21
Cee hinkantoo kaŋ Ayuba na Sofar zaabi
1 Ayuba zaabi ka nee:
2 «Wa haŋajer ka boori ay šenney se,
wa woo de tee ya ne ay binoo ma yay.
3 Wa naŋ ya šelaŋ,
nda ay šelaŋ, nʼga hin kʼay ɲooɲo.
4 Agay, adamize no ay gʼa wurru wala?
Adiši, macin se ay ga suuri?
5 Wa bere kʼay guna, war ga kayfi,
wa war kabey daŋ war miɲey ga.
6 Nda ay hongu a, ay ga hunbur,
ay gaahamoo ga jijiri.
7 Macin se boro futu ga huna?
Macin se i ga žen, ngi gaaboo ga tonton?
8 Ngi hayroo gaaboo ga tabati i bande i jine,
Ngi haamawey gaaboo ga tabati moɲey cire.
9 Ngi hugey goo alaafiya ra, hunburay si duu ey,
Irkoy goboo sʼi kar.
10 Nga yaaroo ga gooru, baffoo si duu a,
nga hawoo ga hay, gundoo si hasara.
11 Ngi zankey ga zuru-zuru sanda alman-izeyaŋ,
ngi izey ga hooray taka kaŋ nda i baa.
12 I ga don dunduŋey nda kuntijey bande,
laatey hẽeney gʼi ɲaalandi.
13 Ngi hunaroo ga ben gomni ra,
dogoo din da i ga zunbu alaahara.
14 Ka gar i mma nee Irkoy se: ‹Hibi ir ga,
ir si baa ir ma ni fondawey bay.
15 Macin ti Hini-kul-koyoo hala ir mʼa gana?
Macin no nga ŋaarayroo gʼa hanse ir se?›
16 Šikka sii ngi gomnoo sii kabey ra,
yala boro futu hoyraa ma mooru agay!
17 Amma waati boobo boro futu mma dii fitillaa ga buu wala?
Bone mma zunbu i ga
hala Irkoy mʼi noo ngi bagaa nga futuroo ra wala?
18 Yala i ma hima nda subu kaŋ hewoo gʼa zaa,
sanda kokoši kaŋ hew beeri gʼa zaa.
19 A harandi kaŋ zukandoo kaŋ nda boro futu ga hima,
Irkoy gʼa jisi izey se.
A mma hima ka banandi nga hunday ra, woo ra moɲey ga hay.
20 Moɲey ga hima ka dii nga bonaa,
nga ga Hini-kul-koyoo futuroo ga hima ka zunbu.
21 Macin no nga hugoo ga kate a se nga dumaa ga,
waati kaŋ nga aloomur kaccaa too nga kaydogoo ga?
22 May no ma hin ka Irkoy noo fahamay,
nga kaŋ ga boro jerantey ciiti?
23 Boro fooyaŋ ga buu nda ngi gaaboo,
i si alhuzun, biney ga kan,
24 i ga naasu, i ga warga,
ngi birey ga too nda londi.
25 Boro tanayaŋ ga buu nda binedooray,
bila nda i ma gomni taba.
26 Cere bande i ga kani laboo cire,
nooney goo i se nongoo kul here.
27 Guna, ay ga war miilewey bay,
nda war anniyawey kaŋ nda war gʼay tooɲe.
28 War ga nee: ‹Man boraa kaŋ ga gaabi daŋ borey ga hugoo?
Man hugoo kaŋ ra boro futawey cindi?›
29 War mana bisakey hãa wala?
War mana yadda ngi seedetarawey ga wala?
30 Bone zaari hane, boro futu ga hallasi,
futay zaari hane, haya si duu a.
31 May ma yadda ka kay a jine ka nga takaa har a se?
May no ma nga teegoyey bana a ra?
32 I koy nda a saarawey ra,
i ga nga saaraa hawgay.
33 Gooroo labudiinoo ga ban a se,
borey kul goo dumaa ga,
boroyaŋ kaŋ si kabandi kaa a jine.
34 War bineyaynandi šenney si haya kul hanse ya ne!
Hayaa kaŋ cindi war zaabey ra ti zanbayaŋ.»