12
Miriamu na Aroni bashomba Mûsa
1 Miriamu n’Aroni, barhondêra okuderhaderha kubî Mûsa erhi omukazi w’omukûshi ayankaga orhuma. Ebwa kubà amayanka omukazi w’omukûshi.
2 Banacirhondêra okuderha, mpu: «Ka Nyamubâho kuli Mûsa yênene aderhera? K’arhaderheraga kuli rhwe rhwêki?» Nyamubâho anaciyumva okwôla.
3 Ci Mûsa acibêraga muntu mutûdu bwenêne, kulusha abandi bantu boshi ba hanôla igulu.
4 Mw’akola kanya konênè, Nyamubâho abwîra Mûsa, Aroni na Miriamu, erhi: «Muhuluke oku muli basharhu, mujè e bw’Ihêma ly’embugânano.» Banacihuluka oku bali basharhu.
Nyamubâho atumuza Miriamu na Aroni obubî bwâbo
5 Nyamubâho ayandagala omu nkingi y’ecitù, agendibêra aha lusò lw’Ihêma. Ahamagala Aroni na Miriamu, nabo oku bali babirhi bayegêra.
6 Anacibabwîra, erhi: «Yumvi bwinjà ebinwa byâni: “Akabà hali mulêbi wa Nyamubâho mugwêrhe, omu bilôrho mwo ncîmanyisa emwâge, omu bilôrho mmuderhegeza”.
7 “Ci mwambali wâni Mûsa arhali ntyôla; amanyîkîne bwinjà oku ali muntu nkana munôla nyumpa yâni yoshi”.
8 “Nankazimushambâza rhuyerekezanye akanwa, nciyêreke ye ci ntamushambaliza omu migani, yêne anahashilolêreza obusù bwa Nyamubâho. Carhumirage murharhînya okujà kwaderhaderha kubî mwambali wâni Mûsa?”»
9 Oburhè bwa Nyamubâho bwanaciyâka bwenêne kuli bo; anacicîgendera; ecitù canacicîyêgûla kulya nyanya ly’Ihêma.
10 Na, k’orhabona! Miriamu amahinduka wa lushomyo, akola mwêru nka lubula. Aroni ayêrekera emunda Miriamu ali, alola oku akola mushomyo.
Obulagizi bwa Aroni na Mûsa
11 Aroni anacibwîra Mûsa, erhi: «Mâshi Yâgirwa, nnawîrhu, omanye wankarhubarhuza ecîra câha rhwâjiraga omu kuhalanjika, rhunakwânîne n’obuhane bwâco.
12 Mâshi arhabâga nka mwâna wa cifù, ye rhenga omu nda ya nina erhi n’omubiri gumonyôsire!»
13 Mûsa anacishenga Nyamubâho aderha, erhi: «Mâshi, Nyamuzinda nkusengîre, omufumye!»
14 Nyamubâho anacibwîra Mûsa, erhi: «Îshe acimukayiraga ebusù arhankageza nsiku nda erhi ayunjwîre nshonyi? Ayôrhe nsiku nda muyungule embuga ly’ecihando; enyuma z’ahôla banashubimuyankirira omwôla cihando.»
15 Miriamu nsiku nda ali muyungule embuga ly’ecihando, n’olubaga lurhahashigigenda, kuhika Miriamu ashubiyankirirwa.
16 Enyuma z’aho, olubaga lwarhenga ahôla Haseroti, bâgendihânda omu irungu lya Parani.