Pathien Lekhabu Inthieng Chongtung Thar Mark 11

Jisua'n inlaltakin Jerusalema a lût

(Mat 21:1-11; Luk 19:28-40; Joh 12:12-19)

1 Jerusalem an hong tung rangtôn Bethphage le Bethany khopuingei kôla Olive Muol an hong tungin chu Jisua'n a ruoisingei lâia mi inik an motona a tîr ngeia, 2 hi rilnangei leh an kôm, “Nin motona khuo son se ungla, nin tung harenghan, sakuordingte inthung, tute la chuongna ngâiloi mu nin tih. Sût ungla, mahin hong kai roi. 3 Male tukhomin itho mo ma anghin nin thoa, tiin nangni an rekel khomin, Pumapa'n* a min nâng kêng, hong thak nôk kelen a tih ti roi” a tia.

4 Masikin an sea lamliena inkhâr pêntienga sakuordingte inthung an va mua. Maha an sût lehan, 5 hataka ânding senkhat ngeiin, “Ithomo sakuordingte hah nin sûta?” tiin an rekel ngeia.

6 Jisua'n a ril ngei anghan an thuona, male lokongei han an min se ngei zoi. 7 Sakuordingte hah Jisua kôm an hong kaia, a chunga an puonngei an dâpa male Jisua a chuonga. 8 Mi tamtakin an puonngei lampuia an dâpa, adangin loilâija sasôl an va tuka an dâp sa zoi. 9 Amoton tienga se ngei le a nûk tienga a jûi mingeiin,+

“Hosanna!

Pumapa riminga juongpu chu Pathien'n

satvur rese!

10 Rêng David Rêngram juong tung rang ha,

ei pa'n satvur rese!

Pathien minpâkin om rese!

Ânchungtaka khin

Hosanna!” tiin an inieka.

11 Jisua'n Jerusalem a tungin chu Biekin sûnga a lûta, male neinun nâm a ena. Aniatachu kholoi ahongni zoi sikin ruoisi sômleinik ngei leh Bethany taka an se zoi.

Jisua'n theichang kung khomâk a sâm

(Mat 21:18-19)

12 Anangtûka chu Bethany renga an hong kîr nôka, Jisua a von ahong cham pea. 13 “Alazana renga theichang kung abuongei hah ava mua, masikin amara tete mo ka man” tiin ava pana. Hannirese ava tungin chu, theichang ânra zora ani loi sikin abuongei tiloiin chu ite adang mu maka. 14 Jisua'n theichang kung kôm han, “Tutên na mara sâk man khâi no rese ngei!” a tia.

Male a ruoisingei khomin a chong ha an rieta.

Jisua Biekina a se

(Mat 21:12-17; Luk 19:45-48; Joh 2:12-22)

15 Jerusalem an tung lehan, Jisua Biekina ava lûta, Biekina neinun juorngei le rochôkngei hah a rujûlpai ngeia. Sum thûlngei dosângngei le pharvali juorngei sukmunngei khom a nammelet pe ngeia, 16 male Biekin khalâidung han tutên neinun chôi rangin phal khâi maka. 17 Hanchu mingei kôm han Pathien Lekhabua, “ ‘Ki Biekin chu namtinngei ta ranga chubaithona in ani,’ tiin ânziek nimak mo? Aniatachu nangni ngei rêkin chu inrungei inthupna in ke nin minchang hi!” tiin a minchu ngeia.+

18 Mahi ochaisingei le Balam minchupungeiin an rieta, masikin Jisua thatna rang lampui an rok zoia. Lokongei ha a minchuna hah kamâm aom sabak an ti sikin ama hah an chia.

19 Hanchu, kholoi ahongni lehan, Jisua le a ruoisingei hah khopuilien an mâk zoia.

Theichang kung renga inchuna

(Mat 21:20-22)

20 Anangtûk jînga chu ha lampuia an lôn chungin theichang kung hah aruzungngei dênin athîn an mua. 21 Peter'n neinun ahongtung ha a riet nôka male a kôm, “Minchupu, en ta theichang kung khomâk na sâm hah athi phar zoi!” a tia.

22 Jisua'n an kôm, “Pathien taksôn roi,” tiin a thuon ngeia. 23 Adiktakin nangni ki ril; tukhomin hi tâng hih, “Inthon inla tuikhangliena van pai roh” ti senla, mulunglâiinlakna boiin iemtakin a tiin chu, a ti anghan hongtung atih, ama rangin sinin om atih.+ 24 Masika han nangni ki ril: i-ih khom chubaithoa nin ngên ngei murdi chu maha nin man sai angin iem ungla, male nin zong ngei murdi chu pêkin om nin tih. 25 Male chubaitho ranga nin inding tika, “Tu chunga khom nourna nin dôn khomin ngâidam roi, masika han invâna nin Pa khomin nin minchâinangei hah nangni a ngâidam rang ani.”†+

Jisua rachamneina roia chongrekel

(Mat 21:23-27; Luk 20:1-8)

27 Jerusalema an tung nôka. Biekina a lônlâitakin ochaisingei, Balam minchupungei le upangei Jisua kôm an honga 28 a kôm, “Tu rachamin mo hi neinunngei hih ni sin? Ma anga rachamneina hi tumo nang pêk?” tiin an rekela.

29 Jisua'n an kôm, “Kei khomin chongbâi khat nangni rekel ka ta, male mi nin thuonin chu, tu rachamin mo hi neinunngei hih ki sin nangni ril ki tih, tiin a thuon ngeia. 30 Ni ril roi, John Baptisma tho theina racham hah kho renga mo: Pathien renga mo miriem renga mo?”

31 An lâia anninanâkin an inkhal phut zoia: “Imo ei ti rang? ‘Pathien renga,’ tiin ei thuon lakin, ama'n ‘Itho mo, John hah nin iem loi?’ Mi tîng a ta. 32 Aniatachu, ‘Miriem renga, ei tiin chu’ ” (Mitinin John hah dêipu tatakin an lei bê sikin, mipuingei laka an chia.) 33 Masikin Jisua an thuona chu, “Riet mak meh,” an tia.

Jisua'n an kôm, hanchu, “Kei khomin tu rachamin mo hi neinunngei hih ki sin nangni ril uol no ning,” a tipe ngeia.

* 11:3 Pumapa; aninônchu a pumapa. + 11:9 Lap 118:25,26 + 11:17 Isa 56:7; Jer 7:11 + 11:23 Mat 17:20; 1 Kor 13:2 † 11:25 “Mi nin ngâidam nônchu invâna nin Pa khomin nangni ngâidam no ni” a tia. Miziek senkhat ngeia chu mahi om mak (Mat 6:15 en roh.) + 11:25 Mat 6:14,15