Pathien Lekhabu Inthieng Chongtung Thar 1 Timothy 2

Koiindang inkhômna chang

1 Hanchu, amotontaka, ngênna chubaithonangei, invûinangei, le râisânchong rilnangei hih mingei murdi ta rangin Pathien kôm pêk pe ngei rangin nangni ke ngêna; 2 rêngngei le adang rachamnei ngei murdi ta rang khom, dâiriem le inngêitaka Pathien tienga mân thona murdi le nunchan diktak leh ringnun manga ei om theina rangin. 3 Mahi asa, le Pathien mi Sanminringpu râisân ruo piel ania: 4 ama'n mi murdi sanminringa an om rang le chongtak an riet rangin a nuom ngâi ani. 5 Pathien hih inkhat vai aoma, male Pathien le miriemngei minchunpu inkhat vai aom nôka, miriem Khrista Jisua hah, 6 miriem jât pumpui ratanna ranga ân pêkpu hah ani. Maha Pathien'n mi murdi sanminring rangin a nuom ti azora taka riet minthâr ani, 7 male masika han kêng keima hi taksônna le chongtak thurchi phuong rangin, Jentailngei kôm tîrton le minchupua tîr ki ni. Milak tho mu unga; chongtak kêng ki ril!+

8 Koiindang inkhôm tina pasal Pathiena ânpêk ngeiin an kut inthieng ngei pharin, takminsi loiin le inkhal loiin chubaitho senla ngei ku nuom ani. 9 Ma angdênin, nupangngei khom sillebomngei ahundôr le satak le balam takin invo senla ngeia, samphierin mini, rângkachakin mini, lungmantamin mini, rovo mantamin mini invo no rese ngei ku nuom sa,+ 10 hannirese, nupang sakhuotienga mi inti ngei ha chu an inhoi lam takin sin sân invo rese ngei. 11 Nupangngei chu dâirekin le rangâiinchîna murdi'n an inchu rang ani. 12 Mi minchu rangin mini, aninônchu pasal chunga rachamnei rangin mini phal mu unga; an dâirek ngêt rang ani. 13 Asikchu Adam hah sin bak ania, male kêng Eve hah sin ani.+ 14 Male huonga om hah Adam nimaka; nupang ha ke huongin aoma, Pathien balam a siet ani.+ 15 Aniatachu nupang hah nâingei* a neina sikin sanminringin om atih, taksônna le lungkhamna male inthiengna ngei leh inpâkpuiloiin duoiloiin a tuongdier ngâiin † chu.

+ 2:7 2 Tim 1:11 + 2:9 1 Pet 3:3 + 2:13 Aph 2:7; 2:21,22 + 2:14 Aph 3:1-6 * 2:15 nâingei a nei sikin sanminringin om atih; aninônchu nâi a neina jârin minring nîng atih. † 2:15 a tuongdier ngâiin chu; aninônchu an tuongdierin chu.