☰ 2 Yo 1
Xoka Axixiri Nakau
Yonie Xayawotai
Akereki Kuna
Kire Yesusure xonikisuwoteneai xuiapu nikau tumue mua kuna xayawoyai. Kireu xuiapue nanuneri kire xuiapu teue Yesusure tairouneri xosa nakau xayawotai xeneai. Ninie kireu xiri xonikienikineri, pani Xoiteupo kuna porouneri xoreixoreixirouneri apimi xosa ati sosopa epixepinerire xiri xouweniketai.
Sini Xoiteupo kunani kutu sokisoki tinuku apimie xetau xonuxonu kuna uteiwoteneaire sosopa epixepu
1
1 Ye+ Yesusure xonikisuwoteneai xuiapu nikau tumu, ne xui naki xeika neu nono teu xeika xosa mua nakau xayaune*. Xoiteue ne nukouni tumuneretai xati, ye suauni kutu kunaune, yei tini xiri xoietikine. Paiye kirenixe. Xuwe. Suau kuna sipani kutu xuiapue tini xiri xonikietikineri. 2 Suau kuna siko xosa purinana, nue sipesi siko xosa puropina, pa xati sinie tini xiri xosikietikinuku. 3 Suau kunapu kapia xeika kireu xosikienikepi kapia xeika paiya, Xoiteu xeika Yesusu xeika xosaniki purina. Pa xati Xauwa Xoiteu xeika Xoiteupo Nono Kristusu Yesusu xeikae ninire xonikisuwoxati xonikienikineri, siko xosa xonikemu yororoneri.
Sini kireu xiri xosikienikepi kapiani kutu taiwopu
4 Emisikie kunauna taiwa xeyai sie neu kireu nonomie suau kuna tairounerire ye+ kuna iyeserine xiri nimaririne. 5 Pana+ xui, yeu kire kuna ne xiri taiwowairexine. Paiya muanumu, sini kirenikirenie kireu xiri xosikienikepu. Paiya yei ne oma kuna tinixe. Xuwe. Ekimeni kutu sikoe mua kuna tieikiniai. 6 Xoiteu xouwewopi kapia+ paiya muanumu, sini Xoiteupo kunani kutu taiwopu. Pa xati pa kuna eikimeni kutu iyesikiniai paiya, muanumu, tini kireu xotikienikepi kapiani kutu taiwa.
Sini Kristusupo kuna sokisoki tepu
7 Iyesa+. Xoreisikepurexeteneai apimie ouyau texineri. Nini Yesusu Kristusue apu sayeyai xineri xonikisuworixe. Panumu apua, nu xoreixoreitua xati, Kristusu xiwaiuna. 8 Pa xati+ tini atinari sosopani kutu epixa, panumu sini irerei imerei tikiniai sapi wetexekini. Tini sokisoki tumunaria tinipo xokupa asinaku sapi takuai. 9 Kire apue+ Kristusupo kuna sokisoki tepu xuweuna, kire kuna xosa potixinapa, Xoiteue nu xeika puratixe. Pana kire apue Kristusupo kuna sokisoki tinapa, Omono Niraunoe nu xeika purinexeri. 10 Kire apue+ tinipo atoro kouna, panumu kuna tikopu xuweuwatia, tinie kusounari tinipo atoro sou xowaku. 11 Apue panumu apu kusouna paiya, nue nupo xoxi kapiapu sainaure tianuna.
Yonie xekenikepurexina
12 Xokupa+ kuna tini xosa xayawopine itouna pana, kire nakau xosa mua kuna iyarepi xiraxine. Ye koune xeketikinei, xirini kunakunaunuku nimaririwopuxi nanune.
13 Neu ukunipo nonomi, pa ukuni paiya Xoiteu nukoini tumuworetaipo nonomie ne kusonineri+.
+ 1:1 Yo 8.32;1 Pi 5.1;1 Yo 3.18;3 Yo 1 * 1:1 Kireu apimie nanuneri pa nakau paiya kire xuini kutu xosa xowotai xeteneai. Kakeri kireu nanuneri pa xui paiya nu kire Yesusure xonikisurouneri xuiapu xati, nupo nonomi paiya pa Yesusure xonikisuwoteneai xosaupo xuiapu xeteneai. Nu Yesusure xousurouna kire xui xatia, paina paiya nupo uko, kuna momu 13 xosa kunauna nu rania kire Yesusure xonikisurounneri xetai. + 1:4 3 Yo 3 + 1:5 Yo 13.34; 15.12; 15.17;1 Ti 4.8;1 Yo 2.7-8; 3.11; 3.23 + 1:6 Yo 14.15; 14.21;1 Yo 2.5; 2.24; 5.3 + 1:7 1 Yo 2.22; 4.1-3 + 1:8 Mk 10.29-30;Ka 3.4;Ip 10.32; 10.35 + 1:9 1 Yo 2.23 + 1:10 Ep 5.11;2 Ts 3.6 + 1:12 Yo 17.13;1 Yo 1.4;3 Yo 13-14 + 1:13 2 Yo 1
☰