Xoka kireni nakau
Polue Tesalonaika xosaniki xayawotai
Akereki kuna
Erewese Tesalonaika paiya propinsi Mesetoniapu kokaipa erewese purina. Polue Pilipai weti Tesalonaika xouna pa erewese xosa Yesusure xonikisuwoteneai xuiapu sainikereyai. (Yesusupo Tianuwopi Teu 17.1-9) Pana xokupa xuiapue Polupo kuna iyeserineri xonikisuneri Yesusu taiwori, Yuta apimie xekeri Polure xonikikemu xoxi xati xesawori Tesalonaika wetetai. Xurise, Polue xouna erewese Korin purotai yause xosa, nupo saina emeu Timotie kouna Tesalonaikapue Yesusure xonikisuwoteneai xosa kapia yaraxeteneaire Polu kawotai.
Polue Timotipo asi iyeserina Polu nuko xeika Sailasino Timotino xeikae ninipo xonikisu sokisokiwopure mua nakau xayawoteneai. Kireu sipa apimie nanuneri mua nakau paiya Polupo xokupa nakau kokaipa nakau yoira xosa puroteneaipo akereki nakau xeteneai. Mua nakau xosa Yesusure xonikisuwoteneaie Tesalonaika puroteneai nikau xonikisu xeika asinaku kapia xeikaure Polue nimaririwotai.
Pa xuiapue Yesusure xonikisuwoteneai paiya Kristusu nu amakina xiyeri kopina nini sipa xuwe. Ninie sipawopure kunauneri Kristusu xiyeri kopu xuweuni apimi xumuweteneai paiya, nini rania sipesi puropineri ekinikioma tepinerire? Kristusu nu amu yause yauseni kutu kopinana? Polue ninipo koto xapa ipaki kanikina, tini asinaku kapia tainari Kokaipa kopina yauseure ireiwa niketai.
Polue nupo saina emeumanapu Tesalonaika kinire xiri eiyoxeteneai
1
1—3
1 Sini Polu xuno Sailasi xuno Timoti xunoe, mua nakau tini Tesalonaika erewesepu xuiapu xosa xayaritikinuku. Paiya tinie Emisiki xeika Kokaipa Yesusu Kristusu xeikaure xotikisinuku etokipurikiriai xosa.
Xoiteue tinire xousuaxina xouwetikatia, tinipo xotikikemu yoroni purakuai.
Tesalonaika nikau xonikisure Polue nimaririwotai
2 Xokupa yause sinie tinire nanunanunuku Xoiteu eiyaseurounuku. Sinipo xokupa kunikuni xosa tinipo wenitiki tirounuku.
3 Tinipo xotikisue saitikerati asinaku kapia kakakuaire, kireu xotikikemu tinikinuku asinaku saina tinuku, xotikikemu sokisoki xinuku sikou Kokaipa Yesusu Kristusu yakukiriaire, sinie sikou Xoiteu Emisiki xosa eiyaseurounuku.
4 Tini xatasikimana, Xoiteue tini xiri xouwetikina, tini nukouni kutu tumutikeretai xati, sini paire sipauweikiriai.
5 Mua asinaku kuna sinie tini xosa tikoukiniai paiya, aipu kuna sie tini xosa putawoyaixe. Xuwe. Nue sokisoki xeika Xoiteupo Supo Youya xeika putawati tinie atinuku sinipo sokisoki xosikisu xekeukiniai. Sinie tini xopu purinuku tini tianitikepure, asinaku kapia kakikiriai paiya tini takieni sipa.
6 Tinie Xoiteupo kuna tari, xokupa xu tini xosa putawotai sorena, tinie sinipo kapia xeika Kokaipapu kapia xeika taiwari, Xoiteupo Supo Youyae tini saitikerati tinie nimaririnuku.
7 Pa xati Mesetonia propinsi xeika Akaia propinsi xeika xosa xokupa xuiapue Kristusure xonikisuwori tinie asinaku kapia nini atarinikikiniai.
8 Tinie Kokaipapu kuna uteikiniai paie kiroma miria sie xouna xounawotai. Paiya Mesetonia xeika Akaia xeika masaira kireni xosa xowotaixe. Xuwe. Tinie Xoiteure xotikisuwari xokupa wesewesei tinire kuna iyesieteneai xati, sini pani nini kanikepinuku saina xuwe.
9 Sinie tini xosa putaukiniai yause xosa kapia akipaxeyaire nikoini asiwarouneri. Tinie xoreixorei xoiteu teu wetinuku, nu sipesi purotai Xoiteuni kutu xosa xotikipirixikiriaire asiworoteneai. Tinie Xoiteupo aipu saina apu sainuku,
10 nupo Nono xumati Xoiteue xiyeri saretaie mena xouro wetina koati tinie yakuari ninie asiworoteneai. Nu Yesusu, nue sini xiyeri sosikatia Xoiteupo kisamaira kopina yause xosa sini atinuku puropu.