 24:43,44 † 12:46 tuk nôinek a ta; aninônchu vôrpai ata. + 12:50 Mk 10:38