72
Omwâmi walaganyibagwa
1 Lwa Salomoni.
Yâgirwa Nyamuzinda, ohè mwâmi okurhimanya, otulire mwene mwâmi obushinganyanya bwâwe.
2 Arhegeka ishanja lyâwe n’obwîrhonzi, n’abîrhôhye bâwe âbahabûla okunali.
3 Entondo zâhêreza olubaga omurhûla, n’ehirhondo hilêrhe obushinganyanya.
4 Ye wâshîbirira abanyi omu lubaga, Ye wâciza iburha ly’abakenyi. Ye wâtulikanya ababalibuza.
5 Alama nk’izûba, nka mwêzi kurhenga okw’iburha kuj’oku lindi.
6 Ahonera nka nkuba oku kahasi, nka nkuba yadômer’idaho.
7 Obushinganyanya bwâyêra omu nsiku zâge, n’omurhûla guluge, kuhika omwêzi guzike.
8 Arhegeka kurhenga oku nyanja kuhika oku nyanja kurhenga oku lwîshi kuhika ah’igulu lihekera.
9 Abashombanyi bâge barhibukira embere zâge, n’abamulwîsa bamîme akatulo.
10 Abâmi b’omu Tarsisi n’ab’omu birhwa bâmurhûla entûlo, abâmi b’e Saba n’ab’e Seba bamusholôlera.
11 N’abâmi b’igulu lyoshi bamuharâmya, amashanja goshi gâmukolere.
12 Co cirhumire âciza omukenyi omuyâkûzize, n’omugalugalu orhagwêrhi warhabâla.
13 Ababalira omushalye n’omukenyi, n’obuzîne bw’omunyi abucize.
14 Abakûla omu kunyagwa n’omu kulibuzibwa, n’omukò gwâbo âgulola bwinjà.
15 Kulama âlama, bakaz’imurhûla amarhale g’e Buharâbu, bakaz’imusengera burhahusa, bamugishe ensiku n’amango.
16 Idaho lyâyêra engano; emburho yâge yasogorokera oku busongerwe bw’entondo aka Libano, n’abantu bâyôloloka omu cihugo nka kahasi ebulambo.
17 Izîno lyâge lyâgishwa ensiku n’amango, oku izûba licibasha, erhi ho n’izîno lyâge libà. Emilala yoshi y’igulu yâgishirwa muli ye, amahanga goshi gâmuderha muny’iragi.
18 Agishwe Nyakasane Nyamuzinda w’Israheli, Bulya yêne wajizire ebirhangâzo.
19 Ligishwe n’izîno lyâge ly’irenge ensiku zoshi, n’obukuze bwâge bulumîre en’igulu. Amen! Amen!
20 Okushwinjwa kw’emisengero ya Daudi, mugala wa Yese.