AMARHANZI EMWA ABATESALONIKA
Enshokolezi oku maruba marhanzi emwa Abatesalonika
Muli gano maruba marhanzi-rhanzi Paolo ayandikiraga Abanya-Tesalonika omu mwâka gwa 52, ababwire, erhi: « Ntâho barhadwîrhi baganîra oku mwarhuyankiriraga, n’oku mwalekaga abazimu binyu, mpu mushimbe Nnâmahanga munashige Nyamuzinda w’obuzîne n’ow’okunali,munalinge oku Omugala agaluka kurhenga empingu, olya Mugala afûlaga omu bafù, ye Yezu, orhuciza obukunizi bwayisha.»
Paolo ashib’ibwîra abatesalonika, erhi: «Bundi bulangâlire buci rhugwêrhe, gandi masîma maci rhwâbone, lindi ishungwè lihi lyârhulêrhere irenge embere za Nnawîrhu Yezu olusiku âgaluka, aha nyuma zinyu? Nêci, mw’oyo mwe irenge lîrhu, mwe na busîme bwîrhu» (2, 19).
Paolo ali akengeza abakristu kurhi bakwânîne okulama omu kulinda oku Yezu agaluka; ebi Nnâmahanga alonza kuhika amango Omugala galuka kuli kurhujira batagatîfu (5, 1; 2, 19; 3, 13; 4, 15; 5, 2; 5, 23). Co cirhumire enyigîrizo nkulu z’amaruba kuli kubwîra abakristu kurhi balinda olwo lusiku: kulama omu butagatîfu, bayâke eby’enshonyi, banalame omu buzigire (5, 7-8). Na ntâye omanyire olusiku n’amango Nnâhamwîrhu agaluka (5, 1).
1
Omusingo
1 Paolo, Silvano na Timoteyo, kuli Ekleziya y’Abatesalonika eri muli Nyamuzinda Îshe na muli Nyakasane Yezu Kristu. Kuli mwe enshôkano n’obuholo!
Avuga Nnâmahanga omunkwa anabasîma
2 Rhurhahusa okuvuga Nnâmahanga omunkwa ngasi mango mwe mweshi murhumire n’okummukengêra omu nsengero zîrhu.
3 Ngasi kasanzi, embere za Larha Nnâmahanga, erhi kugerêreza rhugerêreza ebijiro by’obuyêmêre bwinyu, n’emikolo y’obuzigire bwinyu, n’obulangâlire bwinyu bukomîre, muli Nnawîrhu Yezu Kristu.
4 Rhurhahabiri, bene wîrhu bazigirwa ba Nnâmahanga, oku muli nshâgi zâge.
5 Bulya Emyanzi y’Akalembe rhwamudwîrhîre birhali binwa byône, ci yali eyegemîre obuhashe, na Mukà Mutagatîfu, n’oburhwâli burhalimwo bwôba. Ninyu mwêne mumanyire kurhi rhwàli rhuyôsire muli mwe nti lyo rhummukwânana.
6 Ninyu mwarhulolerakwo olwiganyo, mwacîsêza okushusha Nyakasane, mwayankirira Oluderho n’enshagali ya Mûka Mutagatîfu, n’obwo mwâli omu malibuko manji,
7 na ntyo mwabà lwingayo oku bemêzi boshi b’e Macedoniya n’e Akaya.
8 Nêci, kurhenga emwinyu Oluderho lwa Nyakasane lwayumvîkîne, arhali omu Macedoniya n’omu Akaya mwône, ci na hoshi hoshi obuyêmêre bwinyu muli Nyamuzinda bwajîre irenge, na ntyo ntacicîrhamya nakuderha.
9 Ntâho barhadwîrhi baganîra oku mwarhuyankiriraga, n’oku mwalekaga abazimu binyu, mpu mushimbe Nnâmahanga munashige Nyamuzinda w’obuzîne n’ow’okunali,
10 munalinge oku Omugala agaluka kurhenga empingu, olya Mugala afûlaga omu bafù, ye Yezu, orhuciza obukunizi bwayisha.