Pathien Lekhabu Inthieng Chongtung Thar MATTHEW 1

Thurchisa

MATTHEW

Miziek dungjûiin

Chongmaruoi

Thurchisa Matthew miziek hin Jisua hih Sanminringpu leikhâm, Pathien chongtung muruoa mingei kôma a chong leikhâm a mintungna ani ti a misîr ani. Hi Thurchi Sa hih Jisua ânzirna le a omna Judangei ta rang vai nimaka, rammuol pumpui ta rang alei ni.

Matthew miziek hih singtheitaka minsûk ani. Jisua inzirna thurchi'n ânphuta, masuole chu a Baptis changna le methêmna a tongnangei a misîra, hanchu Galilee rama a sinthonangei lâkin, Thurchisa a misîrna, a minchûna le mi a mindamnangei a misîr ani. Masuole chu hi Thurchisa hin Galilee ram renga Jisua Jerusalema ava chai thurchingei le Jisua hapta nûktak, mangtie ngei, jêmdela a omna roi ngei le ânthoinôkna thurchingei azoiphar tena a miziek ani.

Hi Thurchisa hin Jisua hih Minchupu inthangtak, Pathien Balam rilminthâr theina rachamneipu le Pathien Rêngram roi mi minchu ngâipu ani ti a minlang ani. A minchûnangei chu chonglupui rangngân lâkkhôm thei ani: (1) Muol chunga a thurchi misîr, Invân Rêngrama mi nina ngei nunchan rang ngei, sintumngei, satvurnangei le tuontungna roi ngei a misîr (bung 5-7); (2) Ruoisi somleinik ngei sinthona rilnangei (bung 10); (3) Invân Rêngram chungroia chongmintêkngei (bung 13); (4) Ruoisi-nina omtie chungroia minchûna (bung 18); (5) Atûnlâi zora mongna rang le Pathien Rêngram juong tung rang roia minchûna (bung 24-25) ngei hih an ni.

Asûnga chongtângpuingei

Richisûina le Jisua Khrista inzirna 1:1—2:23

Baptispu John sinthona 3:1-12

Jisua Baptis changna le methêmna a tongna 3:13—4:11

Galilee rama mipui ngei ranga Jisua sintho 4:12—18:35

Galilee ram renga Jerusalema 19:1—20:34

Hapta nûktak le Jerusalem kôla 21:1—27:66

Pumapa inthoinôkna le ânlârnangei 28:1-20

Jisua Khrista richibulngei

(Luk 3:23-38)

1 Hi ngei hih Abraham jâisuon, David jâisuon Jisua Khrista richibulngei an ni.

2-6a Abraham renga Rêng David tena, anuoia anghin richibulngei hah adônin mintâng ani: Abraham'n Isaac a neia, Isaac'n Jakob a neia, Jakob'n Judah le a lâibungngei a neia; hanchu Judah'n Perez le Zerah a nei ngeia, (an nu chu Tamar ani) Perez'n Hezron a neia; Hezron'n Ram a neia, Ram'n Amminadab a neia, Amminadab'n Nahshon a neia; Nahshon'n Salmon a neia; Salmon'n Boaz a neia, (a nu chu Rahab ani) Boaz'n Obed a neia, (a nu chu Ruth ani) Obed'n Jesse a neia; Jesse'n Rêng David a nei ani. 6b-11 + David zora renga Israel mipui ngei Babylon suoka intânga an om tena anuoia anghin an richibulngei hah adônin mintâng ani: David'n Uriah lômnu leh Solomon a neia; Solomon'n Rehoboam a neia; Rehoboam'n Abijah a neia; Abijah'n Asa a neia; Asa'n Jehoshaphat a neia; Jehoshaphat'n Jehoram a neia; Jehoram'n Uzziah a neia; Uzziah'n Jotham a neia; Jotham'n Ahaz a neia; Ahaz'n Hezekiah a neia; Hezekiah'n Manasseh a neia; Manasseh'n Amon a neia; Amon'n Josiah a neia; Josiah'n Jehoiachin le a lâibungngei a nei ngei ani.

12-16 Hanchu, Babylon suoka an intâng suonûk renga Jisua suok tena hi anuoia angin richilbulngei adônin mintâng ani: Jehoiachin'n Shealtiel a neia; Shealtiel'n Zerubbabel a neia; Zerubbabel'n Abiud a neia; Abiud'n Eliakim a neia; Eliakim'n Azor a neia; Azor'n Zadok a neia, Zadok'n Achim a neia; Achim'n Eliud a neia; Eliud'n Eleazar a neia; Eleazar'n Matthan a neia, Matthan'n Jacob a neia; Jacob'n, Joseph, Mary inneipuipu hah a neia; ha Mary renga han Jisua Messiah an ti hih ajuong inzir ani, 17 Masikin, Abraham renga David tena ruol sômleiminli ania; David renga Babylon tieng suoka an tuong ngei tena ruol sômleiminli ania; ma renga hah Messiah ânzir tena ruol sômleiminli ani.

Jisua Khrista ânzirna roi

(Luk 2:1-7)

18 Mahih Jisua Khrista ajuong inzir tie chu ani. A nu Mary hah Joseph han ava bieka, in-annei mân, Ratha Inthiengin nâi a vonga,+ 19 Joseph hah zoratina mi diktak ani sikin mipui rietin Mary hah mâimôkshak rang nuom maka; masikin inrûktên an inbiekna setin mâkchien rangin a mintuo ani. 20 Hima roi hah a mindon lâitakin, a ramangin Pumapa Vântîrton inkhat a kôm a juong inlâra, a kôm han, “Joseph, David jâisuon, Mary hih lômnua nei rang chi no roh. Amanu nâivong hih Ratha Inthieng renga kêng ani. 21 Amanu han Nâipasal nei a ta, male a riming Jisua ni phuo rang ani. Ama han a mingei an nunsienangei renga a sanminring ngei rang sikin,”+ a tia.

22 Atûn hin Pumapa'n dêipu manga a lei misîr hah adikin ahong tung theina ranga hima ngei murdi hih ahong oma, 23 “Dôngmate inthienghiei hah inrâi a ta nâipasal nei atih, male a riming Immanuel phuo an tih,” (ma omtie chu, “Ei kôm Pathien aom tina ani.”)+

24 Masikin, Joseph ânthoi lehan, Pumapa vântîrtonin a tipe anghan, Mary hah lômnûn a nei zoi. 25 Aniatachu, a nâivong hah a nei mâka chu ompui mah. Hanchu, Joseph'n a riming hah Jisua a phuo zoi ani.+

+ 1:6b-11 2 Rêng 24:14-15; 2 Rich 36:10; Jer 27:20 + 1:18 Luk 1:27 + 1:21 Luk 1:31 + 1:23 Isa 7:14 (LXX) + 1:25 Luk 2:21