Polue Kalesia
xosaniki xayawotai nakau
Akereki kuna
Ximuximu Yesusu taiwoneai kini paiya, nini Yuta kini kirenie. Pana xurise Yesusue Yesusu tianuwopi Polu xesawati xouna xetau xetau xuimiapimi xosa rania kuna uteiwotai. Kakati pa xuimiapimie rania xotapa taineri Yesusupo kini xosa moria, kire xue putawotai. Yuta apimie kakirouneri sie ekime pa xuimiapimie Mosesipo tu tairouworixe. Pa xati nini Yesusure xonikisuneria, nini rania Moesesipo tu taiwopinerire e xuwere?
Yuta nikau kapiarei mari takineri Mosesipo kireu tu taiwopinerire kireu apimie pa apimi xosa kaketeneai. Pana Polue xuwe xetai. Nue kunauna, sini Yesusu Kristusu xosa xosikisunuku xati, pa kirenie kakati sini Xoiteupo ekero askinaku xuiapu sainuku, sini oma ekisikioma tinuku.
Yuta kini xopuropu kireue propinsi Kalesia masaira xouneri, Mosesipo tu taiwopinerire Yesusure xonikisuwoteneai kuna kaniketeneai. Pa kaketenaire Polue kuna iyeserina ninipo xonikisu xeika kapia xeika kutuwopure nini Kalesia xosa mua nakau xayawotai.
Ximuximu Polue ipaki kunauna Xoiteu nukoyeni ye Yesusu tianuwopi saina tepineure tumuyereyai xetai. Ye ikou xoieni tumunere e kire apupo kuna kireni taiti xana xuwe. Xoiteue ye yaina yei xetau xeteneai xuimiapimi xosa kuna uteiwopineure saina sieyai. Xurise Polue ipaki kunauna, Kristusu Yesusure xonikisuwoteneai xuiapu nini kirenie Xoiteu ekero asinaku xuiapu sairouneri xetai. Mua nakaupo xurisepu kuna paiya muanumu, Kristusue kakati sini somoropu sainuku paiya, Xoiteupo Supo Youyae sinipo sesepi taitairouna xati kireu apimi xosa asinaku kapia kakirounuku.
Polue tianiwopi saina tepinaure Xoiteu nukoini tumuworeyai
1
1.1—2.14
1 Ye Polu Yesusupo tianuwopi. Apimie ye xesayeneaixe, kire apue tianuwopi saina xosa iyaiyerekixe. Xuwe. Ye mua saina Yesusu Kristusu xeika Xauwa Xoiteu nukoe Kristusu kopa upuropu sareyai xeika xupunikiropu tiyai.
2 Iko xeika xokupa xataimanae purianiyeteneai xeikae mua nakau xayaunuku tini Yesusure xotikisukiriai xuiapu Kalesia propinsi purikiriai xosa xesaritikinuku.
3 Sikou Emisiki Xoiteu xeika, Kokaipa Yesusu Kristusu xeikae, tinire xounikisuaxati xounikietikineria tinipo xotikikemu yororepineri.
4 Kristusue Emisiki Xoiteupo nanunanu taiwotai xati, sikou xunu wetepure nukou ekeomani wetetai. Mua kapia xoxi mua ouro purotai xosaupo xiyeri tisikepure nue panumu kaketai.
5 Pa xati sini Xoiteupo wenumu sipesi sipesi xourorepu. Pa suau.
Kireni asinaku kuna kireni purina
6 Tinie pa kapia kakari yeu xoikemu xiri karakani kutu karakauna. Kristusue tinire xousuaxati xouwetiketai sainaure, Xoiteue tini nupo xuiapu kini sayakuaire yaitiketaina pana, tinie nu sapauni wetinuku, kire xetau xonuxonu asinaku kuna tainuku.
7 Pana xetau asinaku kuna puratixe. Xuweni kutu. Kireu apimie tinipo nanunanu parawopi saina kireni tineri, ninie Kristusupo asinaku kuna pirixanauwopurexineri.
8 Pana sikoini tini xosa asinaku kuna uteikirire kire mena xouropu xenikorokoroe uteiwati, pa asinaku kuna ekime sinie asinaku kuna uteikiniai siexepu xuweuwatia, pa kapia kaketai apu paiya nu xepi xosa xuwexepina.
9 Mua kuna ekime kunaukiniai, ximine yei xiyeri pa kunani kunaune. Kire apue asinaku kuna tini xosa uteiwati, pa asinaku kuna ekime tinie tikiniai siexepu xuweuwatia, pa apu nu xepi xosa xuwexepina.
10 Tini amuxi nanunukuna? Yei mua kuna kunautiai paiya, apimie yeure xonikikemu asinaku xepinerire e Xoiteue yeure xoukemu asinakuxepina? Yei apimi ai xakuxakunikinere, wo? Iyesa. Ye apimi xakuxakunikepi saina pani tineia, ye Kristusupo saina apu xuwe.
Polue Yesusupo tianitianuwopi sayeyai asi
11 Xatai xura, ye kutuni katikine, pa asinaku kuna yei ekime tini xosa uteiyai paiya, kire apue yarareyai sapi xuwe.
12 Mua asinaku kuna ye kire apu xosaupo tepu xuwe. Pa xeika apimie paire ye taitai yepu xuwe. Xiri xuwe. Yesusu Kristusu nukoini ye xosa mua asinaku kunapu ximiaropu kuna xokupa yararetai.
13 Yei ekime kakiai kapiaure tini kuna iyesieikiriai. Tini sipa, yei Yuta nikau xonikisu sokisoki taine, Xoiteupo xuiapu Yesusure xonikisuwoteneai xiri xoxixoxinikiai. Kakine nini xiri xoxixoxinikepi saina tiai.
14 Yeu asukamana nikau xokupa kapia xiri sokisoki taine, pa xokupa kapia kakiroune. Yutapu nono tenemai iko sie emeimana nikau kapia emeserinikitiai.
15 Panaanikae ye iyaiyerepu xuweu yauseni, Xoiteue ye tumuyerina, nukou xousuaxina xouwesikepi kapiae, ye nukou apu sayepineureni yaiyetai. Kakina nukoini iyaretai yause xosa,
16 yei saina tinei xetau xeteneai xuimiapimi xosa nukou asinaku kuna uteiwopineure, nukou Nono ye xosa atariyetai. Xoiteue pa kapia ye xosa kaketai yause xosa, ye xoune kireu apimi kotonikepu xuwe.
17 Ye Yerusalemu xoune akerineri Yesusupo tiantianuwopi sayeneai apimi xekenikepu xuwe. Ye Arepia sanawa xoune puritiai. Kakerine xurise Tamaskusu erewese xiyeri xoutiai.
18 Xeimore xitosani xouratia, Pita xeika kunakunawopure Yerusalemu xoutiai. Xoune nu xeika 15-teu asau purianutiai.
19 Pana pa yause xosa ye kireu Yesusupo tiantianuwopi xekinikepu xuwe. Yemusu, nu Kokaipapu xatau, nu kireni xekeutiai.
20 Mua kuna ye tini xosa xayautiaia, ye Xoiteu ekero xiri suauni kutu kunaune, ye tini xoreitikiti xana xuwe.
21 Xurise xiyerine Siria propinsi xeika Silisia propinsi xeika xosa teixanautiai.
22 Pana Yesusure xonikisuwoteneai apimie Yutia tistrikipo xosa puroteneai, ninie yeu moaikemu xekopu xuweuwoneai.
23 Ninie yeure kireni kuna ipaki iyesirouneri, “Ximuximu pa apue siko ousikiepi saina teyai, pana muaiya pa xosikisuwopi kapiapu asinaku kuna ekime nukoe xoxixoxiwoyaire uteirouna,” xeteneai.
24 Xoiteue ye xosa kaketai kapiaure iyeserineri ninie nupo wenumu xouroreteneai.