34
Embibi za Kanâni
1 Nyamubâho anacishambâla na Mûsa, amubwîra, erhi:
2 «Ojirhegeka bene Israheli obabwîre ntya: “Amango mwaja omu cihugo c’e Kanâni, alagi ecihugo mwagendigabânana: Co cihugo ca Kanâni, nk’oku embibi zâge zinali”.
3 “Olunda lw’emukondwè, kuli mwe lwâbà irungu lya Sini, kuhika aha Edomu, n’olubibi lwinyu lw’ebuzûka-zûba lwarhenga oku cikwi c’eyo buzûka-zûba bw’enyanja y’omunyu”,
4 “n’olwo lubibi lwinyu lwanayandagalira emukondwè, lugere oku murhezi gw’Akrabimi, lugere e Sini, lugendihika emukondwè aha Kadesi-Barnea. Lwanashubigenda, lugere e Hasari-Adari, kandi lugere olunda lw’e Asemoni”.
5 “Kurhenga e Asemoni, olwo lubibi lwahika oku mugezi gw’e Mîsiri, lugendihwêra oku Nyanja”.
6 “Nalo olubibi lw’e Mashinji lwâbà Enyanja Nene: lwo lubibi lwinyu olunda lw’e buzika-zûba”.
7 “Lolagi olwabà lubibi lwinyu olunda lw’emwênè: kurhenga oku Nyanja nnene”,
8 “mwanatwa olubibi lwinyu kuhika oku ntondo ya Hori: kurhenga oku ntondo ya Hori, mwalukanyanya aha Muhango gwa Hamati, olubibi lwanahika aha Sedadi”.
9 “Lwagenda kuhika aha Zifroni, lugendihwêra aha Hasari-Enani: lwo lwâbà lubibi lwinyu olwo lw’emwênè”».
10 «Mwanatwa olubibi lwinyu lw’ebuzûka-zûba bwa Hasari-Enani aha Sefami.
11 “Olwo lubibi lwanabunguluka kurhenga e Sefami kujà e Harbela ebuzûka-zûba bwa Ayini, lwanayandagala lugere burhambirhambi omu rhurhondo rhuli eburhambi bw’enyanja ya Kinereti olunda lw’ebuzûka-zûba”.
12 “Lwanayandagala kuli Yordani, lugendihwêra oku nyanja y’omunyu. Co cihugo cinyu ecôla n’oku embibi zâco zinacizungolosire.”»
13 Mûsa aha bene Israheli eri irhegeko aderha, erhi: «Eco co cihugo Nyamubâho arhegesire mpu cihâbwe erya milala mwenda haguma na cirya cihimbi c’omulala.
14 “Bulya omulala gwa bene Rubeni nka kulya enyumpa za bashakulûza bâbo zinakulikirana, n’omulala gwa bene Gadi, nabo nk’oku enyumpa za bashakulûza wâbo zinakulikirana, bôhe mîra bahâbagwa akabo kashambala: n’ecihimbi c’omulala gwa Menashè naco cahabirwe akâco kashambala”.
15 “Eyo milala ibirhi n’eco cihimbi c’omulala, bahâbirwe akashambala kâbo ebwa lindi ishiriza lya Yordani, aha ishiriza lya Yeriko, olunda lw’ebuzûka-zûba”».
Abarhambo bagabiragwa ecihugo ca Kanâni
16 Nyamubâho anacishambâla na Mûsa amubwîra, erhi:
17 «Alaga amazîno g’abantu bagendimugabira eryo ishwa: omudâhwa Eleazari na Yozwè, mwene Nuni.
18 “Kandi wanaja warhôla murhambo muguma muguma omu ngasi mulala, omu kugaba eryo ishwa”.
19 “Alaga amazîno g’abo bantu: Oku mulala gwa Yûda, Kalebu, mwene Yefunè”;
20 “Oku mulala gwa bene Simoni, Shemweli mwene Amihudi”;
21 “Oku mulala gwa Benyamini, Elidadi, mwene Kisloni”;
22 “Oku mulala gwa bene Dani, omurhambo Buki, mwene Yogli”;
23 “Kuli bene Yozefu: oku mulala gwa bene Menashè, omurhambo Hanieli mwene Efodi”;
24 “Kuli bene Efrayimu, omurhambo Kemueli, mwene Shiftani”;
25 “Oku mulala gwa bene Zabuloni, omurhambo Elisafani, mwene Parnaki”;
26 “Oku mulala gwa bene Isakari, omurhambo Paltieli, mwene Azani”;
27 “Oku mulala gw’Aseri; omurhambo Ahihudi, mwene Shelomi”;
28 “Oku mulala gwa Nefutali, omurhambo Pedaheli, mwene Amihudi.”»
29 Abo bo Nyamubâho arhegekaga mpu ecihugo ca Kanâni bacigabire bene Israheli.