36
Cee taacantoo kaŋ Elihu na šennoo zaa
1 Elihu koy a ga ka šelaŋ, a nee:
2 «Ay batu kayna, ay ga ni fahamandi,
zama haya goo ay do kaŋ ay ga baa yʼa har ma ne Irkoy sabboo se.
3 Ay gʼay bayraa ceeci nongu mooro ra
ka šelaŋ kʼay Takakaa noo cimi.
4 Zama nda cimi, ay šenney manʼti taari,
boro kaŋ goo nda lakkal timmante bara ni jere.
5 Irkoy goo nda hini, a si konna boro kul,
a goo nda hini, haya kaŋ a nʼa kayandi si tun.
6 A si naŋ boro laala ma huna,
a ga zarabantey noo cimi.
7 A si nga moɲey kaa boro šerrante ga,
a gʼi gorandi kokoyey bande fuulaa ra,
a gʼi gorandi kʼi tabatandi hala i ma jer.
8 Nda guuru karfuyaŋ huru i ga,
nda i huru bone ra,
9 woo ra Irkoy ga ngi goy futaa har i se
nda ngi tureyanoo waati kaŋ i bolsay.
10 A ga haŋawey feeri i ma maa nga gagayroo se,
a ga nee i se kaŋ i ma fay nda ifutu.
11 Nda i na haŋajer ka boŋdum,
i ga ngi hunaroo benandi gomni ra,
ka ngi jiiri korawey benandi kaani ra.
12 Nda i mana haŋajer, yaaji gʼi halaci,
i ga buu bayray jaŋay ra.
13 Borey kaŋ si hunbur Irkoy mma ngi boŋ noo futay se,
i si kaati ka faaba ceeci waati kaŋ a nʼi gaala.
14 I ga buu ngi soogataraa ra
arey kaŋ ga zinaa tee game.
15 Amma a ga zarabantaa zaraboo kʼa feeri,
farayan nda a ga nga haŋaa feeri kʼa cawandi.
16 A ga ni kaa šiitaroo ra,
a ga ni feeri bila a ma ni zaa ka kay,
ŋaayan henna ga boobo ni ŋaadogoo ra.
17 Amma ni zukandi sanda boro laala,
ciitoo zukandoo ga too ni.
18 Masi naŋ ni futuroo ma ni daŋ wowyan ra,
yala sufurawey booboyanoo masi ni kaa cimoo ga.
19 Ni kaatiroo ka faaba ceeci ga ni kaa zarabi ra wala?
Ni gaaboo ga wasa wala?
20 Masi cahã cijinoo ma too
kaŋ ga jamayaŋ kaa dogey ra.
21 Hawgay masi bere ifutu here,
woo ti haya kaŋ nʼnʼa suuba ni binemaraa maaganda.
22 Nga ne, Irkoy hinoo ga beeri,
may ti cawandikaw sanda nga?
23 May no ma hin ka hayaa a har a se kaŋ a mʼa tee?
May no ma hin ka nee a se: ‹Woo kaŋ nʼnʼa tee mana boori›?
24 Lakkal tee ka Irkoy teegoyey beerandi,
kaŋ adamizey gʼi don.
25 Boro kul ga dii a,
adamize gʼa honnay nongu mooro ra.
26 Nga ne, Irkoy ga beeri, amma ir mana faham woo se,
nga jiirey hinna si kabandi.
27 Nga no ma hari lotey cendi i ma žigi beene
kʼi sosogu i ma tee ncirɲi ka kaŋ.
28 Duulawey ga haroo naŋ a ma kaŋ,
i gʼa doori adamizey jamaa ga.
29 May no ma faham duulawey takaa se,
nda takaa kaŋ nda nga gorodogoo ga jiŋjiŋ?
30 Guna takaa kaŋ nda Irkoy ga nga gaayoo sanba a ga,
a ga teekoo guusey daabu.
31 Hayey wey nda a ga gandawey ciiti,
a ga hunay boobo noo.
32 A ga meloo dii nga kabey ra,
kʼa sanba nongoo kaŋ ra a ga hima ka koy.
33 Jiŋjiŋyanoo jindoo ga nga kaaroo har,
ba adabbawey ga nga kaaroo bayrandi.»