NEHEMIYA
Enshokolezi
Ecitabu ca Nehemiya n’eca Ezra byayandikagwa kuguma. Birhangira n’okurhondwa kwa mwâmi Sirusi w’e Persi wayemereraga Abayahudìi okugalu ka e Yeruzalemu n’okuyûbaka buhyâhya aka-Nyamuzinda. Obwo burhonde bwabaga omu mwâka gwa 538 embere ly’okuburhwa kwa Kristu, gwo mwâka gwa 50 enyuma ly’olubungo lw’okululizibwa e Babiloni.
Nehemiya ajizirwe murhegesi w’Abayahudìi. Arhenga e Yeruzalemu n’okujà e Persi, cikwône ashubirira e Yeruzalemu okuyish’ihâna amahano mahyâhya g’okukubûla ebishagala byal’ikola birimwo ishâbâbe (Neh 13, 4-31).
Nehemiya al’ikoyakoyire bwenêne erhi kuyûbaka ecishagala c’e Yeruzalemu n’olugurhu lwâco kurhuma. Ali mushibirizi w’omukolo gwâge. Nehemiya ayu size emikolo yâge duba duba ciru akaba abashombanyi bal’ijizire ngasi byoshi bal’ihashire mpu lyo arhag’iyijira. Ecishagala cashub’iyunjula kandi bantu (Neh 1, 1—7, 72).
EBIRIMWO
1. Okuhamagalwa kwa Nehemiya n’okurhumwa emwa Abayahudi cigabi 1, 1—2, 20
2. Okuyûbakwa kw’engurhu za Yeruzalemu: c. 2, 1—7, 72
3. Ezra aciyigîriza amarhegeko g’obushinganyanya: o/usiku lukulu lw’ebihando: c. 8, 1—9, 37
4. Abantu balagânana okushimba amarhegeko ga Nnâmahanga: c. 10, 1-40
5. Amazîno g’abantu bagûkiraga omu cishagala ca Yuda: c. 11, 1—12, 26
6. Okugishwa kw’engurhu za Yeruzalemu: c. 12, 27-47
7. Nehemiya asêza abantu okushimba amarhegeko ga Nnâmahanga: c. 13, 1-31
I. Okuhamagalwa kwa Nehemiya n’oburhumisi bwâge omu Yûda
1
Okuhamagalwa kwa Nehemiya n’oburhumisi bwâge omu Yûda
1 Myanzi ya Nehemiya, mugala wa Hakaliya. Omu mwêzi gwa Kisilewu, mwâka gwa makumi abiri, erhi ndi aha Suza omu nyumpa yâni y’entakabunga.
2 Hanani, muguma muli bene wîrhu anaciyisha ali n’abantu b’e Buyahudi. Nabadôsa emyanzi eyêrekîre Abayahudi ba shwekûlagwa, barhenga bujà n’oku biyêrekîre Yeruzalemu.
3 Banacinshuza, mpu: «Balya barhengaga bujà b’emisigala, n’abandi bantu barhindibukîre omwo cihugo bajaga, emitungo ya Yeruzalemu yahongosire n’emihango yâge yasingonosire n’omuliro».
4 Erhi nyumva okwo, natamala, nagwîra omulenge, nashinga nsiku zirhali nyi erhi kulaka ndaka; nakaz’icîshalisa n’okushenga Nyamuzinda w’enyanya.
5 Nakaz’iderha, nti: «Mâshi Nyakasane Nyamuzinda w’empingu, Nyakasane ne wêne oli mukulu na w’okurhînywa, wêne olanga endagâno n’obwonjo emwa balya bakukunda n’okushimba amarhegeko gâwe.
6 “Okurhwiri kwâwe kuyiguke, n’amasù gâwe gabungûke, oyumvîrhize omusengero gwa mwambali wâwe. Ndwîrhe nakubwiragwo mûshi na budufu, kuli bambali bâwe bene Israheli nti obabêre obwonjo oku mabî bakujirire; niono n’enyumpa ya Larha yoshi rhwakugayisize”.
7 “Rhwajizire mabî manji bwenêne embere zâwe, rhurhashimhaga amarhegeko gâwe, obulonza bwâwe n’ebinwa wabwîraga mwambali wâwe Mûsa”.
8 “Okengêre Yâgirwa kalya kanwa wayûshûlaga erhi obwîra mwambali wâwe Mûsa, erhi: Mukabà bagoma nâni namushandabanya omu mashanja goshi”;
9 “ci nka mwankanashub’iyagalukira emunda ndi, mukanashub’ishimba amarhegeko gâni, mukanakaz’ijira oku ganamuhûnyire, ciru akabà mwashandîre kuhika ebuzinda bw’igulu, nanashub’ibashubiza halya hantu nacîshogaga nti ho nahira Izîno lyâni”.
10 “Bali bambali bâwe na lubaga lwâwe wêne wacungulaga n’obuhashe bwâwe bw’Ogala-byoshi”.
11 “Mâshi Nyakasane, okurhwiri kwâwe kuyumve omusengero gwa mwambali wâwe n’omusengero gw’abandi bambali bâwe barhînya izîno lyâwe. Mâshi Yâgirwa, ojire mwambali wâwe abone iragi ene, ababalirwe n’oyo muntu! Ago mango erhi nie cirhanza-mamvu omu bwâmi.”»