1 Omu mwâka gw’igana na makumi galinda n’ibiri, mwâmi Demetriyusi anacishûbûza engabo ahinindikira e Mediya agendilonzayo oburhabâle bw’okulwîsa Trifoni. 2 Arsaki mwâmi w’e Persi n’e Mediya erhi ayumva oku Demetriyusi akola ali omu cihugo câge anacirhuma muguma omu barhambo bâge b’okulwa mpu amugwârhe anazîne. 3 Oyûla anacikanya n’erhi abà amâhima engabo ya Demetriyusi anacimugwârha yenêne anaciyisha amudwîrhîre Arsaki, naye amushwêka. 4 Ecihugo c’Obuyahudi canaciba n’omurhûla omu mango goshi ga Simoni. Alonza aminjà g’olubaga lwâge, oburhegesi bwâge, n’irenge lyagl byasîmîsa olubaga muli ezôla nsiku zoshi. 5 Na muli ebyôla byamuhekaga irenge, hali oku anyagaga Yope amujira civuko c’okurhama abona obulyo bw’okuyinjibana n’ebihugo by’omu nyanja. 6 Anaciyûshûla ecihugo c’ishanja lyâge, anabà mwâmi w’ecihugo câge. 7 Anagalula Buyahudi banji bali bahesirwe bujà. Anacigwârha Gazara, Betisuri n’enyumpa y’okulwîramwo, arhenzamwo ngasi hyanali higalugalu na ntâye wamudesire kubî. 8 Ngasi muguma akahinga ishwa lyâge n’omurhûla, idaho lyayêra bwinjà, n’emirhi y’amalehe yayâna malehe manji. 9 Abashosi bàkola batamîre aha kagombe kantu kaguma konene yo yali nshambâlo yâbo: omurhûla. N’abâna b’emisole bakaziyambala emyambalo y’okulwa bakola balimba. 10 Simoni abumba ngasi lugo biryo anacihiramwo ngasi byoshi bya nkanazibuhize ezôla ngo kuhika izîno lyâge l’irenge lyahika ciru ah’igulu lihekera. 11 Anacihira omurhûla omu cihugo n’Israheli ashagaluka n’obusîme bunene. 12 Ngasi muguma ali abutamîre aha mizâbîbu yâge n’aha mibô yâge; ntâye wankadesire mpu abayôbohya. 13 Ahusa okukazibalwîsa omu cihugo; abashombanyi bâbo b’abâmi bahi mwa muli ezôla nsiku. 14 Ashîbirira bwenêne abantu banyinyi b’omu lubaga lwâge; acîyerakana muntu wa bushiru oku kanwa ka Nnâmahanga, amalîra na ngasi banali babî boshi kuguma n’endyâlya. 15 Ayûshûla obwinjà n’ebirugu by’aka-Nyamuzinda.

16 Erhi bayumva e Roma n’e Sparti olufù lwa Yônatani, bagwârhwa n’omungo bwenêne. 17 Ci erhi baciyumva oku Simoni mwene wâbo ye wabîre mudâhwa mukulu ahâli hâge n’oku ye warhambula ecihugo coshi kuguma n’ebishagala byamwo, 18 banacimuyandikira oku nambi z’ebyûma mpu bashubilumûla endagâno n’obwîra bwâbo bàgwêrhe boshi na Yûda na Yônatani bene wâbo. 19 Amaruba ganacisomerwa embere z’olubaga loshi aha Yeruzalemu. 20 Alaga n’empamîso y’amaruba Abanya-Sparti bali bayandisire:

«Abagula b’e Sparti n’ecihugo, kuli Simoni mudâhwa mukulu, oku bashamuka, oku badâhwa n’oku bandi bantu bacisigîre b’omu lubaga lwa bene wâbo b’Abayahudi: Omusingo! 21 Entumwa zalirhumirwe emw’olubaga lwîrhu, bàrhubwîzire emyanzi y’irenge n’obwinjà bumulimwo, rhwanacisîma erhi rhubabona. 22 Rhwanayandisire omu myanzi y’olubaga ngasi ebi banadesire byoshi, baligi bo Numeniyusi, mugala wa Antiyokusi, Antipateri mugala wa Yasoni ntumwa z’Abayahudi, zàli ziyishire mpu bashubilumûla okunywâna n’obwîra bw’Abayahudi rhweshi nabo. 23 Kwanasimîsize olubaga okuyandikira abôla bantu n’obukuze n’okuhira empamîso y’ebinwa byâbo omu mbîko y’olubaga ly’olubaga lw’e Sparti lukaziyôrha lubikirire. Banacirhumira Simoni omudâhwa mukulu eyo mpamîso. 24 Enyuma ly’ahôla Simoni anacirhuma e Roma Numeniyusi n’empenzi nênênè y’amasholo buzirho bwa mîna cihumbi, lyo basêza okunywâna boshi nabo.»

25 Erhi olubaga lumanya okola lwanaciderha mpu: Kurhi rhwankayêrekamwo Simoni oku rhumuvuzire omunkwa ye n’abâna bâge? 26 Bulya abîre mutungo gwîrhu, yênene, bene wâbo n’enyumpa y’îshe wâbo; omu kulwa kwâbo, balibisirekwo abashombanyi b’Israheli banamuhà omurhûla. «Banaciyandika ebyôla bintu oku nambi z’amarhale, banabigwîka oku minâra oku ntondo ya Siyoni». 27 Alaga empamîso yago:

«Omu nsiku ikumi na munâni z’omwêzi gwa Eluli mwâka gwa igana na makumi galinda n’ibiri, omu mwâka gwa kasharhu gw’okuyîma kwa Simoni mudâhwa mukulu bwenêne. 28 “Embere z’ihano likulu ly’abadâhwa n’ely'olubaga, abaluzi b’ishanja n’abashamuka b’ecihugo, barhumanyîsize” oku: 29 “Omu ntambala nyinji zalibuzagya ecihugo cîrhu, Simoni mugala wa Matatiyasi muguma omu baburhwa b’omu bûko bwa Yoaribu kuguma na bene wâbo, bacîhizire omu mbaka, banahagalika abashombanyi b’ishanja lyâbo lyo balanga aka-Nyamuzinda kâbo n’irhegeko banahêsire ishanja lyâbo irenge linene”. 30 “Yônatani anacishûbûza ishanja lyâge anacibà ye mudâhwa walyo mukulu; buzinda ashimânana n’olubaga lwâge”. 31 “Abashombanyi bâbo banacilonza okurhabâlira ecihugo mpu bacisherêze, banarhôla aka-Nyamuzinda”. 32 “Okubundi Simoni anaciyimanga, anacilwîra ishanja lyâge anabahà oluhembo”. 33 “Azibuhya ebishagala bya Yûda kuguma na Betisuri, oli oku lubibi halya habâga burhanzi emirasano y’abashombanyi, anacihiraho abalanzi b’Abayahudi”. 34 “Akomeza Yope oli oku nyanja, na Gazara oli oku lubibi lw’Azoti, lwàli mîra lugo lwa bashombanyi anacihirakwo Abayahudi, anacihira ngasi ebi bankanalagîrîreko omu buzîne bwâbo boshi”. 35 “Olubaga lwabwîne obushinganyanya bwa Simoni n’irenge alonzagya okuhà ishanja lyâge, banacimujira murhambo wâbo mukulu na mudâhwa wâbo mukulu ebyo bijiro byâge byoshi birhuma, kuguma n’obushinganyanya n’obwikubagire ali agwêrhe oku ishanja lyâge, na bulya ali ajizire oku anahashire koshi lyo ahêka olubaga lwâge enyanya”. 36 “Amango anacirimwo omûka, byoshi byagendeka bwinjà omu maboko gâge. Kuhika amashanja gahulusibwa omu cihugo c’Abayahudi kuguma n’àbabâga omu cishagala ca Daudi aha Yeruzalemu, abâli bamâciyûbakira enyumpa y’okulwîramwo, bakazirhengamwo bagendilwa banagaluka, ntyôla omu marhambi g’aka-Nyamuzinda basherêza bwenêne obutagatîfu bwâge”. 37 “Ahiraho Abayahudi, anahazibuhya mpu lyo akayôrha alanga omurhûla gw’ecihugo n’ogw’olugo, anaciyûshûla kujà enyanya ebyôgo bya Yeruzalemu”. 38 “Muli okwôla mwâmi Demetriyusi amanya anayêmêra okubà mudâhwa mukulu kwâge”. 39 “Amuhira, amuganjira omu bîra bâge anamukuza n’irenge linene”. 40 “Bulya amâyumva oku Abaroma bakola baderha mpu Abayahudi bîra bâbo, bunkwa bâbo na bene wâbo, n’oku bayankirire irenge linene abâli barhumirwe na Simoni”. 41 “Abayahudi n’abadâhwa bahizire Simoni mpu abè murhambo na mudâhwa mukulu ensiku zoshi, kuhika habonekane omulêbi wankanayêmêrwa, n’oku abà ye murhambo w’abalwî bâbo”. 42 “Oku akazilanga aka-Nyamuzinda; oku akayimanza abarhambo bakazikolêsa emikolo y’oluba ga loshi, ecihugo, emirasano, enyumpa z’okulwîramwo”; 43 “oku akalanga aka-Nyamuzinda; oku boshi bamuyumva; oku ebiyandikwa omu cihugo byoshi byakahirwa kw’izîno lyâge n’oku ayambisibwa emishangi y’akaduku n’amasholo”. 44 “Ntâye oli omu lubaga, oli omu badâhwa oyêmêrîrwe okudalika ebyôla byoshi nîsi erhi okulahira oburhegesi buhanyirwe naye, ntaho baderhage mpu bashûbûza abantu omu cihugo buzira kuyêmêrerwa naye, ntâye oyêmêrîrwe okuyambala emishangi y’akaduku nîsi erhi okuyambala isonga ly’amasholo”. 45 “Ngasi yêshi wankajira oku eryôla irhegeko lirhadesiri nîsi erhi okurhashimba binwa biguma biguma muli byo, kukwânîne ahanwe?” 46 “Kusimîsize olubaga loshi okuhà Simoni obuhashe bw’okujira nk’okwôla irhegeko linarhuhunyire”. 47 “Simoni anaciyêmêra, ayêmêra n’okujira bwinjà ogwôla mukolo gw’omudâhwa mukulu, okurhambula abalwî, okurhegeka Abayahudi, abadâhwa n’oku ba mukulu wa byoshi”. 48 “Bahiga okuyandika ebyôla byoshi oku nambi z’amarhale n’okubibîka omu ndalâlà y’aka-Nyamuzinda, halya hantu hakazibonekana”. 49 “N’okubîka empamîso omu ciyumpa c’embîko, halya Simoni yêne n’abâna bâge bayîshikazihuma.”»