31
1 «Amaana no ay daŋ agay nda ay moɲey game
kaŋ ay sʼay moɲey kanji
woy soogo ra kaŋ si aru bay kʼa boonay.
2 Nda manʼti woo, macin ti bagaa kaŋ Irkoy kaŋ goo beenaa ra gʼa jisi ya ne?
Macin ti tuboo kaŋ Hini-kul-koyoo gʼa sanba ya ne ka hun beenaa ra?
3 Bone si kaŋ boro laaley ga wala?
Balaawu si kaŋ goy futu teekey ga wala?
4 Irkoy si dii ay dira takaa wala?
A sʼay cee diraa kul kabu wala?
5 Ay ga doona ka taari wala?
Ay ga cahã ka zanba wala?
6 Irkoy mʼay neeši nda neešihaya cimi!
Woo ra a ga dii kaŋ ay ga laadir.
7 Nda ay cewey šiiri ka hun fondaa ga,
nda ay binoo hanga ay moɲey alhawaa bande,
nda teegoy laala nʼay kabey žiibandi,
8 yala boro tana ma haya ŋaa kaŋ ay nʼa duma,
wala ay faaroo ma dogandi ka hun laboo ra!
9 Nda ay binoo nka hanga woy waani,
de ay nʼay taalammaa hugoo miɲoo monno,
10 yala ay wandoo ma tam goy tee boro tana se,
de aru tanayaŋ ma kani nda a!
11 Nda woo tee, ay na laybu haawinte tee,
almuhal kaŋ ciitikey gʼa zukandi.
12 Agay almuhaloo tee sanda nuune
kaŋ gʼay diinandi hala guusu futaa ra,
ka haya kul kaŋ ay duu a halaci.
13 Kakaw kaŋ huru
agay nda ay tamoo wala ay koŋŋaa game,
zama ya na ngi alhakoo guna,
14 nda Irkoy na šennoo din tunandi, macin no ay ga nee?
Nda a nʼay hãa, macin nda ay gʼa zaabi?
15 Koy follokaa no kaŋ nʼir kul tee,
agay nda ngi kul ir ɲaa gundoo ra.
16 Ya nka wanji yalaafante ŋaarayroo,
wala ka woy kaŋ kurɲoo buu naŋ a gay a ga batu, ya nʼa faaba wala?
17 Ya nkʼay ŋaahayaa ŋaa agay foo
bila nda ya alyatimoo bagaa kaa wala?
18 Za ay zankataray ya nka tee i se
sanda baaba kaŋ jeroo ga i ga goro,
za ay huru aduɲɲa ra, ay ga lakkal daŋ woy kaŋ kurɲoo buu se.
19 Nda ya nka dii alfukaaru kaŋ sii nda bankaaray,
wala talka kaŋ sii nda gumtaafe, ay nʼi naŋ
20 bila nda ay mʼi noo ay feejey haaboo gumtaafe
kaŋ nda i ga gum,
i ga gaara ya ne wala?
21 Nda ay kaboo bay ka too alyatim do,
zama ciitikey ti ay cerey,
22 yala ay jesoo ma hun ay dumaa ga,
ay kabe hankoroo ma kayri!
23 Zama ay ga hunbur Irkoy bonaa,
ay si hin ka haya tee nga kokoytaraa jine.
24 Ya nkʼay naanaa daŋ wura ra,
ya nka nee wura alhakiika se: ‹Ay ga wakkal ni ga›, wala?
25 Ya nka fooma nda agʼarzakaa,
nda almanoo kaŋ ay kabey nʼi noo ya ne wala?
26 Nda ay na waynaa gaayoo nereroo guna,
de ay na handoo guna kaŋ ga dira nga daržaa ra,
27 ay binoo nkʼay derandi tuguyan ra,
kʼay kaboo daŋ ay miɲoo ga kʼi summu wala?
28 Nda ay na woo tee, nga mo laybu no kaŋ ga hima nda ciiti,
ay na Koyoo kaŋ goo beenaa ra zanba!
29 Ya nka ɲaali nda agay iberoo bonaa wala?
Ya nka yafarhã, zama ifutu duu a wala?
30 Ya na yadda ay miɲoo ma zunubu tee,
kʼa danga hala a ma buu!
31 Borey kaŋ goo ay hugoo ra mma nee:
‹May bara ni hugoo ra kaŋ mana kungu ham?›
32 Ya na bay ka naŋ yaw ma kani lolaa ra,
ay hugoo miɲoo ga hay dirakey se.
33 Ya nkʼay hooyaney tugu sanda takaa kaŋ Adama bay kʼa tee wala?
Ya nkʼay layboo tugu ay ziibaa ra wala?
34 Ya mma hunbur jamaa miɲey,
wala ay borey mʼay fur,
ya mma tee suk, ay si fatta nda hugoo miɲoo wala?
35 Jalla, nda a gar boro goo no kaŋ ga haŋajer ya ne!
Woo ti ay šenni kokorantaa.
Yala Hini-kul-koyoo mʼay zaabi!
Torceyanoo kaŋ agay nkuwaa nʼa tee ya ne,
36 ay gʼa fur ay jesoo ga,
ay gʼa daŋ sanda kokoy fuula.
37 Ay gʼay teegoyey kul laasaaboo tee a bande.
Ay ga man a sanda boŋkoyni.
38 Nda a gar ay faaroo nka kaati ay ga,
de nga nda nga nonguyaŋ na munday doori ay sabbu se,
39 ya nka nga hegaa ŋaa kaŋ ya nʼa bana,
ka nga koyey tammahãa kaa wala?
40 Yala karji ma zay ya ne alkama dogoo ra,
subu futu ma zay ya ne oržoo dogoo ra!»
Ne ga Ayuba šenney ben.