EZRA
Enshokolezi
Amango gw’omwâmi Artazerzesi w’e Persi, Ezra ahika e Yeruzalemu haguma n’engabo y’Abayahudi. Ezra ali burhanzi mwandisi wa mwâmi. Ago mango acîlibuza erhi mmanja z’Abayahudi zirhuma. Mwâmi amuhà amaruba mpu aluse abantu b’e Yeruzalemu: ago maruba gahà Ezra olukengwa lw’okuhira irhegeko lya Mûsa omu mulala gw’Abuyahudi. Eyo munda e Yeruzalemu arhimâna Buyahudi banji bafundisire isakramenta ly’Obuhya n’abakazi barhali bw’omu bûko bw’Abayahudi (Ezr 7—10).
Ezra abà îshe wa «Abayahudi», Olubaga lw’Abayahudi lwahâbirwe oku bushiru bwâge ebi bimanyîso bisharhu byâgo byâgo:
1. Abayahudi barhengaga e Babeli lubà «lubaga lwîshogwa».
2. Aka-Nyamuzinda k’e Yeruzalemu gwo murhima gw’idini ly’olwo lubaga.
3. Okushimba irhegeko co cisiki c’okubà n’akalamo kanene kw’olwo lubaga.
Ezra ali erhi alibuzibwe bwenêne n’okuyumanyanya olwo lubaga luhyâhya. Akolêsa obukali n’okuhana abantu barhashimbaga irhegeko bwinjà. Nk’arhali mukali, Abayahudi barhengaga e Babeli bali bacîgusha haguma n’abantu b’agandi mashanja. Ntyo ishanja ly’Abayahudi lyàli lyabà lisungunu (Ezr 9—10). Ezra ali mukulu w’abayandikaga okuyankirirwa kw’Abayahudi. ebirimwo ebi:
1. Okuyagaluka kw’Abayahudi barhanzi: cigabi 1, 1—2, 70
2. Okuyûbaka buhyâhya aka-Nyamuzinda: cigabi 3, 1—6, 22
3. Obujà-bugo bwa Ezra: cigabi 7, 1—8, 36
4. Okuyimânika ishanja ly’Abayahudi lyajiragwa na Ezra: cigabi 9, 1—10, 44
I. Okurhenga elubungo n’okushubiyûbaka buhyâhya aka-Nyamuzinda
1
Okuyagaluka
1 Omu mwâka murhanzi kurhenga Sirusi ali mwâmi e Persi, lyo oluderho Nyamubâho aderhereraga omu kanwa k’omulêbi Yeremiya luyunjula, Nyamubâho ahira obugeremwa omu murhima gwa Sirusi mwâmi w’e Persi, anacirhuma entumwa y’akanwa n’ey’amaruba omu cihugo câge coshi, erhi:
2 «Sirusi mwâmi w’e Persi kwo adesire ntya: Nyamubâho Nyamuzinda ôbà omu mpingu ampîre amâmi goshi ga hano igulu, anantegesire okumuyûbakira enyumpa aha Yeruzalemu, omu Buyahudi.
3 “Ngasi muli mwe oli muntu w’olubaga lwâge, Nyamuzinda wâge amulange, akanye ajè e Yeruzalemu omu Buyahudi agend’iyûbaka enyumpa ya Nyamubâho, Nyamuzinda w’Israheli”.
4 “Abanasigire boshi omu bantu b’e Buyahudi, omu ngasi cihugo banalimwo coshi, eyo munda banarhabâle n’ensaranga n’amasholo n’ebirugu; bahêke obusò na ngasi bindi banabwîne bankahash’ibahà, bagend’iyûbakamwo enyumpa ya Nyamubâho e Yeruzalemu”».
5 Abakulu b’omulala gwa Yûda, ogwa Benyamini, abadâhwa n’Abaleviti, ngasi abà Nyamuzinda anahizire muli obwo bugeremwa bwâge, banayîmuka bagend’iyûbaka aka-Nyamuzinda e Yeruzalemu.
6 N’abalungu bâbo boshi bakaz’ibarhabâla n’ebirugu by’amasholo, amarhale n’ebindi birugu; bahirakwo ebirhungwa buzira kuganja orhundi rhulugu rhwa ntya ntya bakazâg’ibahà.
7 Mwâmi Sirusi anacirhôla birya birugu mwâmi Nabukondonozori anyagaga e Yeruzalemu kandi na okubihira omu nyumpa y’omuzimu wâge.
8 Sirusi, mwâmi w’e Persi, anaciyanka birya birugu byoshi, anacibifumbasa Mitredati ye wali mulanzi w’embîko, naye abigoshôla, byajà emwa Sebasari, ye murhwâli wali oyîmire omu Yeruzalemu e Buyahudi.
9 Alaga omubalè gw’ebyo birugu: rhubêhe makumi asharhu rhwa masholo, rhubêhe cihumbi rhwa marhale, rhwere makumi abirhi na mwenda;
10 rhubêhe makumi asharhu rhwa masholo, na rhundi rhubêhe magana anni n’ikumi rhwa marhale, rhwaligi rhwa kabirhi n’ebindi birugu cihumbi.
11 Byoshi haguma ebirugu by’amasholo n’eby’amarhale byàli bihumbi birhanu na magana anni. Sebasari agalukana byoshi erhi balya bâli bahêsirwe bujà e Babiloni bashubira e Yeruzalemu.