II. Okuhûrha kwa Tobiti
2
1 Omu mango ga Asaradoni, nashubira omu nyumpa yâni, bangalulira na mukânie Ana, n’omwâna wâni Tobiya. Oku lusiku lukulu lwa Pentekoste, lwo lusiku lukulu lw’emigobe, banjirira olusiku lukulu lwa Pentekoste nanacicîlambûla nti nkolaga nalya.
2 Banaciyisha bandwîrhîre amêza n’ebiryo mwandu. Nanacibwîra mugala wâni Tobiya, nti: «Mwâna wâni, okanye okashîmâna omukenyi w’omu bene wîrhu balya bayishaga eno Ninive, akanaba acilanga buzibu ebya Nnâmahanga, onamulêrhe, rhulye naye. Nakulinda kuhika ogaluke, mwâna wâni».
3 Tobiya anakanya, ajà alonza ntyo omukenyi muli bene wîrhu. Anacishubûka, ambwîra, erhi: «Larha». Nâni nti: «W’oyo mwâna wâni». Anacinshuza, erhi; «Larha, alà oku muntu muguma w’omu lubaga lwîrhu anizirwe, banamukabulira embuga konene, anaciri ahôla, bamutwa igosi».
4 Nanacicîrhuna embuga, naleka ebiryo buzira kulyakwo, nanacimukûla mulya njira, namubîka omu nyumpa nti nyîsh’imubisha hano izûba lihorha.
5 Erhi ngaluka, nacîkalaba, nalya ebiryo byâni nankola ndi omu mishîbo.
6 Nakengera kulya omulêbi Amosi aderhaga koshi kuli Beteli, erhi: «Ensiku nkulu zâwe zanacibè mishîbo n’enyimbo zâwe zoshi zibè ndûlù».
7 Nanacirhondêra okulaka. Erhi izûba libà lyamâhorha, naj’ihumba omwîna, namubishamwo.
8 Abalungu bâni bakaz’inshekera, banakâderha, mpu: «Arhaciyôboha, mîra bajaga bamulonza mpu bamuyîrhe erhi okwo kurhuma, anaciyaka, obonage oku kandi y’oyu warhondîre okujà kwa bisha abantu».
9 Muli ebyo bijingo nanacikanya naj’ikalaba, nanacijà aha côgo, nacîgwishirira aha lukûta lwa cirya côgo n’irhwe erhi liri libwikûle, idûrhu lirhuma.
10 Ntalimanyire erhi okwo lukûta kwàli ebitorha aha nyanya zâni; amazîngonoko gâbyo ganacintogera omu masù ganaciri madurhu, garhuma nahûrha. Nakaz’igend’icîbukîsa emw’abafumu, ci oku badwîrhe bampira amafumu omu masù erhi n’okuhûrha kwâni kwajà kwayûshûka, kuhika nahûrha loshi. Amasù ganfa ntyo myâka ini yoshi. Bene wîrhu boshi bababala bwenêne erhi nie ntuma; Ahikari andisa myâka ibiri embere ajè Elimayidi.
11 Ago mango, mukânie Ana ajà alimya, okujà ajira emikolo y’okuluka emishangi y’ecitâni anahâbirwe,
12 amâyûsa omukolo bayumvanyagya banamuhà oluhembo. Omu nsiku nda z’omwêzi gwa Distrosi erhi amâyûs’ijira omushangi, aguhà balya akazâg’ikolera, nabo banacimukamasa nk’oku anali akwânîne, n’omu kumuhemba banacimuhà omwânahene mpu lwîko lwâge.
13 Erhi ahika aha mwâni, olya mwânahene arhondêra okuyâna, nanacimuhamagala, namudosa, nti: «Ngahi oyu mwânahene amârhenga? Akabà kuzimbwa azimbagwa oyu? Shubiza emwa bene ye bulya rhono rhurhagwêrhi obuhashe bw’okulya ebintu by’obushambo».
14 Anacinshuza, erhi: «Nanga bamumpâga nka luhembo kuli ebi bankamasagya». Ntayêmêraga la, nanacimusêza nti kuhika amugalulire bene ye (nanacimubêra burhè). Buzinda, anacimbwîra, erhi: «Zirya ntûlo zâwe ngahigi ziri, na birya bijiro byâwe ngahigi biri? Boshi bamanyire bwinjà oku ntabunguke warhenzizemo!»