Pathien Lekhabu Inthieng Chongtung Thar LUKE 24

Jisua inthoinôkna

(Mat 28:1-10; Mk 16:1-8; Joh 20:1-10)

1 Pathienni jîng, inmâna, nupangngeiin mirimhoi an sin hah chôiin thâna an sea. 2 Thân kotbâia lung hah inluoipai sân an va mua. 3 Hanchu, an lûta, ania, Pumapa Jisua ruok chu mu khâi mak ngei. 4 Mahan mulungjîngin an indinga, harenghan, mi inik puon chek insilin an kôla an juong indinga. 5 Nupangngei han rolo innîkin nuoia an inbok raka, anni han an kôma, “Ithomo mi ring hah mithingei lâia nin irok? 6 + Hin om khâi maka, ânthoinôk zoi. Galilee rama a om lâia nin kôma ai ti ngei hah riettit roi. 7 Miriem Nâipasal hih mi nunsie ngei kuta ipêk nîng a ta, jêmdel an ta, a sûnthum nîn a ringin inthoi nôk a tih” an tia.

8 Hanchu, nupangngei han ai ti ngei hah an rietsuok nôka, 9 thân renga an kîra, neinun omtie ngei chu ruoisi sômleikhat ngei le midangngei an rila. 10 Nupangngei hah Mary Magdalene, Joanna, le Mary, Jacob nungei anni. Anni le nupang adang an kôma omngei han tîrtonngei hah an ril ani. 11 Ania nupangngei chongril hah, chongkâmboi an tia, taksôn mak ngei. 12 * Nikhomrese, Peter chu ân thoilita, thân tieng a tâna, ân kûna, rosom puon injuot tiloi chu ite dang mu maka. Hanchu, neinun omtie ngei kamâmin in tieng a kîr nôk zoi.

Emmau khuoa an se

(Mk 16:12-13)

13 Ma ni nanâk han Jisua jûi ngâi mi inik Emmau khuoa an sea, Jerusalem renga kilometer sômleikhat dôra la ani. 14 An ruonin neinun omtie ngei hah an misîra. 15 Ha anga an chonga an misîr lâiin, Jisua lelên a hong nâia an kôma a lôna. 16 An mua chu riet minthâr mak ngei. 17 Ama'n an kôma, “Lampuia nin misîr hah ithurchi mini?” a tia. Hanchu mâi inngûi riemin an indinga. 18 Hanchu, a riming Cleopas han a kôma, “Jerusalema sûnkhat vai mo no om? Sûntômte lei vuna neinun omtie ngei hah ni riet loi mo?” tiin a rekela. 19 “I neinun mo?” a tia. “Nazareth Jisua chunga neinun tungngei hah; ha mi hah Pathien le mitin mindon khoma jâttinrêng ai ti le ai sin, racham inei dêipu ania, 20 kin Ochaisingei le ruoipungeiin that rangin an pêka, an jêmdela. 21 Ama hah Isreal minjôk rang mi nîng a tih iti kin tûnga. Mapêna, ha anga neinun tungna hah avien hin a sûnthumni ani zoi. 22 Kin champui nupang senkhat, jînga thân va en ngeiin kin mulung an minjînga. 23 A ruok mu loiin an hongkîr nôka, vântîrton inlâr kin mua, a ring nôk zoi an ti, an hong tia. 24 Hanchu, kin champui senkhat ngeiin thâna an va sea, nupangngei ti lam anghan an va mua, ama chu mu khâi mak ngei” an tia.

25 Male, Jisua'n an kôma, “Amo ngei o, dêipungei neinuntin an lei rilngei hah idôra a iem innu mo nin ni? 26 Messiah han ha ngei murdi tuongin a roiinpuina ai lût rang nimak mo?” a tia 27 Hanchu, Jisua'n ama chungroi, Moses lekhabu renga dêipungei lei miziek lekhabungei a rilminthâr pe ngeia.

28 Hanchu, an sêna rang khuo an hong nâi zoia, Jisua hah la se bang rang angin a oma, 29 Nikhomrese bâiin an sûra, “Kin kôma om ta roh, sûn aheka ajîng rang kêng ani zoi” an tia. Hanchu an kôma om rangin a se zoi. 30 Hanchu, an kôma sâk rangin ânsung lâiin vâipôl a lâka, sat a vura, a khoia, a pêk ngeia. 31 Hanchu an mit a hong vâra, an rietminthâr zoia, hannirese, an mitmu renga ânmang nôk kelena. 32 “Lampuia ei kôma, Mi chongpuia, lekhabungei mi rilminthâr pe lâia han mei a kâng angin om mak me mo?” tiin an inrekela. 33 Harenghan, an inthoia, Jerusalema an kîr nôka, ruoisi sômleikhat ngei le Adangngei lei intûp an va mua. 34 “Pumapa chu ânthoinôk tatak; Simon kôma khom ânlâr zoi” an lei tia. 35 Hanchu, ha inik ngei khom han, lampuia neinun omtie le vâipôl a khoia Pumapa an rietminthâr tie an rilminthâr ngei zoi.

Jisua'n a ruoisi sômleikhat ngei kôma ânlârna

(Mat 28:16-20; Mk 16:14-18; Joh 20:19-23; Sin 1:6-8)

36 Hanchu, mi inik ngei han an la ril lâitakin, harenghan Pumapa lele an lâia ândinga an kôma, “Nin chunga ratha'ngamna om rese”† a tia.

37 An jâminzal sabaka, khori an mûn an mindona. 38 Hanniresea, an kôma, “Ithomo nin mulung nin minjînga? Ithomo nin mulunga iem zoiloina nin inei? 39 Ka kut, ke kephangei en ta u, keima nanâk hah ki ni hih! Ni tôn ungla, en roi, minin mu anghan khori'n taksa le ru nei mak” a tia. 40 Hanchu, mahah a ti zoiin chu, a kut le a kephangei a min en ngeia.‡ 41 An râisân rai sikin taksôn thei kelen mak ngeia, an kamâm sabak lâiin an kôma, “Asâk ruo imokhat mo nan nei?” tiin a rekel ngeia. 42 Nga suong sai tangkhat an pêka. 43 Alâka, an mu chungin a sâka.

44 Hanchu, an kôma, “Hi chongngei lele hih ani, nin kôma ko om lâia ku chungroi Moses Balam lekhabua miziek, Dêipungei miziek, Minpâkna labua miziek, a hongtung dik rang nangni ke lei ril ngâi hah,” a tia. 45 Hanchu, lekhabua ânziekngei an riet theina rangin an mulungrîlngei a mo-ong pe ngeia. 46 An kôma, “hi angin miziek ani, Messiah han dûk tuong a ta, sûnthum suole thina renga inthoi nôk a tih. 47 Ama rimingin insîrna le nunsie ngâidamna thurchi Jerusalem renga namtin kôma misîr nîng a tih. 48 Ha neinunngei murdi rietpuipu nin ni. 49 + Hanchu, ka Pa ânkhâm hah keima rengin nin chunga juongtîr ki tih, hannirese, chungtieng renga sinthotheina nin chunga a chum mâka chu khopuilien ha nin ngâk tit rang ani,” a tia.

Jisua invâna a kal

(Mat 16:19-20; Sin 1:9-11)

50 Hanchu, khopuilien renga Bethany dênin a ruoi ngeia, mahan a bân a phara, sat a vur ngeia.+ 51 Ha anga sat a vur lâitakin, ânsenpui ngeia, ama chu invâna tuongin a om zoi.§ 52 Hanchu chubai an mûka, râisân takin Jerusalema an kîrnôk zoi. 53 Hanchu, Biekina Pathien kôma râisânchong rilin an zorangei murdi an mang zoi.

+ 24:6 Mat 16:21; 17:22,23; 20:18,19; Mk 8:31; 9:31; 10:33,34; Luk 9:22; 18:31-33 * 24:12 miziek senkhata chu rachang 12 na ommak. † 24:36 Miziek senkhat ngeiin chu Nin chunga rathangamna om rese hih dôn mak ngei ‡ 24:40 miziek senkhata chu rachâng 40 nah ommak. + 24:49 Sin 1:4 + 24:50 Sin 1:9-11 § 24:51 miziek senkhata chu ommak male invâna tuongin a om zoi.