34
Cee hinkantoo kaŋ Elihu na šennoo zaa
1 Elihu tonton nga šennoo ga ka nee:
2 «Lakkalkoyney, wa haŋajer ay šenney se!
War kaŋ goo nda bayray,
wa war haŋawey kayandi hayaa kaŋ ay gʼa har se!
3 Takaa kaŋ nda mee ga maa ŋaayan tenbaa,
takaa din da haŋa ga šenney kaa cere ra.
4 Woo ga, ir ma hayaa suuba ir boŋ se kaŋ ti cimi,
cere bande ir ma hayaa bay kaŋ ga boori.
5 Zama Ayuba ka nee kaŋ nga ga henan,
amma Irkoy na nga cimoo taa nga kone.
6 Nga goo nda cimi, a na nga tee taariharkaw,
nga ga henan, a na nga maray ka nga wii.
7 Boro mma goo no kaŋ ga hima nda Ayuba
kaŋ ga ɲooɲoyan haŋ sanda hari,
8 a goo borey kaŋ ga šerretaray jaŋay tee margaroo ra,
a ga dira boro laaley bande?
9 Zama a nee: ‹A si baffoo hanse adamize se
a ma ceeci ka kan Irkoy se.›
10 Woo se adamize lakkalkoyney, wa haŋajer ya ne!
Irkoy nda goy futu ga mooru cere.
Hini-kul-koyoo nda šerre jaŋay ga mooru cere.
11 A ga adamize bana ka sawa nda nga teegoyey,
a ga boro foo kul dii nda nga dira takaa.
12 Nda cimi, Irkoy si ifutu tee,
abada Hini-kul-koyoo si ciiti šiirandi.
13 May ka laboo talfi a ga?
May ka aduɲɲa daŋ kaboo ra?
14 Nda a gar Irkoy si hongu kala nga boŋ hinne,
nda a kate nga ga nga Hundoo nda nga hunsaroo,
15 hayey kul hundey ga hun cere bande,
adamize ga yee laboo ra.
16 Nda ni goo nda lakkal, haŋajer woo se,
ma lakkal daŋ ay šenney se!
17 Boro kaŋ ga konnay cimi ga hin ka laama wala?
Nʼga Boro Šerrante zukandi kaŋ ti Hinikoyoo wala?
18 Nga hinne no ma nee kokoy se: ‹Furku›,
ka nee boŋkoyney se: ‹Boro laala›.
19 A si boŋkoyni ndumoo guna,
a si almankoyni daŋ talka jine,
zama nga kabey ka ngi boro hinkaa kul taka.
20 I ga buu dogoo din da,
cijin bine jama ga tun ka ture,
woo banda ga, i ga dere.
Gaabikoyni ga hibandi bila boro kabe ma too a do.
21 Zama Irkoy ga dii adamize fondawey,
a ga nga cee diraa kul laasaabu.
22 Kubay biboo nda buuyan biyoo kul sii no
kaŋ ra borey kaŋ ga šerretaray jaŋay tee ga hin ka tugu.
23 A si too Irkoy ma adamize koroši waati kuku jina
ka duu kʼa ciiti.
24 A ga hinikoyey kayri bila a ma ceeniine diray tee,
a ga boro daŋ dogey ra,
25 zama a ga ngi teegoyey bay.
Cijin folloku a gʼi bere kʼi motti.
26 A gʼi kar borey jine
sanda boro laalayaŋ.
27 Zama i nka fay nda kʼa gana,
de i mana faham nga fondawey kul se.
28 I na yalaafante hẽenoo ka too a do,
a ga maa zarabantey hẽenoo.
29 Nda Irkoy na alaafiya noo, may no ma Irkoy zukandi woo se?
Nda a na nga ndumoo tugu, may ma hin ka dii a?
Gandawey wala adamizey,
30 a si baa boro kaŋ si hunbur Irkoy mʼi laama,
a masi tee kumsay jamaa se.
31 Nda boro nee Irkoy se:
‹Ay nʼay zukandoo muɲe, ay si yee koyne ka ifutu tee.
32 Haya kaŋ ay si dii a, a cebe ya ne,
nda ay na laybu tee, ay sʼa filla koyne›,
33 Irkoy mma boro bana ka sawa nda boraa ibaayoo wala?
Ni ka si yadda a ga.
Ni no ma suuba, manʼti agay no!
Aywa, hayaa har kaŋ nʼgʼa bay!
34 Adamize lakkalkoyney
nda boro fahamantey kaŋ ga haŋajer ya ne ga nee ya ne:
35 ‹Ayuba si haya bay kaŋ nga gʼa har,
nga šenney sii nda addalil.
36 Ayuba ma siyandi hala kaydogoo ga,
zama a ga šelaŋ sanda boro laala!
37 A ga tureyan tee ka tonton nga zunuboo ga,
a ga kobi nda foomayan ir game,
a ga šenni boobo har Irkoy ga.›»