29
1 Ayuba yee koyne ka tonton nga šennoo ga ka nee:
2 «Hay, nda a gar ba ya mma hin ka yee ay handu bisantey takaa ga,
jirbey kaŋ Irkoy gʼay lakkal,
3 waatey kaŋ ra a ga nga fitillaa diinandi ay boŋoo boŋ
nga gaayoo ra ay ga dira kubaa ra!
4 Takaa kaŋ ay cindi ka ti a waatoo kaŋ ay tee aru,
waatoo din Irkoy ceretaraa gʼay hugoo lakkal.
5 Waatoo din Hini-kul-koyoo goo ay bande,
ay zankaarey gʼay kuubi ka bere.
6 Waatoo din jii nda waa ga tee ay do sanda hari.
7 Waatoo din ay fatta ka koy koyraa miɲoo ga
de ay gʼay gorodogoo tee farroo ra.
8 Nda aru soogey dii agay, i ga tugu,
aru žeeney ga tun ka kay.
9 Boŋkoyney ga ngi šenney kayandi
de i ga ngi kabey daŋ ngi miɲey ga.
10 Boro beerey ga dangay,
ngi deeney ga denji dankawey ga.
11 Waatoo din boro kaŋ ga maa ay jindoo
ga nee kaŋ ay duu gomni,
moo kaŋ dii agay ga seedetaray tee ay ga.
12 Zama talka kaŋ ga kaati ka faaba ceeci,
ay ga nga tilasoo kaa a ga,
alyatim kaŋ sii nda faabakaw, ay gʼa faaba.
13 Boro kaŋ ga baa ka buu ga gaara ya ne,
ay ga woyoo kaŋ kurɲoo buu binoo ɲaalandi.
14 Ay si daabu nda kala šerretaray, ay bankaaraa no.
Ay cimoo ti ay burmusoo nda ay fatalaa.
15 Ay tee moo danaa se,
nda cee bongey se.
16 Ay tee talkey se baaba,
borey kaŋ ay sʼi bay, ay ga ngi misoo guna.
17 Ay ga borey kaŋ si šerre warkandawey kayri
ka hamoo kaa hiɲey ra.
18 Ay ga nee ay boŋ se kaŋ ay ga buu ay hugoo ra,
agay aloomuroo hinnaa ga too labutaasi gurunbey.
19 Ay linjey ga koy haroo here,
harandaŋoo ga cijinoo tee ay fitawey ga.
20 Waati kul ay ga duu darža taaga
ay biraa ga duu gaabi ay kaboo ra.
21 Waatoo din borey gʼay batu ka haŋajer ya ne,
i ga dangay ka maa ay hoyraa.
22 Ay šenney si kakawandi,
ay meešenney zunbu borey ga
sanda ncirɲi kaŋ ga loti laboo ga.
23 I gʼay batu sanda takaa kaŋ nda boro ga ncirɲi batu,
i ga miɲey hay sanda boro kaŋ ga ncirɲi jinaa ga kaŋ.
24 Ay haaraa ga tee i se boŋhaway,
haya kul sʼay ganji agay ndumoo ma feeri i se.
25 Ay tee i se jineboro
ka fondaa cebe i se kaŋ bande i ga hima ka dira,
ay ga goro i game sanda kokoy kaŋ goo nga wongu-izey gamey ra,
sanda boro kaŋ ga borey kaŋ biney ga hẽe biney yaynandi.»