23
Nyamuzinda ali kuli, obubî bwamâcitakira
1 Okubundi Ayubu anacij’eluhya aderha, erhi:
2 Nêci, kuhangaza kwâni kurhumire nalaka ntya, okuboko kwâni kwazidohîrwe n’amalumwa.
3 Ndi wankambwîra ngahi nankamushigâna, mbon’ihika halyâla abêra?
4 Ka nankahash’irhegeka embere zâge nti habè okusâmba, na ntyo nyunjuze ebinwa byâni mirôngwè?
5 Ka nankamanya ebinwa ahash’inshuza, Ka nankayumva ebi ambwîra.
6 Ka binwa bikali ajamwo kadali haguma na nâni? Nanga! Casinga yêne anyumvîrhize konene!
7 Ahôla, mushinganyanya wajà kadali boshi naye: casinga antege oyo wanjisa lubanja!
8 Ci nkaja olunda lw’ebuzûka-zûba, arhayiri, nkaja olunda lw’ebuzika-zûba ntamubone.
9 Ka hali eci adwîrhe ajira olunda lw’emwênè, ntacibwîni. K’àjir’icîfulika olunda lw’e mukondwè, ntamufulûle yo.
10 Ci konene ayishi olugendo njira! Erhi ankantangulira omu cîko cidûlike muliro, nanarhengamwo ncîre nka masholo.
11 Okugulu kwâni kurharhengaga omu mikâba yâge; nakulikire enjira yâge buzira buhabuka.
12 Ntaciyêgûlaga oku marhegeko g’ekanwa kâge, nakazâg’ilanga amarhegeko g’ekanwa kâge omu nda yâni.
13 Ci kwône yêhe ayôsire ampigîre: ndi wankamuncizakwo? Oku omurhima gwâge gulonzize kwo anajira.
14 Bulya oku ahizire kuli nie akuyûkiriza, na kwa bene okola kw’ayôrha ajira.
15 Lolà oku okwo, kwo kurhumire okumubà hôfi kunyôbohize, nkarhanya kuli-kwo, nnanyumve mmuyôbohire.
16 Nyamuzinda anyihize oku murhima gwâni, n’Ogala-byoshi, ànyunjuzize bôba.
17 Bulya arhali emizimya yo enjizire busha ntyâla, arhanali ogûla mwizizi gumbwîsire obusù.