21
Engo za bene Levi
1 Abashamuka ba ngasi nyumpa ya bene Levi banacijà emunda omudâhwa Eleazari ali na Yozwè, mugala wa Nuni, n’abashamuka b’emilala ya bene Israheli.
2 Banacishambâla nabo aha Silo, omu cihugo ca Kanâni, banacibabwîra mpu: «Nyakasane arhegesire omu kanwa ka Mûsa, mpu: rhuhâbwe engo rhwakaziyûbakamwo, rhuhâbwe n’amalambo gâzo oku bishwêkwa bîrhu».
3 Bene Israheli banacijà batwa oku myanya yâbo y’amashwa, banahà bene Levi, nk’oku Nyakasane anali arhegesire, engo bahîrwe n’amalambo bahîrwe byo ebi bikulikire.
4 Ecigole canaciyesherwa amûko ga bene Kehati; na bene omudâhwa Aroni, muguma wa muli bene Levi, ecigole canacibahà ngo ikumi n’isharhu omu mulala gwa Yûda, omu mulala gwa Simoni n’omu mulala gwa Benyamini.
5 Abandi bene Kehati ecigole nabo cabahà ngo ikumi z’omu mûko g’omulala gwa bene Efrayimu, omu mulala gwa bene Dani n’emwa bene cirya cihimbi c’omulala gwa Menashè.
6 Bene Gershoni bahâbwa n’ecigole, ngo ikumi n’isharhu omu mûko g’omulala gwa bene Isakari, omu mulala gwa bene Aseri, omu mulala gwa Nefutali n’omu cindi cihimbi ca bene Menashè omu Bashani.
7 Bene Merari, nk’oku amûko gâbo ganali, bahâbwa ngo ikumi n’ibiri omu mulala gwa Rubeni, omu mulala gwa Gadi n’omu mulala gwa Zabuloni.
8 Bene Israheli banacihà bene Levi ezo ngo n’amalambo gâzo nk’oku Nyakasane anali arhegesire omu kanwa ka Mûsa: bakazibihâbwa omu kubiyeshera ecigole.
Omwanya gwa bene Kehati
9 Omulala gwa bene Yûda n’omulala gwa bene Simoni engo bahîre bene Levi, alaga amazîno gâzo:
10 oku bene Aroni, balya b’omu mûko ga bene Kehati, baguma omu bene Levi, bulya bali barhanzi bayesherwa ecigole.
11 Banacibahà, omu ntondo ya Yûda, olugo lw’Arba, îshe wa Anoki, lukolaga luderhwa Hebroni, n’amalambo ganali eburhambi bwâge goshi.
12 Ci konene amashwa g’olwo lugo, n’ebishagala byâlwo, babihà Kalebu, mugala wa Yefunè.
13 Bahà bene Aroni, nka lugo omuntu owayîsire owâbo muntu ankahashiyâkiramwo, Hebroni n’amalambo gâge, na Libna n’amalambo gâge,
14 Yatiri n’amalambo gâge, Eshitemoa n’amalambo gâge,
15 Holoni n’amalambo gâge, Debiri n’amalambo gâge,
16 Ayini n’amalambo gâge, Yuta n’amalambo gâge, Beti-Shemeshi n’amalambo gâge: ngo mwenda emweyo milala yombi.
17 Omu mulala gwa Benyamini, bahâbwa: Gibeoni n’amalambo gâge, Gêba n’amalango gâge.
18 Anatoti n’amalambo gâge, Alemeti n’amalambo gâge: ngo ini.
19 Ntyo engo z’adadâhwa bene Aroni zàli: ngo ikumi n’isharhu n’amalambo gâzo.
20 Oku biyêrekîre amûko ga bene Kehati, nabo bene Levi, engo zahîrwe abandi bene Kehati zàli z’omu mulala gwa Efrayimu.
21 Banacihâbwa nka lugo lwa kuyâkirwamwo n’omuntu wayîsire owâbo, Sikemi n’amalambo gâge, omu ntondo y’Efrayimu, na Gezeri n’amalambo gâge,
22 Kibasayimi n’amalambo gâge, Beti-Horoni n’amalambo gâge: ngo ini n’amalambo gâzo.
23 Omu mulala gwa Dani: Elteke n’amalambo gâge, Gibetoni n’amalambo gâge,
24 Ayaloni n’amalambo gâge, Gati-Rimoni n’amalambo gâge: ngo ini.
25 Oku cihimbi ciguma ca bene Menashè, bahâbwa Tanaka n’amalambo gâge, Gati-Rimoni n’amalambo gâge: ngo ibiri.
26 Zoshi haguma zahika oku ngo ikumi n’amalambo gâzo zahîrwe bene Kehati.
Omwanya gwa bene Gershoni
27 Bene Gershoni nabo bahâbwa omu Baleviti, olugo omu cihimbi c’omûla la gwa bene Menashè, bahâbwa nka lugo lwa kuyâkirwamwo n’omuntu wayîsire owundi, Golani na Bashani n’amalambo gâge, na Beeshetera n’amalambo gâge.
28 Omu mulala gwa Isakari bahâbwa; Kishiyoni n’amalambo gâge,
29 Daberati n’amalambo gâge, Yarmuti n’amalambo gâge, Eni-Ganimi n’amalambo gâge: ngo ini.
30 N’omu mulala gwa Aseri: Misheali n’amalambo gâge, Abdoni n’amalambo gâge,
31 Helikati n’amalambo gâge,
32 Rehobi n’amalambo gâge: ngo ini. Omu mulala gwa Nefutali: bahâbwa: nka lugo lwa kuyâkirwamwo n’omuntu wayîsire owâbo, Kedesi, omu Galileya n’amalambo gâge, na Hamuti-Dori n’amalambo gâge, Kartani n’amalambo gâge: ngo isharhu.
33 Engo za bene Gershoni, nk’oku amûko gâbo ganali: ngo ikumi n’isharhu n’amalambo gâzo.
Omwanya gwa bene Merari
34 Nago amûko ga bene Merari, bo bene Levi baciri basigîre, babahà oku cihugo ca Zabuloni: Yokeneami n’ebishagala byâge, Karta n’ebishagala byâge.
35 Rimoni n’ebishagala byâge na Nahalala n’ebishagala byâge: ngo ini.
36 Olundi lunda lwa Yordani y’e Yeriko, omulala gwa Rubeni gwahâbwa nka ngo za kuyâkirwamwo n’omuntu wayîsire owundi: Beseri, omu irungu, oku hirhondo n’amalambo gâge, Yahasi n’amalambo gâge.
37 Kedemoti n’amalambo gâge na Mefati n’amalambo gâge: ngo inni.
38 Omulala gwa Gadi gwahâbwa nka ngo za kuyâkirwamwo n’omuntu wayîsire owundi: Ramoti omu Galeadi n’amalambo gâge, Mahanayimu n’amalambo gâge,
39 Heshiboni n’amalambo gâge na Yazeri n’amalambo gâge: ngo inni.
40 Omuganjo gw’engo za bene Merari kushimbana n’emilala yâbo yoshi, bo baligi bacisigîre kuli bene Levi: ngo ikumi n’ibirhi.
41 Omuganjo gwoshi gw’engo za bene Levi ba muli bene Israheli: ngo makumi anni na munâni n’amalambo gâzo.
42 Ezo ngo zoshi ngasi lugo n’obulambo bwâlwo eburhambi. Ntyo kwo byanali kuli ngasi lugo.
Endagâno ya Nyakasane yayunjula: bamala okugaba
43 Ntyo kwo Nyakasane ahîre Israheli ecihugo coshi, cirya alagaga b’îshe. Bacirhôla banaciyimamwo.
44 Nyakasane abahà okuluhûka barhacibonaga hidugundu hici eburhambi bwâbo nk’oku analaganyagya b’îshe. Ntâye ciru n’omuguma omu bashombanyi bâbo wahashire mpu ankahagaza embere zâbo, Nyakasane anacibahà bo boshi.
45 Omu binwa by’obwangà Nyakasane asuhiraga bene Israheli boshi ntâco cabulikîne: byoshi byanayunjula.