Pathien Lekhabu Inthieng Chongtung Thar MATTHEW 5

Muol chunga A chongril

1 Jisua'n loko ngei hah a mûn chu muol chunga a kala, mahan ânsunga. A ruoisingei a kôla an hong intûpa, 2 male anni ngei hah a minchu phut zoi:

Satvurna dik

(Luk 6:20-23)

3 “Ratha tienga inrienga ânriet ngei chu satvur anni;

Invân Rêngram an ta ani sikin.

4 Rathanvâingei chu satvur anni;+

Pathien'n rathanngamna a pêk ngei rang ani!

5 + Rangâiinchînngei chu satvur anni;

Pathien chonginkhâm an la man rang ani!

6 + Pathien'n a minnângngei sin ranga ôina lientak dônngei chu satvur anni;

Pathien'n mulungchukna a pêk ngei rang ani!

7 Mulungjûrpuina dôn ngei chu satvur anni;

Pathien mulungjûrpuina an chang rang ani!

8 Mulung inthiengngei chu satvur anni;+

Pathien an la mu rang ani!

9 Inngêina ranga sintho ngei chu satvur anni;

Pathien'n ama nâingei tiin a la koi ngei rang ani!

10 Pathien'n a minnângngei sin sikin nuomlona tuong ngei chu satvur anni;+

Invân Rêngram an ta ani!”

11 “Ku nûkjûingei nin nina sika min nangni an êroa, an nunuom nangni an loa, milak saloi ngeiin nangni an nôn tika chu satvur nin ni.+ 12 Nin râiminsân ungla, nin ta rangin râisânman lientak invâna darin aom sikin. Nin motona lei om dêipungei hah khom nunuomlona an lei tuong ngâi ani.” +

Michi le vâr

(Mk 9:50; Luk 14:34-35)

13 + “Mitin ta rangin michi angin nin ni. Aniatachu michi hih a âlna ahong dongin chu min âl nôk thei ni khâi mak. Mangmunboi ahong changa, masikin an paia, mingeiin an sirpol ngâi ani.

14 “Nangni ngei hah rammuol pumpui rangin vâr angin nin ni. Tângsîpa khopui aom chu inthup thei ngâi mak.+ 15 Tutên châti mochokin khuriâi nuoia dar ngâi mak ngei; manêkin chu in sûnga mi murdi a êlminvârna rangin châtidarna kêng an dar ngâi ani.+ 16 +Ma angdên han nin vâr hah mingei makunga vâr ngêt rese, hankêng nin neinun sa tho ngei hah mûng an ta, male invâna om nin Pa minpâk thei an tih.

Balam chungroia minchuna

17 “Moses le Dêipungei Balam minchûnangei minboi ranga juongin ni be no roi. Ma ngei hah minboi ranga juong ni mu-unga, an minchûnangei ajuongtung dikna ranga kêng ki ni. 18 Pilchung le invân a om kâr chu Balam chong ânziek ahâng chînte mo, miziek dukriekte mo hi boi no nih, neinunngei murdi mongna ahongtung mâka chu*+ ti hi riettit roi. 19 Masikin tukhomin hi chongpêkngei lâia achîntak khom jômloiin, ma angdênin tho sa rangin midangngei khom a minchûn chu invân Rêngrama chu mi chîntak nîng a tih. Nikhomrese tukhomin Balam a jôma, ma angdênin tho sa rangin mi a minchûa anin chu invân Rêngrama chu mi lien nîng a tih. 20 Hanchu, Pathien lungdo sinna lama Balam minchupungei le Phariseengei nêkin taksôn-omin nin om vaiin kêng invân Rêngrama nin lût thei rang tiin nangni ki ril ani.

Taksina chunga minchûna

21 “Tienlâia mingei kôm chu, ‘Mi that no roh; tukhom mi that chu roijêkna makunga inding a tih,’+ tiin an ril ngâi ti nin riet. 22 Ania, atûn keiman chu: Tukhom a lâibungpa chunga a taksîn† chu roijêkna makunga tuongin om a tih, tukhom a lâibungpa kôm, ‘Mangmunboipa!’ ti chu roijêkna makunga tuongin om a tih, male tukhom a lâibungpa kôm mangmunboi, amopa ti chu meidîla se rangin ichi aom ani. 23 Masikin mâichâm motona Pathien kôm neinunpêk ne pêk rang lâitak khomin na lâibungpa'n nu chunga mulung hoiloina a dôn iti ni riettitin chu, 24 mâichâm motona ne neinunpêk ne pêk rang hah mâk inla, inrangin sênla, na lâibungpa leh inngêina va sin bak inla, masuole chu hongkîr nôk inla Pathien kôma ne neinunpêk rang hah pêk roh.

25 “Mîn dabi thôn nang an doia roijêkna muna nang an tuongin chu zora ala om sûngin nin bâiinkhamna hah inngêipui roh, roijêkna mun nin tung mân. Amuna voikhat pai na va tungin chu, ama'n roijêkpu kuta nang bâng a ta, misûrngei kuta nang bâng a ta, male jêl-ina khum nini rang ani. 26 Nangni ki ril, poisate tena luo lei nu thuon mâka chu ma muna han om tit ni tih.

Inrê chungroia minchûna

27 “Inrê no roh,+ an lei ti hah nin riet. 28 Ania, atûn Keiman chu: tukhomin nupang midit enin a ena, amanu hah luo rang a nuomin chu a mulungrîla amanu leh han an inrêa, theiloi changin aom zoi, tiin nangni ki ril ani. 29 + Masikin ni mit chang tieng han nang aminpalin chu kêlpai inla, vôrpai kelen roh! Na takpum, pumpuia meidîla se nêkin chu na takpuma abâk inkhat ânsam hah chu nata rangin asa uol. 30 + Nu kut changtieng nang aminpalin chu tanpai inla, pai kelen roh! Na takpum, pumpuia meidîla se nêkin chu na takpuma abâk inkhat ânsam hah chu nata rangin asa uol ani.”

Inmâkna chungroia minchuna

(Mat 19:9; Mk 10:11-12; Luk 16:18)

31 + “ ‘Tukhom a lômnu a mâkin chu mâkna lekha a pêk rang ani,’ an ti sa. 32 + Hannirese atûn Keiman chu: tukhom pasalin a lômnu hah roi danga niloiin, taksôn omloina sika a mâka anin chu a lômnu hah inrê a minchang ani; male mi lômnu mâksai inneipui nôkpu chu amanu hah a inrêpuiin theiloi a changsa ani, ti nangni ki ril ani.

Inkhâmnangei chungroia minchuna

33 “Tienlâia mingei kôm chu, ‘No chonginkhâm hah set nôn la, Pumapa makunga nên khâmna hah tho roh,’ an ti, tiin nin riet sa.+ 34 Aniatachu atûn keiman chu, chonginkhâm nin sin zorân inkhâmna ite mang no roi. Invân sâmin khom, khomâkinsâm no roi, Pathien Rêngsukmun ani sikin;+ 35 pilchung sâmin khom, khomâkinsâm no roi, a ke darna ani sikin. Jerusalem sâmin khom, khomâkinsâm no roi, ma khi Rêng roiinpuitak khopui ani sikin.+ 36 Nin lu sâmin khom khomâkinsâm no roi, samsang inkhat luo hih nin minchek thei le nin minhâng thei aom loi sikin. 37 ‘Ani’ nônchu ‘Nimak’ vai ti roi, mapêna nin ti hah chu Saloipa Inkhat renga hong kêng ani.”

Phubaluok chungroia minchuna

(Luk 6:29-30)

38 “ ‘Mit ruthûla mit,’ ‘hâ ruthûla hâ,’+ an ti hah nin riet. 39 Aniatachu atûn keiman chu: nin chunga asaloi tho ngei chunga phubaluok no roi. Tukhomin ni bieng chang tieng a bênin chu, voi tienga ni bieng khom minbên sa roh. 40 Tukhom nu sûng kancholi lâk rang a râivala roijêkna muna nang tuong rang a bôkin chu na kâncholiinchuol khom pêk sa roh. 41 Mi'n a puok kilometer khat pêl rangin nang a tiin chu kilometer inik pêlpe roh. 42 Mi'n neinun imini nang a zong zorân chu, maha a kôm pêk roh; mi lâkâi nang a zongpu hah lei min pûk roh.”

Râlngei ranga lungkhamna

(Luk 6:27,28,32-36)

43 “Na malngei lungkham inla, na râlngei mumâk roh,”+ an ti iti nin riet. 44 Aniatachu atûn keiman chu: nin râlngei lungkham ungla, an nunuom nangni lo ngei hah chubai tho pe roi, 45 masikin invâna nin Pa nâingei nin hongni theina rangin. Ama'n misiengei le misangei chunga a nisa hah ân-angbangin a min suok ngâia, asa sinngei le asie sinngei chunga khom ruo a min juong pe ngei ngâi. 46 Nang lungkhamngei vai nu lungkham ngeiin te ithomo Pathien'n râisânman nang a pêk ranga? Mahah chu sum rusuongpungei khomin an tho ngâi! 47 Hanchu, nin malngei kôm vai nin chongin te imo aliek nin tho uola? Mahah chu sonongngei khomin an tho ngâi! 48 Invâna nin Pa asa akipphar anghan nangni khom nan satna hah akipphar ngêt rang ani!+

+ 5:4 Isa 61:2 + 5:5 Lap 37:11 + 5:6 Isa 55:1,2 + 5:8 Lap 24:3-4 + 5:10 1 Pet 3:14 + 5:11 1 Pet 4:14 + 5:12 2 Rich 36:16; Sin 7:52 + 5:13 Mk 9:50; Luk 14:34,35 + 5:14 Joh 8:12; 9:5 + 5:15 Mk 4:21; Luk 8:16; 11:33 + 5:16 1 Pet 2:12 * 5:18 neinunngei murdi mongna; aninônchu an minchuna ngei murdi ahong tung dik mâka. + 5:18 Luk 16:17 + 5:21 Jôk 20:13; Bal 5:17 † 5:22 Tukhom a lâibungpa chunga a taksîn; miziek senkhatngei chu tukhom taksi thona om loiin. + 5:27 Jôk 20:14; Bal 5:18 + 5:29 Mat 18:9; Mk 9:47 + 5:30 Mat 18:8; Mk 9:43 + 5:31 Bal 24:1-4; Mat 19:7; Mk 10:4 + 5:32 Mat 19:9; Mk 10:11,12; Luk 16:18; 1 Kor 7:10,11 + 5:33 Och 19:12; Tel 30:2; Bal 23:21 + 5:34 Jak 5:12; Isa 66:1; Mat 23:22 + 5:35 Isa 66:1; Lap 48:2 + 5:38 Jôk 21:24; Och 24:20; Bal 19:21 + 5:43 Och 19:18 + 5:48 Och 19:2; Bal 18:13